«ايەل گيلزانى الىپ كەتتى». شەرزات پولاتتىڭ ءىسى بويىنشا كۋاگەر سوتتا جاۋاپ بەردى

تالدىقورعاندا تالعار قالاسىندا 16 جاستاعى شەرزات پولاتتىڭ ولتىرىلۋىنە قاتىستى سوت پروتسەسى جالعاسۋدا. بۇگىن سوتتا وقيعانىڭ كۋاگەرلەرى جاۋاپ بەرىپ جاتىر. كۋاگەرلەردىڭ ءبىرى – ارلان قازىكەنوۆ – سوتتا وقيعا ورنىنا توبەلەس اياقتالعاننان كەيىن عانا كەلگەنىن ايتتى. ول جەردە كوپ ادام جينالعانىن جانە جەردە جاتقان ەكى ەر ادامدى كورگەن. كۋاگەردىڭ ايتۋىنشا، ولار ءالى ءتىرى بولعان. «ءبىز كولىكتەن تۇسكەن كەزدە ءبىر ايەل جەردەن گيلزانى الىپ، كولىككە وتىردى. قارجاۋباي جەردە جاتقان ەكى ادامدى كوتەرىپ، كولىككە سالىپ، كەتىپ قالدى. ودان كەيىن ءبىز كورشىلەرمەن سول توبەلەس تۋرالى سويلەسىپ تۇردىق»، – دەپ مالىمدەدى قازىكەنوۆ. تاعى ءبىر كۋاگەر – ەلداش روزىباكيەۆ – ادۆوكاتتىڭ ناقتىلاۋ سۇراعىنا الگى ايەلدى تاني الاتىنىن، بىراق ونىڭ اتىن بىلمەيتىنىن اتاپ ءوتتى. كۋاگەردىڭ ايتۋىنشا، ول قازىرگى ۋاقىتتا سوت زالىندا جوق. بۇگىن كەزەكتى سوت وتىرىسىنا شەرزات پولاتتىڭ اتا-اناسى كەلمەدى. بۇل سۋديانىڭ رۇقساتىمەن بولدى. ولاردىڭ ورنىنا دوساەۆ پەن اجىعاليەۆتىڭ ادۆوكاتتارى قاتىسىپ وتىر.