بۇرىنعى سىبايلاس جەمقورلىققا قارسى كۇرەستىڭ رەسمي وكىلى سوت پەن تەرگەۋگە ىقپال جاساپ وتىر ما؟

1456
Adyrna.kz Telegram
https://adyrna.kz/content/uploads/2023/10/7fbdc810d7cd0bd3c46a3f61d576498475a3bf77-960x500.jpg?token=db95af414526e0ac6ab7f98b17c6c0df

«زاڭ مىقتىلاردى قۇتقارىپ، السىزدەردى تۇتاتىن ورمەكشىنىڭ تورى» – شەراعاڭنىڭ بۇل ءسوزى بۇگىنگى سوت جۇيەسىنە ارنالىپ ايتىلعانداي.

كوسمەتولوگ گۇلجازيرا قامىسباەۆا سوتتا بىلاي دەيدى:

«پوليتسيا بۇل ىستە قىلمىس قۇرامى جوق ەكەنىن انىقتاپ، ءىستى جاپتى. بىراق سول ءىستى قايتا تىركەپ، باسقا باپپەن ءۇش جىل تەرگەۋدە ۇستاپ وتىر. مەنىڭ ويىمشا، ارىزدانۋشى شىنار جۇمانباي مەن ونىڭ كۇيەۋى – ىقپالدى تۇلعالار ارقىلى مەنى قىلمىسكەر ەتۋگە تىرىسۋدا».

شىنار جۇمانباي – بۇرىنعى قارجى پوليتسياسىنىڭ رەسمي وكىلى مۇرات جۇمانبايدىڭ جۇبايى. 2022 جىلى قامىسباەۆا ەكەۋى ءبىر كابينەتتە جۇمىس ىستەگەن. قامىسباەۆا تاپقان تابىستىڭ 20 پايىزىن عانا الىپ، قالعانىن شىنار جۇمانبايعا Kaspi Gold ارقىلى اۋدارىپ وتىرعان. شىنار قولما-قول اقشامەن جۇمىس ىستەۋدى تالاپ ەتكەن – سالىقتى ازايتۋ ءۇشىن. كەيىن قامىسباەۆا جەكە كابينەت اشىپ، كاسىبىن جالعاستىرادى.

كوپ ۇزاماي ش. جۇمانباي «مەنىڭ كوسمەتولوگيالىق قۇرالدارىمدى ۇرلادى» دەپ ارىز تۇسىرەدى. بىراق استانا قالاسى، ەسىل اۋدانى پوليتسياسى ەشتەڭە ۇرلانباعانىن انىقتاپ، ءىستى توقتاتادى.

بىراق، ارىز قايتا جازىلىپ، ءىس قايتا قوزعالادى. تەرگەۋ زاڭسىزدىقتارعا تولى. ساراپتامالار كاسىپقويلىقتان ادا. ادۆوكات باۋىرجان ازانوۆ:

«تەرگەۋشى مەن قارجىلىق ساراپشى Kaspi Gold ارقىلى جاسالعان جەكە تۇلعالار اراسىنداعى اۋدارىمدارعا عانا سۇيەنگەن. ال Kaspi Bank بۇل وپەراتسيالار قىلمىستىق دالەل رەتىندە جارامسىز ەكەنىن رەسمي تۇردە راستاعان»، – دەيدى.

بۇگىنگى سوتتاعى جاعداي – ادام سەنگىسىز.

ادۆوكات باۋىرجانازانوۆ ونلاين قاتىسىپ وتىرعان ساتتە، سۋديا دينارا دجۋزباەۆا ونىڭ ميكروفونىن ءسوندىرىپ تاستادى. سەبەبى: ادۆوكات سۋدياعا مىنا سۇراقتى

قويعان:

«ءسىز نەگە ماتەريالدارعا تىركەلمەگەن، قايدان شىققانى بەلگىسىز، قول قويىلماعان “داپتەرلەرگە” سۇيەنىپ، سوتتالۋشىعا سۇراق قويىپ وتىرسىز؟»

جاۋاپ ورنىنا — ميكروفون ءسوندىرىلدى، ال سۋديا گ. قامىسباەۆادان وسى داپتەرلەر بويىنشا سۇراقتار قويعن.

ادۆوكاتسىز.

قۇقىقتىق نەگىزسىز.

ءىس ماتەريالىندا جوق «دالەلدەرگە» سۇيەنىپ.

سوت پروتسەسى بارىسىندا دالەل رەتىندە تىركەلمەگەن، رەسمي ساراپتاما وتپەگەن، ەشبىر زاڭدى مارتەبەسى جوق قۇجاتتار بويىنشا سوتتالۋشىنى دوپروس جاساۋ – بۇل ۋپك-ءنىڭ 113-بابىن، 24-بابىن، 70-بابىن تىكەلەي بۇزۋ.

ەڭ سوراقىسى – سۋديا دوپروستى اياقتاعاننان كەيىن تەك 1 ساعات 20 مينۋتتان سوڭ عانا جابىرلەنۋشى تاراپتىڭ وكىلى سول داپتەرلەردى ءىس ماتەريالدارىنا تىركەۋدى سۇراپ حوداتايستۆو بەردى.

بۇل جاعدايدا سۇراق كوپ:

– ەگەر دالەل ماتەريال رەتىندە رەسمي تۇردە تىركەلمەسە، سوت نەگە ونى پايدالانادى؟

– قۇقىقتارى شەكتەلگەن ادۆوكاتسىز دوپروس جۇرگىزۋ – قانداي نورماعا جاتادى؟

– سۋديا پروتسەسس بارىسىندا نەگە بەيتاراپ بولمادى؟

قازاقستان رەسپۋبليكاسىنىڭ جوعارعى سوتىنىڭ توراعاسى اسلانبەك مەرعاليەۆ مىرزا، ءسىزدىڭ نازارىڭىزدى وسى جاعدايعا اۋدارامىز. بۇل وقيعا – ءبىر عانا كاسىپكەردىڭ تاعدىرى ەمەس، بۇكىل سوت تورەلىگىنە دەگەن سەنىمگە سىن.

ايتپاقشى، تاعى ءبىر سايكەستىك:

– سۋديا دجۋزباەۆا – جامبىل وبلىسىنان.

– تەرگەۋشى – جامبىل وبلىسىنان.

– جابىرلەنۋشى جۇمانباي – جامبىل وبلىسىنان.

ارينە، ءوڭىر بىرلىگى – قىلمىس ەمەس. بىراق، قوعامدا سۇراق تۋدىرماي قويمايدى.

قولداۋلارىڭىزدى كۇتەمىز. سوت ادىلەتتى بولۋى ءتيىس. تەڭدىك پەن قۇقىقتىڭ ۇستەمدىگى – كونستيتۋتسيا كەپىلدىگى.

وڭعار قابدەن

پىكىرلەر