شۆەيتساريا كونفەدەراتسياسىنا رەسمي ساپارى اياسىندا ءماجىلىس توراعاسى ەرلان قوشانوۆ بەرندە شۆەيتساريا فەدەرالدى جينالىسى ۇلتتىق كەڭەسىنىڭ توراعاسىمەن كەزدەستى، دەپ حابارلايدى "ادىرنا" ءتىلشىسى.
ءمادىلىس توراعاسى ەرلان قوشانوۆ شۆەيتساريا فەدەرالدى جينالىسى ۇلتتىق كەڭەسىنىڭ توراعاسى ەريك نۋزباۋمەرمەن جانە شۆەيتساريا كونفەدەراتسياسىنىڭ فەدەرالدى كەڭەسشىسى، سىرتقى ىستەر ءمينيسترى ينياتسيو كاسسيسپەن كەزدەستى.
فەدەرالدى جينالىستىڭ ۇلتتىق كەڭەسىنىڭ توراعاسىمەن كەزدەسۋدە ەرلان قوشانوۆ ەريك نۋزباۋمەرگە شۆەيتسارياعا رەسمي ساپارمەن شاقىرعانى ءۇشىن العىس ايتتى. ءماجىلىس سپيكەرى شۆەيتساريا قازاقستاننىڭ ەۋروپاداعى ماڭىزدى ساياسي جانە ەكونوميكالىق سەرىكتەسى ەكەنىن اتاپ ءوتتى.
"قازاقستان پرەزيدەنتى قاسىم-جومارت توقاەۆتىڭ شۆەيتسارياعا 2021 جىلعى قاراشاداعى العاشقى رەسمي ساپارى ەكىجاقتى قارىم-قاتىناسىمىزدىڭ جاڭا تاراۋىن اشتى. 2021 جىلعى تامىزدا قازاقستانعا شۆەيتساريا فەدەرالدى جينالىسى ۇلتتىق كەڭەسىنىڭ توراعاسى رەسمي ساپارمەن كەلدى. ءبىزدىڭ بۇگىنگى ساپارىمىز ەكى ەل اراسىنداعى پارلامەنتارالىق ديالوگتى نىعايتۋعا سەپتىگىن تيگىزەدى دەپ ويلايمىز", – دەدى ءماجىلىس توراعاسى.
ەرلان قوشانوۆ ءوز ارىپتەسىنە پرەزيدەنت رەفورمالارى تۋرالى ايتىپ بەردى. ول سونداي-اق VIII شاقىرىلىمداعى كوپ پارتيالى ءماجىلىس جۇمىسى، ونىڭ ىشىندە قابىلدانعان جاڭا زاڭدار تۋرالى مالىمەت بەردى. ءماجىلىس سپيكەرى قازاقستاندىق تاراپتىڭ شۆەيتساريامەن قۇقىقتىق سالاداعى ىنتىماقتاستىقتى دامىتۋعا نيەتى تۋرالى ايتتى.
تاراپتار دوستىق توپتارى، كوميتەتتەر مەن پارتيالىق فراكتسيالار اراسىنداعى ءوزارا ىقپالداستىقتى ودان ءارى دامىتۋ جولدارىن تالقىلادى. سونداي-اق، ساۋدا-ەكونوميكا، كولىك-لوگيستيكا، ەكولوگيا، ءبىلىم بەرۋ مەن عىلىم سالالارىندا سەرىكتەستىكتى قولداۋ ماسەلەلەرىنە ەرەكشە نازار اۋداردى.
ءوز كەزەگىندە ەريك نۋزباۋمەر قازاقستاندا جۇرگىزىلىپ جاتقان رەفورمالاردىڭ ماڭىزدىلىعىن اتاپ ءوتتى. سونىمەن قاتار پارلامەنتارالىق بايلانىستاردى تەرەڭدەتۋگە دايىن ەكەنىن جەتكىزىپ، دوستىق توپتارىنىڭ جۇمىسىن بەلسەنە جالعاستىرۋعا مۇددەلى ەكەنىن ايتتى. سونداي-اق شۆەيتساريا فەدەرالدى جينالىسى ۇلتتىق كەڭەسىنىڭ توراعاسى ەكى جاقتى ىنتىماقتاستىق ماسەلەلەرىن ودان ءارى دامىتۋعا دەپۋتاتتاردىڭ اتسالىساتىنىنا نازار اۋداردى.
كەزدەسۋ سوڭىندا ەرلان قوشانوۆ شۆەيتساريالىق شۆينگەن بالۋاندارىن («قازاق كۇرەسىنە» ۇقساس كۇرەستىڭ ۇلتتىق ءتۇرى) استانادا وتەتىن V دۇنيەجۇزىلىك كوشپەندىلەر ويىندارىنا قاتىسۋعا شاقىردى.
شۆەيتساريا كونفەدەراتسياسىنىڭ سىرتقى ىستەر ءمينيسترى ينياتسيو كاسسيسپەن كەزدەسۋدە ءماجىلىس توراعاسى قازاقستان مەن شۆەيتساريانىڭ ارىپتەستىگى ءوزارا قۇرمەت، دوستىق جانە سەنىم رۋحىندا، ونىڭ ىشىندە پارلامەنتتەر باعىتى بويىنشا نىعاياتىنىنا سەنىم ءبىلدىردى.
تاراپتار ەلدەر اراسىنداعى ەكونوميكالىق بايلانىستاردى دامىتۋ جايىن دا تالقىلادى.
"قازاقستاندىق نارىق – بىرلەسكەن ينۆەستيتسيالىق جوبالاردى ىسكە اسىرۋ ءۇشىن ءتيىمدى باستاپقى الاڭ. ءبىز شۆەيتساريامەن ەرەكشە جەتىستىككە جەتكەن سالالاردا تىعىز ىنتىماقتاستىق ورناتۋعا مۇددەلىمىز. ول – ەنەرگەتيكا، قازبا بايلىقتارىن قايتا وڭدەۋ، فارماتسەۆتيكا، ماشينا جانە اسپاپ جاساۋ، تۋريزم جانە قارجىلىق قىزمەت كورسەتۋ سالالارى. قازاقستان بيزنەس جۇرگىزۋ ءۇشىن وڭتايلى جاعدايمەن قامتاماسىز ەتۋگە دايىن", – دەدى ەرلان قوشانوۆ.
ءماجىلىس سپيكەرى شۆەيتساريا تاراپىنىڭ حالىقارالىق ارەناداعى قازاقستاننىڭ باستامالارىن قولداۋىن جوعارى باعالايتىنىن جانە بۇۇ الاڭىندا كانديداتۋرالاردى ءوزارا قولداۋ بويىنشا ىنتىماقتاسۋدىڭ جوعارى دەڭگەيىن اتاپ ءوتتى.
تاراپتار قازاقستان ازاماتتارى ءۇشىن شەنگەن ايماعىنىڭ ۆيزالىق رەجيمىن جەڭىلدەتۋ جانە قىلمىستىق ىستەر بويىنشا قۇقىقتىق كومەك تۋرالى ءوزارا تۇسىنىستىك جونىندە مەموراندۋم جاساسۋ ماسەلەلەرى بويىنشا دا پىكىر الماستى.
