ءۇندىستاننىڭ سولتۇستىگىندە 21 اۋەجاي جۇمىسىن ۋاقىتشا توقتاتتى، دەپ حابارلايدى «ادىرنا» ءتىلشىسى Reuters اگەنتتىگىنە سىلتەمە جاساپ.
بۇل شەشىمگە ءۇندىستان مەن پاكىستان اراسىنداعى قاقتىعىستىڭ كۇشەيۋى سەبەپ بولعان.
«130-دان استام رەيس توقتاتىلدى. شيەلەنىستىڭ كۇشەيۋى اياسىندا ەكى ەل دە وزدەرىنىڭ اۋە كەڭىستىگىن جاۋىپ تاستادى. ىشكى اۋە قاتىناسى دا بۇزىلدى»،—دەپ جازدى شەتەلدىك باق.
اۋە تاسىمالداۋشى كومپانيالار جولاۋشىلارعا بيلەتتى تەگىن اۋىستىرۋعا نەمەسە قۇنىن تولىق قايتارىپ بەرۋگە ءازىر.
ايتا كەتەيىك، قازىرگى تاڭدا ەكى ەل اراسىنداعى جاعداي ۋشىعىپ بارادى. ءۇندىستاننىڭ كاشميرگە جاساعان زىمىراندىق شابۋىلىنان 31 ادام قازا تاۋىپ، 57-ءى جارالاندى. پاكىستان دا كورشى ەلگە وق جاۋدىرىپ، 15 تۇرعىن مەرت بولدى.
