بالقاشتا مىس بالقىتقان. قازاقتان شىققان العاشقى ينجەنەر ايەل

قازاق ايەلدەرى اراسىنان شىققان تۇڭعىش ينجەنەر، قوعام قايراتكەرى ءمادينا بەگاليەۆانىڭ تۋعانىنا 125 جىل، دەپ جازادى "ادىرنا". ءمادينا بەگاليەۆا 1899 جىلى 19 ناۋرىزدا بۇرىنعى بوكەي ورداسى، باتىس قازاقستان وبلىسىنىڭ جانىبەك اۋدانىندا دۇنيەگە كەلگەن. قازاق ايەلدەرى اراسىندا ءبىرىنشى بولىپ «تەحنيكا عىلىمدارىنىڭ كانديداتى» دەگەن عىلىمي شەنى بولعان. بالقاش مىس زاۋىتىن جوبالاۋعا قاتىسىپ، قۇرىلىس الاڭىندا العاشقى كۇندەردەن باستاپ جۇمىس ىستەگەن. ول پاتريارحال تارتىپكە قارسى كۇرەسىپ، قازاق قىزدارىنىڭ قۇقىعىن قورعاعان. حان ورداسىنداعى (قازىرگى وردا اۋىلى) ءۇش جىلدىق پەداگوگيكالىق كۋرستى، ورداداعى بۇكىلوداقتىق كوممۋنيستىك (بولشەۆيكتەر) پارتيا مەكتەبىن، بۇكىلوداقتىق ونەركاسىپ اكادەمياسىن بىتىرگەن. 1922–1935 جىلدارى — بوكەي، ورال گۋبەرنيالارى جانە سىرداريا وكرۋگىنىڭ بۇكىلوداقتىق كوممۋنيستىك (بولشەۆيكتەر) پارتياسى كوميتەتتەرىندە ايەلدەر اراسىنداعى جۇمىس جونىندەگى ءبولىمنىڭ مەڭگەرۋشىسى، بۇكىلوداقتىق كوممۋنيستىك (بولشەۆيكتەر) پارتياسى قازاقستان ولكەلىك كوميتەتىنىڭ نۇسقاۋشىسى، ولكەلىك ونەركاسىپ وداعى توراعاسىنىڭ ورىنباسارى بولدى. 1935–1943 جىلدارى بالقاش مىس قورىتۋ زاۋىتىندا ينجەنەر بولدى. 1943–1948 جىلدارى اتىراۋ وبلىستىق بۇكىلوداقتىق كوممۋنيستىك (بولشەۆيكتەر) پارتياسى كوميتەتىنىڭ ايەلدەر اراسىنداعى جۇمىس جونىندەگى ءبولىم مەڭگەرۋشىسى، قازاقستان كوممۋنيستىك پارتياسى ورتالىق كوميتەتىنىڭ نۇسقاۋشىسى، رەسپۋبليكالىق باقىلاۋ ورگانىندا باقىلاۋشى بولىپ ىستەدى. 1949 جىلدان زەينەت دەمالىسىندا بولدى.