بۇگىن «ءتىل-قازىنا» ۇلتتىق عىلىمي-پراكتيكالىق ورتالىعىندا 2025 جىلعا دەيىن قازاق ءالىپبيىن لاتىن گرافيكاسىنا كەزەڭ-كەزەڭىمەن كوشىرۋگە ارنالعان ءىس-شارالار جوسپارىنا سايكەس جاڭا ءالىپبيدىڭ ەملە ەرەجەلەرىن ۇيرەتۋگە ارنالعان وقىتۋ سىنىپتارى اشىلدى.
ماقساتى – لاتىننەگىزدى جاڭا قازاق جازۋىنىڭ ءالىپبيى مەن ەملە ەرەجەلەرىنىڭ قۇرىلىمىن، جاڭالىقتارىن، ەملە نورمالارىنىڭ عىلىمي نەگىزدەرىن مەڭگەرگەن، ەرەسەك اۋديتورياعا وقىتىپ، تۇسىندىرە الاتىن بىلىكتى ترەنەرلەر دايىنداۋعا مۇمكىندىك جاساۋ.
وقىتۋ سىنىپتارى كۋرس وتكىزۋگە قاجەتتى قۇرالدارمەن، تەحنيكالارمەن جابدىقتالعان. ءدارىسحانالاردا رەسپۋبليكا بويىنشا سونىمەن قاتار شەتەلدەگى عالىمدار، ادىسكەرلەرمەن بايلانىس ورناتۋعا، ونلاين سەمينار وتكىزۋگە مۇمكىندىك بار. سەمينار، كۋرستاردى جاڭا قازاق ءالىپبيىنىڭ ەملە ەرەجەسىن ازىرلەگەن عالىمدار وتكىزەدى.
شارادا «ءتىل-قازىنا» ورتالىعىنىڭ باس ديرەكتورى الىبەك اسقار كىرىسپە ءسوز الىپ، قازاق ءالىپبيىن لاتىن گرافيكاسىنا كەزەڭ-كەزەڭىمەن كوشىرۋگە ارنالعان ءىس-شارالار جوسپارىنا سايكەس اتقارىلىپ جاتقان جۇمىستاردى تانىستىرىپ، جىلى لەبىزىن ايتتى.
سونىمەن قاتار جازۋشى، مەملەكەت سىيلىعىنىڭ لاۋرەاتى، قوعام قايراتكەرى تولەن ابدىك، قر پارلامەنتى ءماجىلىسىنىڭ دەپۋتاتى فاحريددين قاراتاەۆ، قر مادەنيەت جانە سپورت ۆيتسە-ءمينيسترى نۇرقيسا مۇراتۇلى وقىتۋ سىنىپتارىنىڭ ساپالى، ناتيجەلى جۇمىس جاساۋىنا سەنىم ءبىلدىردى. قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتى توراعاسىنىڭ ورىنباسارى اينۇر مىرزابەكوۆا وقىتۋ سىنىپتارىن اشۋدىڭ ماڭىزدىلىعىنا توقتالدى: «ەلباسىنىڭ قازاق ءتىلىن جاڭا الىپبيگە كوشىرۋگە بايلانىستى جارلىعىنان كەيىن قر پرەمەر-ءمينيسترىنىڭ وكىمىمەن «قازاق ءتىلى ءالىپبيىن لاتىن گرافيكاسىنا 2025 جىلعا دەيىن كەزەڭ-كەزەڭىمەن كوشىرۋ جونىندەگى ءىسشارالار جوسپارى» بەكىتىلدى. ۇكىمەت قاۋلىسىمەن «ءتىل-قازىنا» ۇلتتىق عىلىمي-پراكتيكالىق ورتالىعى» قۇرىلدى. ەلىمىزدەگى لاتىن ءالىپبيىن ەنگىزۋگە بايلانىستى جۇمىستار وسى مەكەمە ارقىلى جۇزەگە اسىرىلۋدا. اتاپ ايتقاندا، ۇلتتىق كوميسسيا جانىنان قۇرىلعان جۇمىس توپتارىنىڭ جۇمىسىن ۇيلەستىرۋ، لاتىن ءالىپبيىن ەنگىزۋگە باعىتتالعان مەملەكەتتىك تاپسىرمالاردى ىسكە اسىرۋ.
2019 جىل – «ادىستەمە جىلى». جاڭا ەملە ەرەجەلەرىن وقىتۋ بويىنشا نۇر-سۇلتان قالاسىندا 72 ساعاتتىق بىلىكتىلىك ارتتىرۋ كۋرستارى، وڭىرلەردە دارىستەر مەن 12 ساعاتتىق سەمينارلار ۇيىمداستىرىلۋدا. «ءتىل-قازىنا» ورتالىعىنان ءبىلىم جەتىلدىرگەن فيلولوگ ماماندار ءوز وڭىرىندە ءتىل ۇيرەتۋ كۋرستارىن جالعاستىرادى. اتالعان كۋرس 2025 جىلعا دەيىن جۇرگىزىلەتىن بولادى.
جاڭا الىپبيگە كوشۋ بارىسىندا ءبىز وقىتۋ ساپاسىنا ەرەكشە ءمان بەرۋىمىز قاجەت. قازىرگى كەزەڭدە وقىتۋدىڭ قاي ءتۇرى بولسىن جاڭا يننوۆاتسيالىق تەحنولوگيالارعا قۇرىلعانى ءجون. وسى رەتتەن كەلگەندە، بۇگىن اشىلاتىن وقۋ عيماراتى وسىنداي جاڭا تالاپتارمەن جابدىقتالعان.
سونىمەن بىرگە وقۋ عيماراتىنداعى تەحنيكالىق قۇرىلعىلار ونلاين سەمينار وتكىزۋگە دە مول مۇمكىندىك بەرەدى».
شاراعا زيالى قاۋىم وكىلدەرىنەن اكادەميك، مەملەكەت سىيلىعىنىڭ لاۋرەاتى سەيىت قاسقاباسوۆ، اقىن، مەملەكەت سىيلىعىنىڭ لاۋرەاتى ايت نەسىپبەك، جازۋشى، مەملەكەت سىيلىعىنىڭ لاۋرەاتى الدان سمايىل، پروفەسسور مارات ابسامەتوۆ، ءتىل جاناشىرلارى احمەتوۆ مۇحامبەديا، الپەيىسوۆا كامال، قوعام قايراتكەرى باتىرشاۇلى سايلاۋ قاتىستى.
