بۇگىن ورالدا «قازاقستاننىڭ ۇزدىك تاۋارى» وڭىرلىك كونكۋرس-كورمەسى ءوتتى. ءىس-شارا وتاندىق ءوندىرىستى دامىتۋدى ىنتالاندىرۋعا، قازاقستاندىق تاۋارلاردىڭ باسەكەگە قابىلەتتىلىگىن ارتتىرۋعا جانە جەرگىلىكتى كاسىپكەرلەردى قولداۋعا باعىتتالدى.
– وبلىستا ساپا بايقاۋلارىن ۇيىمداستىرۋ جىل سايىنعى يگى داستۇرگە اينالدى. بۇل جەرگىلىكتى تاۋار وندىرۋشىلەردىڭ الەۋەتىن ارتتىرىپ، ساپالى ءارى سۇرانىسقا يە ءونىم وندىرۋگە ىنتالاندىرادى. سونىمەن قاتار تۇتىنۋشىلاردىڭ سەنىمى مەن سۇرانىسىن قامتاماسىز ەتۋگە جول اشادى. بۇگىن ۇيىمداستىرىلعان ءىس-شارا ساپا مادەنيەتىن ارتىرۋدى كوزدەدى. بۇل جاي عانا تالاپ ەمەس. بۇل – جارقىن دا تابىستى بولاشاقتىڭ كەپىلى، – دەدى كونكۋرستىڭ سالتاناتتى اشىلۋ راسىمىنە قاتىسقان وبلىس اكىمى اپپاراتىنىڭ باسشىسى ءنۇردىلدا وراز. اپپارات باسشىسى كورمەگە قاتىسقان بارشا بيزنەس وكىلىنە تولاعاي تابىس تىلەدى. ايماقتىڭ، تۇتاس ەل ەكونوميكاسىنىڭ دامۋىنا ۇلەس قوسىپ جۇرگەندەرى ءۇشىن ولارعا العىسىن ءبىلدىردى.
قر پرەزيدەنتىنىڭ 2006 جىلعى 9 قازانداعى №194 جارلىعىنا سايكەس، «قازاقستاننىڭ ۇزدىك تاۋارى» رەسپۋبليكالىق كونكۋرس-كورمەسى جىل سايىن بولادى. بۇل كونكۋرستىڭ ءبىرىنشى كەزەڭى وڭىرلىك دەڭگەيدە وتكىزىلەدى. بيىل ۇزدىكتەردى انىقتايتىن بايقاۋدىڭ وبلىستىق كەزەڭىنە 44 تاۋار ءوندىرۋشى ءوتىنىم بەرگەن. ولاردىڭ اراسىنان ءۇش جەڭىمپاز ءۇش اتالىم بويىنشا انىقتالدى. «ازىق-تۇلىك تاۋارلارىن نەمەسە اۋىل شارۋاشىلىعى ءونىمىن شىعاراتىن ۇزدىك كاسىپورىن» اتالىمىنا «فيرما رودنيك» جشس، «تالەتسكي و.ۆ.» جك جانە«قاز-اقباس» جشس يە بولدى. ال «وندىرىستىك ماقساتتاعى ۇزدىك تاۋارلار» اتالىمىنا «ۆودەكوفيلتر» جشس، «ستەكلو-سەرۆيس» جشسجانە «ورال ساۋدا-ونەركاسىپ كومپانياسى» جشس لايىق دەپ تانىلدى. «حالىققا ارنالعان ۇزدىك تاۋارلار» اتالىمىمەن «كوندەنسات» اق، «Zhulduz» جك «ماريا حانىم ءسان ءۇيى» جانە «نۇرتانا» جشس ماراپاتتالدى. ەندى بۇل كاسىپكەرلەر رەسپۋبليكالىق بايقاۋدا باق سىنايدى.
ءىس-شارانى وبلىستىق كاسىپكەرلىك جانە يندۋستريالدىق-يننوۆاتسيالىق دامۋ باسقارماسى مەن بقو كاسىپكەرلەر پالاتاسى بىرلەسىپ ۇيىمداستىردى. باسقارما باسشىسى نۇرجان وتەپباەۆ پەن كاسىپكەرلەر پالاتاسىنىڭ ديرەكتورى ماقسات قۇلانباەۆ بايقاۋعا قاتىسۋشىلاردىڭ بارىنە العىسحاتتار مەن ىنتالاندىرۋ سىيلىقتارىنتابىستادى.
ياسيپا راباەۆا،
«ورال ءوڭىرى»
