شىعىس قازاقستان وبلىسىنىڭ اكىمدىگى زايسان اۋدانىندا كوروناۆيرۋس جۇقتىرعان قىتاي ازاماتتارى جاتقىزىلادى دەگەن اقپاراتتىڭ شىندىققا سايكەس كەلمەيتىنىن ايتتى، دەپ حابارلايدى قازاقپارات.
كەشەلى بەرى الەۋمەتتىك جەلىلەردە «كوروناۆيرۋس جۇقتىرعان قىتاي ازاماتتارى زايسان اۋدانىنا جەتكىزىلىپ، جەرگىلىكتى اۋرۋحاناعا جاتقىزىلادى» دەگەن سىڭايداعى اقپاراتتار تاراپ كەتكەن. وسىنى ەستىپ ۇرەيلەنگەن سارتەرەك جانە اينابۇلاق اۋىلىنىڭ تۇرعىندارى توپ بولىپ كوشەگە شىعىپ، سونداعى اۋرۋحانالاردىڭ الدىنا جينالدى. ولار شەكارانىڭ جابىلۋىن تالاپ ەتكەن.
«وبلىس اكىمى دانيال احمەتوۆ جۇرتتى تىنىشتاندىرۋ ءۇشىن زايسانعا كەلدى. وڭىرىمىزگە ناۋقاس ادامدار اكەلىنەدى دەگەن اقپارات جالعان. شىندىققا سايكەس كەلمەيمىن مالىمەتتەردى تاراتقاندار قىلمىستىق جاۋاپقا تارتىلاتىنىن ەسكە سالامىز»، - دەيدى وبلىس اكىمىنىڭ ءباسپاسوز قىزمەتى.
19 اقپان كۇنى ايماق باسشىسى دانيال احمەتوۆ حالىق الدىندا ەسەپ بەرۋ كەزدەسۋىندە شەكارالاس اۋىل تۇرعىندارىن كوروناۆيرۋستان ۇرەيلەنبەۋگە شاقىرعان ەدى.
«قازاقستاندا ينفەكتسيا جۇقتىرعان ەشكىم جوق. 17 اقپاننان باستاپ قىتايدان كەلگەن ءاربىر ازامات 2 اپتاعا وبسەرۆاتسيالىق باقىلاۋعا جاتقىزىلادى. وبلىستىڭ مەديتسينالىق مەكەمەلەرىندە كوروناۆيرۋسقا قارسى پرەپاراتتار قورى جەتكىلىكتى. سوندىقتان بارشاڭىزدى ۇرەيلەنبەۋگە شاقىرامىن. جاعداي باقىلاۋدا»، - دەدى دانيال كەنجەتايۇلى.
