اقش پرەزيدەنتى دونالد ترامپتىڭ تۇركيا باسشىسى رەجەپ تايىپ ەردوعانعا 9 قازاندا جولداعان حاتى جاريالاندى. حاتتىڭ كوشىرمەسىن جۋرناليست تريش رەگان ءبولىستى. كەيىن اق ءۇي بۇل حاتتى ترامپ جازعانىن راستادى.
ترامپ حاتىندا "ەگەر انكارا سيريانىڭ سولتۇستىك-شىعىسىندا اسكەري وپەراتسيا باستاسا، تۇركيا ەكونوميكاسىن جويىپ جىبەرەتىنىن" جازعان.
"ەگەر بارلىعىن دۇرىس ءارى ادامگەرشىلىككە ساي جاساساڭىزدار تاريحتا جاقسى اتتارىڭىز قالادى. بىراق ءىس ناسىرعا شاپسا، تاريحقا جاۋىز بولىپ ەنەسىزدەر. اقىماق بولماڭىزدار! كەيىن حابارلاسامىن" دەپ جازعان ترامپ.
حالىقارالىق اقپارات اگەنتتىكتەرى 9 قازاننان بەرى سيريانىڭ سولتۇستىگىنەن 150 مىڭ ادام بوسىپ كەتكەنىن حابارلادى. تۇركيا وپەراتسيا باستاعان كۇنى ترامپ اكىمشىلىگى اقش بۇل وپەراتسياعا قاتىسپايتىنىن مالىمدەپ، امەريكا اسكەرى سيريانىڭ سولتۇستىك-شىعىسىن تاستاپ كەتە باستاعان.
سيريالىق كۇردتەر – اقش-تىڭ "يسلام مەملەكەتى" تەرروريستىك توبىمەن كۇرەستە نەگىزگى سەرىكتەسى. ال تۇركيا كۇرد جاساقتارىن "تەررورلىق توپ" دەپ سانايدى.
2016 جىلى كۇردتەر سيريانىڭ سولتۇستىك ايماعىنا باقىلاۋ ورناتىپ، "رودجابا – سولتۇستىك سيريا" فەدەراتيۆتى ايماعىن قۇرعانىن جاريالاعان. كۇردتەر قۇرعان ايماققا جازيرا، كوباني جانە افرين قالالارى ەنگەن.
"ازاتتىق" راديوسى