تاراز قالاسىنىڭ دوستىق ۇيىندە «ارحىز» رەسپۋبليكالىق قوعامدىق بىرلەستىگىنە قاراستى «بىرلىك» قاراشاي-بالكارلاردىڭ جامبىل فيليالى» ەتنومادەني بىرلەستىگىنىڭ ۇيىمداستىرۋىمەن ەتنوس كۇنى ءوتتى، دەپ حابارلايدى adyrna.kz ۇلتتىق پورتالى جامبىل وبلىسى اكىمى اپپاراتى «قوعامدىق كەلىسىم» كمم باسپاسوز ورتالىعىنا سىلتەمە جاساپ.
تامىزدىڭ 22 كۇنى وتكەن ءىس-شارانى جامبىل وبلىسى اكىمى اپپاراتى «قوعامدىق كەلىسىم» كوممۋنالدىق مەملەكەتتىك مەكەمەسى مەن «ارحىز» رەسپۋبليكالىق قوعامدىق بىرلەستىگىنىڭ جانىنداعى وبلىستىق «بىرلىك» قاراشاي-بالكارلار جامبىل فيليالى» ەتنومادەني بىرلەستىگى ۇيىمداستىردى. جامبىل وبلىسى اكىمى اپپاراتى «قوعامدىق كەلىسىم» كمم باسشىسى رانو ماحسۋدقىزىنىڭ ايتۋىنشا، ەلىمىزدە ءتۇرلى ەتنوس وكىلدەرى تاتۋ-ءتاتتى عۇمىر كەشۋدە.
– قازاقستان – بارلىق ەتنوس وكىلدەرىنە كەڭ قۇشاعىن جايا بىلگەن قاسيەتتى ەل. وڭىرلىك «بىرلىك» قاراشاي-بالقارلار ەتنومادەني بىرلەستىگىن بۇگىنگى ەتنوس كۇندەرىمەن قۇتتىقتاي وتىرىپ، ولاردىڭ وتكەنى مەن بولاشاعىنا زور قۇرمەتپەن قارايتىندىعىمىزدى بىلدىرەمىز. قاراشاي-بالقارلار قاۋىمداستىعىنا دەگەن ىقىلاسىمىز شەكسىز. ۇيىمنىڭ تالاپتى، ونەرلى جاستارىنا ءوسىپ-وركەندەۋ تىلەيمىز. وزدەرىڭىز جاقسى بىلەسىزدەر، ەلىمىز 140 ەتنوس پەن 19 كونفەسسيا وكىلدەرىنىڭ تۋعان شاڭىراعىنا اينالدى. ازاماتتىق تاتۋلىق پەن ۇلتارالىق كەلىسىم ءبىزدىڭ باستى قۇندىلىعىمىز, – دەدى رانو ماحسۋدقىزى.
«بىرلىك» ەتنومادەني بىرلەستىگىنىڭ باسشىسى لەليا احمادقىزى جاستاردى ۇلكەنگە قۇرمەت كورسەتۋگە تاربيەلەۋ وتە ماڭىزدى ەكەنىن اتاپ ءوتتى. سونداي-اق ول اتا-بابالار رۋحىنا تاعزىم ەتۋ، باسقا دا ەتنيكالىق ەرەكشەلىكتەرگە قاتىستى داستۇرلەردى ساقتاۋعا توقتالدى.
– قانشاما قايعى-قاسىرەت پەن قۋعىن-سۇرگىندى باسىنان وتكەرگەن قاراشايلاردىڭ جانىنا باتقان قيىندىعىن تەرەڭىنەن ءتۇسىنىپ، ىستىق ىقىلاسىن كورسەتكەن قازاق حالقى بىزگە وتە جىلى كورىنەدى. ءبىزدىڭ ۇرپاقتارىمىز قازاق توپىراعىندا ءوسىپ-ءونىپ، قازاق ەلى مەن جەرىنە ادال قىزمەت ەتىپ كەلەدى. سانى از بولعانىمەن، قاراشاي-بالقار جۇرتى مادەني ورتالىقتارى ارقىلى ءوزىنىڭ ۇلتتىق بولمىسى مەن سالت-ءداستۇرىن، ۇلت رەتىندەگى ەرەكشەلىكتەرىن قاستەرلەي بىلەتىن حالىق. بۇگىندە وسى اسسامبلەيانىڭ ارقاسىندا تاعدىرى توعىسقان ەتنوس وكىلدەرى اۋىزبىرشىلىگىن ساقتاپ، ءبىر شاڭىراق استىندا تاتۋ-ءتاتتى عۇمىر كەشىپ جاتىر. الداعى ۋاقىتتا دا بىرلىگىمىزدى كورسەتىپ، تولايىم تىرلىكتەر اتقارا بەرەيىك، – دەدى ول.
جيىن سوڭىندا قازاقستان حالقى اسسامبلەياسىنىڭ ءىس-شارالارىنا ايانباي ءوز ۇلەستەرىن قوسىپ جۇرگەن «بىرلىك» قاراشاي-بالقارلار بىرلەستىگىنىڭ انالار كەڭەسىنىڭ مۇشەلەرى مەن شىعارماشىلىق جاستارىنا العىس حاتتار مەن سىيلىقتار تارتۋ ەتىلدى.
"ادىرنا"
ۇلتتىق پورتالى