يراننىڭ دەنساۋلىق ساقتاۋ ۆيتسە-ءمينيسترى مەن دەپۋتاتتان كوروناۆيرۋس تابىلدى. 25 اقپاندا ەكەۋى جەكە مالىمدەمە جاسادى. بۇل جايىندا azattyq حابارلادى.
دەنساۋلىق ساقتاۋ ۆيتسە-ءمينيسترى يرادج حاريرچي تەگەرانداعى ۆيدەوكونفەرەنتسيا كەزىندە جوتەلىپ، بەتىن ءسۇرتتى.
"تۇندە دەنە قىزۋىم كوتەرىلىپ، ءتۇن جارىمىندا جۇرگىزىلگەن سىناقتىڭ الدىن الا قورىتىندىسى ۆيرۋس جۇققانىن راستادى. مەنى كوپشىلىكتەن الشاقتاتتى. بىرنەشە مينۋت بۇرىن سىناقتىڭ تۇپكىلىكتى قورىتىندىسى شىقتى. ءدارى قابىلداي باستادىم" دەدى ول.
دەپۋتات ماحمۋد سادەحي Twitter اككاۋنتىندا "كوروناۆيرۋس بويىنشا تاپسىرعان سىناق ۆيرۋس بارىن كورسەتتى...ءارى قاراي ءومىر سۇرەم دەپ ايتا المايمىن" دەپ جازدى. ول سونىمەن بىرگە يران بيلىگىن تۇرمەدەن ساياسي تۇتقىنداردى بوساتۋعا شاقىرىپ، ۆيرۋس تاراپ جاتقان شاقتا ولاردىڭ وتباسىمەن بىرگە بولۋى قاجەت ەكەنىن ايتتى.
وتكەن جىلى سادەحي ۇكىمەتتى ەپيدەمياعا قاجەتتى دارەجەدە نازار اۋدارىپ وتىرعان جوق دەپ سىناعان. ول بيلىكتى اقيقاتتى جاسىرماي ايتىپ، قوعام سەنىمىنە قول جەتكىزۋگە شاقىرعان.
رەسمي دەرەك بويىنشا، يراندا كوروناۆيرۋستان 16 ادام كوز جۇمعان، 95 ادامنان ۆيرۋس تابىلعان. كوپتەگەن ادامدار تەگەران ستاتيستيكانى تومەندەتىپ كورسەتىپ وتىر دەپ سانايدى.
دەنساۋلىق ساقتاۋ سالاسى ساراپشىلارى يران، يتاليا جانە وڭتۇستىك كورەيادا ۆيرۋستى جۇقتىرعاندار مەن كوز جۇمعاندار سانىنىڭ كۇرت ارتۋىنا الاڭداپ وتىر. جالپى الەم بويىنشا ۆيرۋستى جۇقتىرعاندار سانى 80 مىڭنان استى، شامامەن 2700 ادام قايتىس بولعان، ولاردىڭ باسىم بولىگى قىتايدا تىركەلگەن.
(سۋرەتتە: يراننىڭ دەنساۋلىق ساقتاۋ ۆيتسە-ءمينيسترى يرادج حاريرچي (وڭ جاقتا) جانە دەپۋتات ماحمۋد سادەحي).
