دەموگرافيالىق وزگەرىس. قازاقستاندا بالا تۋ كورسەتكىشى ازايعان

2024 جىلى قازاقستاندا  365,9 مىڭ بالا دۇنيەگە كەلگەن. بۇل 2023 جىلمەن سالىستىرعاندا از كورسەتكىش (388,4 مىڭ), دەپ حابارلايدى "ادىرنا" ۇلتتىق پورتالى ۇلتتىق ستاتيستيكا بيۋروسىنا سىلتەمە جاساپ. دۇنيەگە كەلگەن سابيلەردىڭ 51,6%-ى ۇل، 48,4%-ى قىز. قالالىق جەرلەردە 219,1 مىڭ بالا (59,9%), ال اۋىلدىق جەرلەردە 146,7 مىڭ بالا (40,1%) ومىرگە كەلگەن. جالپى تۋ كوەففيتسيەنتى 1000 ادامعا شاققاندا 18,15-ءتى قۇراعان. بۇل كورسەتكىش 2023 جىلى 19,52-گە جەتكەن. [caption id="attachment_231026" align="alignnone" width="1024"] فوتو: ۇلتتىق ستاتيستيكا بيۋروسى[/caption] تۋ دەڭگەيى ەڭ جوعارى ايماقتار – تۇركىستان (24,88), ماڭعىستاۋ (24,29) وبلىستارى جانە شىمكەنت قالاسى (23,58). انالاردىڭ جاسىنا كەلسەك، جاڭا تۋعان نارەستەلەردىڭ 27,5%-ىن 25-29 جاس ارالىعىنداعى، ال 26,2%-ىن 30-34 جاس ارالىعىنداعى ايەلدەر دۇنيەگە اكەلگەن. 20 جاسقا دەيىنگى قىزدار 11,9 مىڭ بالانى ومىرگە اكەلسە، 50 جاستان اسقان ايەلدەردەن تۋعان بالالار سانى – 100. ورتاشا ەسەپپەن، 2024 جىلى انالاردىڭ جاسى 29,8 جاس بولدى. تۋىلعان بالالاردىڭ 23%-ى وتباسىنداعى تۇڭعىش بالا اتاندى (84,2 مىڭ), ال ءتورتىنشى بولىپ تۋعاندار سانى 60 مىڭنان استى (16,4%). سونداي-اق، ءبىر جىل ىشىندە 3 721 ەگىز، 46 ۇشەم دۇنيەگە كەلگەن.