باتىس قازاقستان وبلىسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى اعىمداعى جىل باسىنان بەرى كاسىپكەرلىك سۋبەكتىلەرىنە جوسپاردان تىس 10 تەكسەرۋ جۇرگىزگەن. جۇرگىزىلگەن تەكسەرۋلەردىڭ ناتيجەلەرى بويىنشا كاسىپكەرلىك سۋبەكتىلەرى 9 جاعدايدا ەسكەرتۋ تۇرىندە اكىمشىلىك جاۋاپكەرشىلىككە تارتىلسا، ءبىر تەكسەرۋدىڭ ناتيجەسى بويىنشا ايىپپۇل سالىنعان.
بۇل تۋرالى باتىس قازاقستان وبلىسىنىڭ ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنىڭ باسشىسى ەلميرا كيماتوۆا ايتىپ بەردى.
دەپارتامەنت باسشىسى ەلميرا نۇرقىزىنىڭ مالىمەتىنشە، باتىس قازاقستان وبلىسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنە جىل باسىنان بەرى 434 جازباشا ءوتىنىش كەلىپ تۇسكەن.
وسى ساننان 97 ءوتىنىش قۇزىرەتى شەگىندە قاراۋ ءۇشىن وزگە مەملەكەتتىك ورگاندارعا جىبەرىلگەن، ءوتىنىش بەرۋشىلەر 24 ءوتىنىشتى كەرى قايتارىپ العان. قالعان 313 ءوتىنىشتى مەملەكەتتىك ورگان ءوز قۇزىرەتى شەگىندە قارادى. سونداي-اق، اعىمداعى جىلى دەپارتامەنتكە 193 ازامات كونسۋلتاتيۆتىك كومەك الۋ ءۇشىن جۇگىنگەن.
جوعارىدا اتالعان كەزەڭدە دەپارتامەنتكە «قاۋىرت جەلى» تەلەفونى بويىنشا 257 ءوتىنىش كەلىپ تۇسكەن. ءوتىنىش بىلدىرگەندەردىڭ بارلىعىنا كونسۋلتاتسيالىق كومەك كورسەتىلگەن.
دەپارتامەنت زاڭناماعا سايكەس بيزنەس سۋبەكتىلەرىنە تۇتىنۋشىلاردىڭ قۇقىقتارىن بۇزۋ فاكتىلەرى بويىنشا جوسپاردان تىس تەكسەرۋلەر جۇرگىزۋگە قۇقىلى. مەملەكەتتىك ورگان وتكىزىلگەن تەكسەرۋلەردىڭ ناتيجەلەرى بويىنشا «اكىمشىلىك قۇقىق بۇزۋشىلىق تۋرالى» قر كودەكسىنىڭ 190-بابىنىڭ 5-بولىگى، 6-بولىگى، 193-بابى 1-بولىگى بويىنشا ساتۋشىلاردى اكىمشىلىك جاۋاپتىلىققا تارتۋعا قۇقىلى.
دەپارتامەنت جۇرگىزگەن بارلىق جۇمىستاردىڭ ناتيجەلەرى بويىنشا تۇتىنۋشىلارعا ساپاسىز تاۋار ءۇشىن، زاڭنامادا بەلگىلەنگەن 14 كۇن مەرزىمدە ساپالى تاۋار ءۇشىن اقشالاي قاراجاتتى قايتارۋعا، ساپاسىز كورسەتىلگەن قىزمەت ءۇشىن اقشالاي قاراجاتتى قايتارۋعا جاردەم كورسەتتى. تۇتىنۋشىلارعا اقشالاي قاراجاتتى قايتارۋدىڭ جالپى سوماسى 57 ملن 410 مىڭ تەڭگەنى قۇرادى.
دەپارتامەنت زاڭناماعا سايكەس سوت پروتسەستەرىندە تالاپكەر بولۋعا جانە تالاپ ارىزداردى سوتقا جىبەرۋگە قۇقىلى. وسى ورايدا ەلميرا نۇرقىزى بىرنەشە پروتسەستەرگە توقتالىپ ءوتتى.
– دەپارتامەنت سوت پروتسەسىنە ۋ. تۇتىنۋشىنىڭ اۆتوكولىك قۇرالدارىن ساتۋمەن اينالىساتىن سەرىكتەستىككە تالابى بويىنشا ءۇشىنشى تۇلعا رەتىندە قاتىستى. تالاپ ارىزعا سايكەس ۋ. جاۋاپكەردەن كولىك ساتىپ الدى. اۆتوكولىكتى پايدالانۋ بارىسىندا تۇتىنۋشى كەلەسى اقاۋلاردى انىقتايدى: كولىكتە جۇرگىزۋشىنىڭ الدىڭعى اينەگى قوزعالىس كەزىندە قىستا قاتىپ قالادى، بۇل كورىنۋدى شەكتەيدى، سۋ ارتقى سول جاق اينەكتەن كەلەدى، تەجەگىشتى باسقان كەزدە اۆتوماتتى قوراپتان جارىقشاق شىعادى. جوعارىدا اتالعان اقاۋلاردىڭ كەپىلدىك مەرزىمى اياسىندا ورىن الۋىنا بايلانىستى تۇتىنۋشى ساتۋشىعا نارازىلىق جىبەردى، بىراق تاراپتار اراسىنداعى ماسەلەنى شەشۋگە نارازىلىقتى جىبەرۋ ناتيجە بەرمەدى. وسىعان بايلانىستى تۇتىنۋشى دەپارتامەنتكە، سودان كەيىن ساتۋشىعا قاتىستى سوتقا تالاپ ارىزبەن جۇگىندى.
سوت تالقىلاۋى بارىسىندا ساتۋشىمەن بىرگە سوت تالقىلاۋىنا اۆتوموبيل ءوندىرۋشىسىنىڭ وكىلدەرى تارتىلدى. سوت پروتسەسىندە ءوندىرۋشىنىڭ وكىلدەرى تالاپكەردىڭ تالاپ ارىزىندا كورسەتىلگەن اقاۋلار زاۋىتتىق اقاۋ ەكەنىن راستادى. تۇتىنۋشى تاۋاردىڭ كەمشىلىكتەرىن انىقتاعان جانە ونى اۋىستىرۋ تۋرالى تالاپ قويعان جاعدايدا تۇتىنۋشىلاردىڭ قۇقىقتارىن قورعاۋ تۋرالى زاڭنامانىڭ نورمالارىنا سايكەس ساتۋشى تاۋاردى دەرەۋ اۋىستىرۋعا، ال قاجەت بولعان جاعدايدا تاۋاردىڭ ساپاسىن ساتۋشىعا ءتيىستى تالاپ قويىلعان ساتتەن باستاپ كۇنتىزبەلىك وتىز كۇن ىشىندە قوسىمشا تەكسەرۋ جۇرگىزۋگە مىندەتتى، – دەيدى سالا باسشىسى.
ناتيجەسىندە، تۇتىنۋشىنىڭ تالاپ-ارىزى بويىنشا ازاماتتىق ءىستى قاراۋ قورىتىندىسى بويىنشا سوت تالاپكەردىڭ پايداسىنا مىناداي مولشەردە اقشا سوماسىن ءوندىرىپ الۋ تۋرالى شەشىم شىعارعان. 7 100 000 تەڭگە – اۆتوكولىكتىڭ قۇنى، 71 000 تەڭگە-تۇراقسىزدىق ايىبىنىڭ سوماسى.
سونداي-اق، دەپارتامەنت تالاپكەر اۆتوكولىك ساتىپ الۋشى بولعان كەزدە وسىعان ۇقساس پروتسەسكە قاتىسقان. شەشىمگە سايكەس سوت جاۋاپكەردەن وزگە شىعىستاردان باسقا اۆتوكولىكتىن قۇنىن 17 ملن 210 تەڭگە كولەمىندە ءوندىرىپ الۋ تۋرالى شەشىم شىعارىپتى.
سونداي-اق تالاپكەرلەر جاۋاپكەردەن اربيتراجدى وقىتۋ بويىنشا تالىمگەرلىك كۋرسىن ساتىپ العان. وسى كۋرسقا سايكەس تالاپكەرلەردى اقشا تابۋعا، ۆاليۋتانى ونلاين رەجيمىندە ايىرباستاۋعا ۇيرەتۋ كەرەك بولادى. وقىتۋ وفلاين رەجيمدە وتكەن. الايدا، تالاپكەرلەر بۇل كۋرسقا قاناعاتتانباي، جاۋاپكەردەن اقشانى قايتارۋدى سۇرايدى.
ازاماتتىق ءىستى قاراۋ بارىسىندا وقۋ اياقتالعاننان كەيىن اتتەستاتتاۋ جۇرگىزىلمەگەنى، سەرتيفيكات بەرىلمەگەنى انىقتالعان. جاۋاپكەردىڭ ايتۋىنشا، سەرتيفيكات اعىمداعى جىلدىڭ ماۋسىم ايىنىڭ باسىندا جىبەرىلگەن، سونىمەن بىرگە تۇتىنۋشىلار سەرتيفيكاتتارىن الماعان. زاڭناما نورمالارىنا سايكەس ورىنداۋشى تاپسىرىس بەرۋشىنىڭ الدىندا شارتتىق مىندەتتەمەلەردى تيىسىنشە ورىنداعانى ءۇشىن جاۋاپتى بولادى.
ازاماتتىق ءىستى قاراۋ ناتيجەلەرى بويىنشا سوت ازاماتتاردىڭ تالاپ ارىزىن قاناعاتتاندىرۋ جانە جاۋاپكەردەن ءاربىر تالاپكەردىڭ پايداسىنا ءوندىرىپ الۋ تۋرالى شەشىم قابىلداپ، 390 000 تەڭگە مولشەرىندەگى سوما – وقۋ كۋرسىنىڭ قۇنى، وكىلگە كومەك تولەۋ بويىنشا شىعىستار 39 000 تەڭگە تولەنگەن.
كاۋسار بايعاليەۆا
