ءال-فارابي اتىنداعى قازۇۋ-دىڭ شىعىستانۋ فاكۋلتەتىنە قاراستى تۇركسوي كافەدراسى، نيدەرلاندى پروفەسسورى، تۇركى ەسكەرتكىشتەرى جانە تۇركى تاريحي فونولوگياسىنىڭ مامانى بىلگە وزەلمەن، التاي رەسپۋبليكاسىنان ارنايى شاقىرىلعان ىرىستۋ مەچەشەۆ، التىن-اي باراتوۆا ەسىمدى ونەرپازدارمەن كەزدەسۋ ۇيىمداستىردى.
جاقىندا عانا كافەدرا تىزگىنىن ۇستاعان ف.ع.د. ەردەن قاجىبەك «بۇل شارانى ۇيىمداستىرۋداعى ماقساتىمىز – «تۇركىلىك تاريحىمىز بەن مادەنيەتىمىزدى زەردەلەپ، تانىپ، التاي ەلىنىڭ ونەرپازدارىمەن رۋحاني بايلانىستى جانداندىرۋ، تۇركى دۇنيەسىنىڭ مادەنيەتىن قازاق جۇرتىنا ناسيحاتتاۋ» – دەي كەلە، قوناقتاردى قىسقاشا تانىستىردى. ودان ءارى ءسوز العان ءتۇبى تۇركى گوللاند ازاماتى بىلگە وزەل ءوزى سۋرەتكە تۇسىرگەن تاڭبالى تاستار مەن بىتىك تاستار بويىنشا سلايد-شوۋ ۇلگىسىندە بايانداما جاسادى. بىلگە راسىندا بىلگىر ەكەن. كوپتەگەن جىلدار بويى التاي رەسپۋبليكاسىندا زەرتتەۋ جۇمىستارىن جۇرگىزگەن ول، مىڭداعان جادىگەر مەن رۋحاني مۇرالارىمىزدى تاۋىپ، ونى جۇرتشىلىققا جاريالاپ كەلەدى. كونە تۇرىك تاريحىنا قاتىستى تاڭبالى تاستار مەن جازۋلاردى ورىس پەن باتىس عالىمدارىنىڭ ەمەس، تۇركىلىك زەرتتەۋ تۇرعىسىنان قاراۋدى ءجون سانايدى. ول تاستاعى سۋرەتتەرگە جان-جاقتى سيپاتتاما بەردى.
ىرىستۋ مەن التىن-اي توپشۋر دەپ اتالاتىن ۇلتتىق اسپابىنىڭ سۇيەمەلدەۋىمەن «قوجاڭ»، «قۇلىن»، «كۇلەر حان»، «ءبول-ءبول»، «مااداي قارا»، «جىلقى» سەكىلدى شىعارمالاردى ورىندادى. باتىرلار جىرى ۇلگىسىندەگى اۋەندەرى تىڭدارماندار دەلەبەسىن قوزدىرىپ، رۋحىن اسپانداتتى. 210 مىڭعا جۋىقتاعان التايلىقتار اراسىنان سۋىرىلىپ شىققان ونەر مايتالماندارىنا شىنايى ىقىلاسپەن سوعىلعان شاپالاق ولارعا شابىت سىيلادى.
بۇدان ءارى شاراعا قاتىسۋشىلار كەزەكپەن ءسوز سويلەپ، قوناقتارعا العىس بىلدىرۋمەن قاتار، بىرقاتار ۇسىنىس-پىكىرلەرىن ايتتى. ىرىستۋ مەن التىن-اي سەكىلدى دارىندارمەن بىرلەسە جۇمىس جاساپ، تامىرلاس ەلدىڭ سالت-داستۇرلەرى مەن تاريحىن زەرتتەۋ، عىلىمي كىتاپتارىن شىعارىپ، جالپى ءارتۇرلى رۋحاني سالا بويىنشا ورتاق جوبالار جاساۋ ماسەلەسى ءسوز بولدى.
