سانكت-پەتەربۋرگ تۇرعىنى كوروناۆيرۋس قاۋپى بويىنشا 14 كۇنگە قامالعان اۋرۋحانادان قاشىپ كەتتى، دەپ جازادى "فونتانكا". قاڭتاردىڭ اياعىندا ول قىتايدان ورالىپتى.
32 جاستاعى ايەل جۇما كۇنى وقشاۋلانعان كارانتين قوراپشاسىنان شىعىپ، فونتانكاعا «قاشىپ كەتكەنىن» ايتتى.
«مەن ەلەكتر توعىن ءۇزىپ، قۇلىپتى توقتىڭ كۇشىمەن بۇزدىم. مەن فيزماتتا تەگىن وقىماعان شىعارمىن»، - دەدى ول.
بوتكين اۋرۋحاناسىنىڭ باس دارىگەرى الەكسەي ياكوۆلەۆ "فونتانكاعا" دارىگەرلەر ايەل جايلى بيلىككە شاعىمدانعانىن ايتتى.
«ناۋقاس اۋرۋحانادان قاشقاننان كەيىن ءبىز پوليتسياعا جەدەلحات جولدادىق. ەندى ول رەسەي فەدەراتسياسىنىڭ قولدانىستاعى زاڭناماسىن جانە وعان بەرىلگەن ءتارتىپتى بۇزعانى ءۇشىن پوليتسياعا جاۋاپ بەرەدى»، - دەپ ءتۇسىندىردى ول.
روسپوترەبنادزور 14 كۇندىك كارانتيندە ەمدەلۋگە گوسپيتاليزاتسيالاۋ تۋرالى شەشىم قابىلداعان بولاتىن.
«اۋرۋحانا پاتسيەنتتەردى كۇشتەپ ۇستاۋعا قۇقىلى ەمەس. دەمەك، اۋرۋحانادا كەز-كەلگەن نارسەنى بۇزۋ - بۇل بۇزاقىلىق دەپ سانايمىن. بۇل شەكتەۋدى باس سانيتارلىق دارىگەر اسا قاۋىپتى اۋرۋلاردىڭ تارالۋ قاۋپى تۋىنداعان جاعدايدا ەنگىزۋگە قۇقىلى»، - دەدى ياكوۆلەۆ.
«كەيبىر جاعدايلاردا، ەگەر بۇل باسقالارعا زارداپ اكەلسە، قىلمىستىق جاۋاپكەرشىلىك الىنىپ تاستالمايدى»، - دەپ تولىقتىردى باس دارىگەر.
«بۇل ءۇشىن ادام اكىمشىلىك جاۋاپكەرشىلىككە تارتىلۋى مۇمكىن. ماسەلە اسقىنعان جاعدايدا ناۋقاستى قابىلداعان دارىگەر جاۋاپ بەرەدى»، - دەدى «ينتەرفاكس» اگەنتتىگىنە سانكت-پەتەربۋرگتەگى تۇتىنۋشىلاردىڭ قۇقىقتارىن قورعاۋ جانە ادامنىڭ ءال-اۋقاتىن باقىلاۋ فەدەرالدى قىزمەتىنىڭ قىزمەتكەرى يرينا چحينەريا.
"ادىرنا" ۇلتتىق پورتالى
