اقش ستراتەگيالىق تۇرعىدا رەسەي جەڭىلدى دەپ ەسەپتەيدى ەكەن. ويتكەنى الدىنا قويعان بىردە-ءبىر ماقساتى ورىندالعان جوق. باسقاسىن كەيىن تالداي جاتارمىز، قازىر تەك ءبىر عانا، مۇمكىن باستى ماقساتىنىڭ ورىندالماي قالعانىن ايتايىق.
قىرىم تۇبەگىن باسىپ العانداعى ماقساتى - قارا تەڭىزدى ناتو-عا بەرمەۋ بولاتىن. قارا تەڭىزدە بولگاريا، رۋمىنيا جانە ناتو-نىڭ بازاسى بار تۇركيە بىرتىندەپ قوجا بولا باستادى. وعان ۋكراينا مەن گرۋزيا قوسىلعاندا رەسەي مۇلدەم شەتكە ىعىسىپ قالاتىنداي بولىپ كورىندى، سوندىقتان دا ولار ۋكراينانى باسىپ الىپ ودەسسادا قاراتەڭىز فلوتىنىڭ اسكەري بازاسىن ورناتىپ ۋكراينانى مۇلدەم قاراتەڭىزدەن بولەكتەپ تاستاپ، ءسويتىپ تەڭىز دەرجاۆاسى بولىپ وتىرعىسى كەلدى.
ەندى فاكتىگە قارايىق. ەكى جىلدىق سوعىستا رەسەي وسى ماقساتىنا جەتتى مە؟ ارينە، جوق. ول ول ما، ءتىپتى ول قارا تەڭىزدە دەرجاۆا تۇگىلى مىقتى ويىنشى دارەجەسىنە دە جەتە الماي قالدى. ءوز فلوتى جوق ۋكراينا رەسەيدىڭ مۇرنىن بەت، قانجوسا قىلىپ قوقىس شەلەككە لاقتىرىپ تاستادى. رەسەي فلوتى تەڭىزگە شىعا الماي قىرىم بۋحتالارىنا تىعىلىپ كۇن كورەتىن كۇيگە جەتتى. ۋكراينا ەش قىسىلماستان ءوز استىعىن تەڭىز ارقىلى قالاعان جاعىنا ساتا باستادى، رەسەيدىڭ "رۇقساتىنا" قۇيرىعىن دا سۇرتپەيتىن بولدى. تەڭىز دەرجاۆاسى دەگەنى ادىرەم قالدى.
رەسەي سونداي-اق بالتىق تەڭىزىندە دە تۇگەلدەي ناتو ەلدەرىنىڭ قورشاۋىندا قالدى. ەندى سول ەلدەر رۇقسات بەرسە عانا ءجۇرىپ، بەرمەسە جۇرە الماي قالاتىن دارەجەگە دەيىن قۇلدىرادى.
ەرتەڭ ۋكراينا F-16 ۇشاقتارىن السا وندا كاسپي فلوتيلياسىن دا تالقانداپ بەرسە دەپ تىلەيمىن. وعان دا ونىڭ تولىقتاي سىلتاۋى دا، مۇمكىندىگى دە بار، ويتكەنى ءدال وسى تەڭىزدەن رەسەي ۋكراينانى اتقىلاعان بولاتىن. يۋريديكالىق نەگىزى جەتكىلىكتى.
سوندا ەندى نە قالدى؟ مۇز قۇرساۋىندا جاتقان سولتۇستىك تەڭىزدەرى بولماسا؟ نەمەسە ۆلاديۆوستوكتىڭ اينالاسى؟ ساحالين؟ وعان جاپوندار رۇقسات بەرسە؟ باياعى "لەنين" اتتى مۇزجارعىش كەمەلەرى بار ما ەكەن الدە مۋزەيگە كەتتى مە؟
قۋانىش ەدىلحانوۆ
