ماسەلەن، جامبىل اۋدانى، اسا اۋىلىنىڭ تۇرعىنى دينارا بيبازاروۆا وسىدان 3 جىل بۇرىن «جۇمىسپەن قامتۋ – 2020» مەملەكەتتىك باعدارلاماسى ارقىلى «اۋىل شارۋاشىلىعىن قولداۋ قورى» اكتسيونەرلىك قوعامىنىڭ وبلىستاعى فيليالىنان 6 ميلليون تەڭگە نەسيە الىپ، ول قارجىعا 18 سيىر ساتىپ العان ەدى. ول باستاپقىدا قانداي كاسىپپەن اينالىسۋعا بولاتىنىن ابدەن زەردەلەپ، اقىرى اۋىل شارۋاشىلىعىمەن اينالىسۋعا بەل بۋعان ەكەن. دەسە دە نەسيەگە قول جەتكىزۋ وتە ۇزاق مەرزىمگە ۇلاساتىنىن، ەكىنىڭ ءبىرى مەملەكەتتىك قولداۋعا يە بولا بەرمەيتىنىن وزگەلەردەن ەستىگەندە كوڭىلى سۋ سەپكەندەي باسىلعان كورىنەدى. الايدا كاسىپپەن اينالىسۋعا دەگەن ىنتاسى ونىڭ ۇيدە بەكەرگە قاراپ وتىرۋىنا ەرىك بەرمەگەن.
– نەسيە الۋ ءۇشىن قاپتاعان قۇجات جيناۋدان شارشايتىن، ءار مەكەمەگە ءبىر سابىلىپ، ورتا جولعا كەلگەندە قولىن ءبىر-اق سىلتەپ، العان باعىتىنان كەرى شەگىنەتىن ادام مەن ەمەس. مەن وزىمە «ءوز الدىڭا ءبىر ءىستى باستاۋعا نازارىڭ اۋدى ما، ەندەشە، سول ءىستى سوڭىنا دەيىن جەتكىز» دەگەن بيىك ماقسات قويدىم. مىنە، سونىڭ ارقاسىندا قازىر ءوز ءىسىمدى دوڭگەلەتىپ وتىرمىن. وسى رەتتە مەملەكەتتىڭ كومەگىنە، اۋداندىق جۇمىسپەن قامتۋ ورتالىعىنىڭ ماماندارىنا ايتار العىسىم شەكسىز.
جالپى مال شارۋاشىلىعىمەن اينالىساتىن ادام ساتىلاتىن مالدىڭ باعاسىنا ەمەس، ونىڭ دەنى ساۋ بولۋىنا، بارعان جەرىن جەرسىنە الاتىن ارتىقشىلىعىنا قاراۋ كەرەك. شارۋاشىلىعىڭ ءسۇت باعىتىندا بولسا ءسۇتتى، ەت باعىتىندا بولسا ەتتى مال الۋعا باسىمدىق بەرىلۋى قاجەت. ويتكەنى مەن ايەل ادام بولعاندىقتان، كۇيەۋىم مەن ەنەم كۇندىز جۇمىستا جۇرگەندىكتەن، مال-جانعا قاراۋ وزىمە جۇكتەلىپ، ءىستىڭ كوزىن تابۋ وڭاي بولعان جوق. سيىردى ساتىپ العان جىلى 5-ەۋى بەلگىسىز جاعدايدا ءولىپ، ايتارلىقتاي شىعىنعا باتتىق. دەگەنمەن قالعانىن باعىپ-قاعۋ، جەمشوپ ءۇشىن تىعىرىقتان شىعۋدىڭ جولىن كۇيەۋىم ناريمان ەكەۋمىز بىرگە قاراستىردىق. شىنىن ايتقاندا، ءبىرازىن بورداقىلاپ ساتتىق. و باستاعى ماقساتىم دا ءىرى قارانىڭ باسىن ءتولى ەسەبىنەن كوبەيتۋ بولعان ەدى. الايدا ءمۇيىزدى ءىرى قارانىڭ كەيبىرىن بورداقىلاپ ساتىپ، ودان تۇسكەن قارجىنى نەسيەنى جابۋعا، ساۋىن سيىرلاردىڭ جەمشوبىن الۋعا، ساتىلعان مالدىڭ ورنىن تولتىرۋعا جۇمساۋ ارقىلى تىعىرىقتان شىقتىق. بۇگىندە سيىرلارىمنىڭ ەسەبى تۇگەل. كۇنىنە ەكى مەزگىل 5-6 سيىر ساۋامىن. ءوزىم اشقان «ايارۋ» جەكە كاسىپكەرلىگى قازىر اسا اۋىلىنا قاراستى بالاباقشالار مەن بىرقتار اۋىل تۇرعىندارىن سيىر سۇتىمەن قامتاماسىز ەتىپ وتىرعان جايى بار،– دەيدى دينارا شەرالىقىزى.
جامبىل اۋداندىق جۇمىسپەن قامتۋ ورتالىعىنىڭ ديرەكتورى اسقار جانقورازوۆ بۇرىن كاسىپتىڭ ءناسىبىن كورەم دەگەن ازاماتتارعا «جۇمىسپەن قامتۋ – 2020» باعدارلاماسى ۇلكەن دەمەۋ بولىپ كەلسە، 2017 جىلدان بەرى بۇل باعدارلامانىڭ ورنىن «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان» «ەڭبەك» مەملەكەتتىك باعدارلاماسى الماستىرعانىن ايتادى.
– بۇل باعدارلاما اۋدانىمىزدا جۇيەلى تۇردە جۇزەگە اسىرىلۋدا. ماسەلەن، شاعىن نەسيە الىپ، كاسىبىن دوڭگەلەتەمىن دەگەندەرگە قازىردە ايرىقشا قولداۋ كوپ. بيىلعى جىلدىڭ جارتىجىلدىعىنىڭ وزىندە 74 ادام شاعىن نەسيەمەن قامتاماسىز ەتىلدى. ولاردىڭ 70-ءى نەسيەگە «اۋىل شارۋاشىلىعىن قولداۋ قورى» اكتسيونەرلىك قوعامى ارقىلى قول جەتكىزسە، قالعانى «اتامەكەن– تاراز» شاعىن نەسيە ۇيىمىنان الدى، – دەيدى ا.جانقورازوۆ.
بيىل مەملەكەتتەن شاعىن نەسيە الىپ، وعان ساۋىندى سيىر ساتىپ العانداردىڭ ءبىرى – اتالعان اۋىل تۇرعىنى «شاديار» جەكە كاسىپكەرلىگىنىڭ يەسى جۇبانىش اينيازوۆ. ول دا «اۋىل شارۋاشىلىعىن قولداۋ قورى» اكتسيونەرلىك قوعامىنىڭ وبلىستاعى فيليالى ارقىلى 4 ميلليون تەڭگە الىپ، وعان 14 سيىر ساتىپ الىپتى.
– نەسيەنى 6 پايىزبەن 5 جىلعا الدىم. 14 ءمۇيىزدى ءىرى قارانىڭ بەسەۋى ساۋىن سيىر. ونى اۋىلداعى ۇيدە قولدا ۇستاپ وتىرمىن، قالعانىن ءبىر شارۋا قوجالىقپەن كەلىسىپ، اقىعا باقتىرىپ وتىرمىن. مال شارۋاشىلىعىمەن اينالىسۋىما اۋىلداستارىمنىڭ ءىسى ارقاۋ بولدى. ناقتى ايتقاندا، بۇرىننان ازىق-تۇلىك ساتاتىن دۇكەنىم بار ەدى. دۇكەنىمە ۇيىندە ءبىر-ەكى سيىر ۇستاپ وتىرعان كورشىلەرىم ساۋىپ وتىرعان سيىر ءسۇتىنىڭ وزدەرىنەن ارتىلعانىن اكەلىپ قويىپ ءجۇردى. ال ول ءسۇتتى كەلگەنىن كەلگەنىندەي تۇتىنۋشىلار تالاپ اكەتەتىن. وسى جايتتار كوز الدىمدا بولىپ جاتقان سوڭ، نەسيەگە بولسا دا سيىر الىپ، ءسۇتىن ساتۋعا بەل بۋدىم. قازىرگى تاڭدا كۇنىنە ساۋىلعان 25-30 ليتر ءسۇتتىڭ ءار ءليترىن 130 تەڭگەدەن وتكەرۋدەمىن. تابىسىمىز وزىمىزگە جەتەدى. الداعى ۋاقىتتا قوسىمشا جۇمىسشىلاردىڭ كومەگىمەن مال شارۋاشىلىعىنىڭ ءورىسىن كەڭەيتىپ، ءوز الدىنا اۋىل سىرتىنان شارۋاشىلىق اشسام دەگەن ويىم بار، – دەيدى جۇبانىش قۋانىشبايۇلى.
«ادىرنا»
ۇلتتىق پورتالى
