ۇلتتىق قۇندىلىقتارىن بارىنەن جوعارى قوياتىن تۇرىكمەن حالقى وسىعان دەيىن شەتەلدىك ازاماتتارعا تۇرمىسقا شىعۋعا نيەتتى قىزدارىنا تولەنەتىن قالىڭ مالدىڭ باعاسىن كوتەرىپ ەدى. ەندى ەل باسشىلىعى ارۋلاردىڭ ادەمىلىگىن ساقتاپ قالۋ ماقساتىندا، ولارعا جۇقا كويلەك كيۋگە تىيىم سالدى. 2012 جىلدىڭ ساۋىرىنەن باستاپ بالالار كىتاپحانالارى، رەسپۋبليكالىق مۋزىكا مەكتەبى، كونسەرۆاتوريا جانە مۋزىكا ۋچيليششەسىنىڭ قىز-كەلىنشەكتەرى ۇلتتىق ويۋ-ورنەكپەن ادىپتەلگەن كويلەك قانا كيەدى. ايتالىق، كويلەك جەڭىنىڭ ۇشى الاقاننىڭ ورتاسىنا دەيىن ءتۇسىپ تۇرۋى كەرەك، ماتا ءبىر ءتۇستى جانە ۇلبىرەپ، دەنە كورىنىپ تۇرماۋى ءتيىس. بۇل نۇسقاۋعا مادەنيەت ءمينيسترى گۋنچا مامەدوۆا قول قويعان.
قىسقاسى، شيفون سەكىلدى ءمولدىر ماتادان كويلەك كيۋگە مۇلدە بولمايدى. دەنەنى اشىق-شاشىق ۇستايتىندارعا ەسكەرتۋ جاسالىپ، قاتاڭ سوگىس بەرىلەدى. ال جۇمىس بارىسىندا جەڭى ۇزىن كويلەك كيۋگە بولمايتىنىنا شاعىمدانعان مۋزىكا مەكتەبىنىڭ ۇستازدارىنا جۇمىستان شىعۋعا ءوتىنىش جازا بەرۋلەرىنە كەڭەس بەرىلگەن.
