اقش-تىڭ مەملەكەتتىك حاتشىسى ماركو رۋبيو كونگرەسس وكىلدەر پالاتاسىنىڭ سىرتقى ىستەر كوميتەتىندە وتكەن تىڭداۋلار كەزىندە رەسەي پرەزيدەنتى ۆلاديمير ءپۋتيندى «اسكەري قىلمىسكەر» دەپ اتاۋدان تايقىپ شىقتى، دەپ حابارلايدى «ادىرنا» ءتىلشىسى.
سەناتتاعى تىڭداۋلاردا مەملەكەتتىك دەپارتامەنت شىعىندارىن قىسقارتۋ، پرەزيدەنت دونالد ترامپتىڭ شەتەلدىك ارىپتەستەرىمەن قارىم-قاتىناسى جانە ۆاشينگتوننىڭ ۋكرايناداعى قاقتىعىستى رەتتەۋگە قاتىسۋى تۋرالى ماسەلەلەر كوتەرىلدى.
تىڭداۋدىڭ ەكىنشى ساعاتىندا سەناتور بيلل كيتينگ رۋبيودان «رەسەي پرەزيدەنتىن «اسكەري قىلمىسكەر» دەپ سانايسىز با؟» دەپ سۇرادى.
«بولعان وقيعالارعا قاراپ، ولاردى اسكەري قىلمىس دەپ سيپاتتاۋعا بولادى، بىراق ءبىزدىڭ نيەتىمىز – سوعىستى اياقتاۋ. دەسە دە، ونى پۋتينمەن سويلەسپەي اياقتاي المايمىز»،— دەدى اقش-تىڭ مەملەكەتتىك حاتشىسى.
جاۋاپتان كەيىن كيتينگ رۋبيونىڭ سۇراقتان جالتارىپ، ونىڭ ۋاقىتىن الىپ جاتقانىن مالىمدەدى.
ەسكە سالايىق، 2022 جىلى رەسەي مەن ۋكراينا اراسىنداعى قاقتىعىس باستالعان كەزدە ماركو رۋبيو فلوريدا شتاتىنان سايلانعان سەناتور ءارى سەناتتىڭ بارلاۋ جونىندەگى كوميتەتى توراعاسىنىڭ ورىنباسارى بولعان ەدى. ول اقش ۋكراينانى قولداۋعا مىندەتتى ەكەنىن ايتىپ، ۆلاديمير ءپۋتيندى «اسكەري قىلمىسكەر» دەپ اتاعان. رەسەي پرەزيدەنتىنە قاتىستى بۇنداي مالىمدەمەلەردى اقش-تىڭ بۇرىنعى پرەزيدەنتى دجو بايدەن دە جاساعان.
