يران ىشكى ىستەر ءمينيسترى ەلدەگى ەڭ ءىرى كونتەينەر پورتى — بەندەر-ابباس قالاسىنداعى جارىلىستىڭ سەبەبى سالعىرتتىق بولعانىن مالىمدەدى. وقيعا سالدارىنان قازا تاپقاندار سانى كەمىندە 70 ادامعا جەتتى. يران قورعانىس مينيسترلىگى شەتەلدىك اقپارات قۇرالدارىنىڭ جۇكتە حيميالىق زىمىران وتىنى بولعان دەگەن حابارلارىن جوققا شىعاردى، دەپ حابارلايدى “ادىرنا” ۇلتتىق پورتالى ۆۆس باسىلىمىنا سىلتەپ.
ىشكى ىستەر ءمينيسترى ەسكاندار مومەني سەنبى كۇنى شاحيد رادجاي پورتىندا بولعان جارىلىس سالعىرتتىقتىڭ، قاۋىپسىزدىك شارالارىنىڭ ساقتالماۋىنىڭ جانە نەمقۇرايلىلىقتىڭ سالدارىنان بولعانىن ايتتى.
«جاۋاپتى دەپ تانىلعان كەيبىر تۇلعالار تەرگەۋگە شاقىرىلدى»، — دەدى ول.
جەكسەنبى كۇنى يران اسكەري-تەڭىز كۇشتەرىنىڭ باستى بازاسى ورنالاسقان بەندەر-ابباس قالاسىندا بارلىق مەكتەپتەر مەن مەملەكەتتىك مەكەمەلەر جابىلدى. ال كورشىلەس قالالاردا بيلىك تۇرعىندارعا كوشەگە سەبەپسىز شىقپاۋعا جانە قورعانىس ماسكالارىن تاعۋعا كەڭەس بەردى.
ەلدىڭ كەدەن ورگاندارىنىڭ حابارلاۋىنشا، پورتتا تىركەلمەگەن جانە رەسمي تۇردە دەكلاراتسيالانباعان يمپورتتىق جۇك ورتەنىپ، جارىلعان. بۇل تۋرالى ISNA اقپارات اگەنتتىگى كەدەن اكىمشىلىگىنە سىلتەمە جاساپ حابارلادى.
حورموزگان پروۆينتسياسىنىڭ توتەنشە جاعدايلار باسقارماسىنىڭ باسشىسى مەحرداد حاسسانزادە دۇيسەنبى كۇنى ءورتتى ءسوندىرۋ جۇمىستارى اياقتالۋعا جاقىن ەكەنىن مالىمدەدى. ال پروۆينتسيا گۋبەرناتورى موحامماد اشۋري تازياني پورتتى تازالاۋ جۇمىستارىنا بىرنەشە كۇن قاجەت بولاتىنىن، ال جاعدايدىڭ تۇراقتالۋىنا ەكى اپتاعا دەيىن ۋاقىت كەتۋى مۇمكىن ەكەنىن ايتتى. ونىڭ باعالاۋىنشا، جارىلىس پورتتىڭ شامامەن ۇشتەن ەكى بولىگىن — 1500 گەكتار جەردى — قاتتى زاقىمداعان.
جەكسەنبى كۇنى Sina Marine and Port Services Development Company كومپانياسىنىڭ باس ديرەكتورى جارىلىستىڭ سەبەبىن قاۋىپتى جۇكتەردىڭ قاتە دەكلاراتسيالانۋىمەن بايلانىستى قايتالاناتىن جانە اپاتتى قاتەلىك دەپ اتادى.
يران قورعانىس مينيسترلىگى جارىلىستىڭ بالليستيكالىق زىمىرانداردا قولدانىلاتىن قاتتى وتىن — ناتري پەرحلوراتىن دۇرىس پايدالانباۋدان بولدى دەگەن اقپاراتتى جوققا شىعاردى. مينيسترلىك وكىلى رەزا تالاي-نيك جارىلىس بولعان ايماقتا اسكەري ماقساتتاعى وتىن نەمەسە جۇكتەردىڭ يمپورتتىق نەمەسە ەكسپورتتىق جەتكىزىلىمى بولماعانىن ايتىپ، شەتەلدىك باق-تى جالعان اقپارات تاراتتى دەپ ايىپتادى.
ال تەڭىزدەگى قاۋىپ-قاتەرلەردى باعالايتىن جەكەمەنشىك كونسالتينگتىك Ambrey Intelligence كومپانياسى Associated Press اگەنتتىگىنە وتكەن ايدا پورتقا ناتري پەرحلوراتى جەتكىزىلگەنىن، ال جارىلىس «ونى دۇرىس پايدالانباۋدىڭ سالدارىنان بولۋى مۇمكىن» ەكەنىن حابارلاعان. New York Times باسىلىمى دا يراننىڭ يسلام رەۆوليۋتسياسى ساقشىلار كورپۋسىمەن بايلانىستى ءانونيمدى دەرەككوزگە سىلتەمە جاساپ، جارىلىستىڭ سەبەبى ناتري پەرحلوراتى بولعانىن جازدى.
