استانانىڭ قىلمىستىق ىستەر جونىندەگى اۋدانارالىق سوتى مادەنيەت جانە سپورت سالاسىنىڭ بۇرىنعى ۆيتسە-ءمينيسترى ەرلان قوجاعاپانوۆقا ۇكىم شىعاردى، دەپ حابارلايدى "ادىرنا" ۇلتتىق پورتالى.
بۇرىنعى شەنەۋنىك ءۇش جىلعا باس بوستاندىعىنان ايىرىلدى. سوت ونى لاۋازىمدىق وكىلەتتىكتەرىن اسىرا پايدالانعانى ءۇشىن كىنالى دەپ تانىدى. قوجاعاپانوۆقا ءومىر بويى مەملەكەتتىك قىزمەتتە جۇمىس ىستەۋگە تىيىم سالىندى.
ۆيتسە-مينيستر بىلتىرعى 1 ناۋرىزدان باستاپ قاماۋدا وتىرعان. ۇكىم زاڭدى كۇشىنە ەنگەنگە دەيىنگى قاماۋدا وتكىزگەن ۋاقىتى جازا مەرزىمىنە ءبىر كۇن – ءبىر جارىم كۇن ەسەبىمەن قوسىلادى. ول جازاسىن ورتاشا قاۋىپسىزدىك دەڭگەيىندەگى قىلمىستىق-اتقارۋ جۇيەسى مەكەمەسىندە وتەيدى.
ەكىنشى ايىپتالۋشى – Success K كومپانياسىنىڭ باسشىسى ءلاززات كوككوزوۆا الاياقتىق جاساعانى ءۇشىن كىنالى دەپ تانىلىپ، بەس جىلعا باس بوستاندىعىنان ايىرىلدى.
مادەنيەت جانە سپورت ۆيتسە-ءمينيسترى ەرلان قوجاعاپانوۆتىڭ ۇستالعانى تۋرالى بىلتىر ناۋرىزدا بەلگىلى بولدى. سىبايلاس جەمقورلىققا قارسى قىزمەت ونىڭ اۋىر كوررۋپتسيالىق قىلمىس جاساعانىنىن حابارلاعان ەدى.
كەيىن انتيكور شەنەۋنىكتىڭ ۇستالۋىنا قاتىستى كەيبىر مالىمەتتەردى جاريالادى.
«ول كوممەرتسيالىق ۇيىمنىڭ مۇددەسى ءۇشىن ارەكەت ەتىپ، 2018 جىلى پەتروپاۆل قالاسىندا قازاقستان مەن رەسەي فەدەراتسياسىنىڭ XV وڭىرارالىق ىنتىماقتاستىق فورۋمى كورمەسىن ۇيىمداستىرۋ بويىنشا اتالعان كومپانيامەن كەلىسىمشارت جاساسۋعا جاناما ىقپال ەتتى»، – دەدى ۆەدومستۆونىڭ رەسمي وكىلى ارمان تىلەۋكەنوۆ.
تلەۋكەنوۆتىڭ ايتۋىنشا، فورۋمدى وتكىزۋگە ارنالعان سمەتا ەكى ەسەگە ارتتىرىلىپ، بۇل بيۋدجەت قاراجاتىنىڭ نەگىزسىز جۇمسالۋىنا الىپ كەلگەن.
2024 جىلدىڭ شىلدەسىندە سىبايلاس جەمقورلىققا قارسى ۆەدومستۆو قوجاعاپانوۆقا قاتىستى تەرگەۋ اياقتالعانىن مالىمدەدى. بۇل ىسكە قاتىستى مەملەكەتكە كەلتىرىلگەن شىعىن 1 ميلليارد تەڭگەدەن اسقان.
