ارىستانبەك مۇحامەديۇلىنىڭ دوسى كوروناۆيرۋس جۇقتىرعان

2940
Adyrna.kz Telegram

قر ۇلتتىق مۋزەيىنىڭ ديرەكتورى ارىستانبەك مۇحامەديۇلى جاقىن ارالاساتىن دوسى يسپانيانىڭ اتاقتى وپەرا ءانشىسى پلاسيدو دومينگونىڭ كوروناۆيرۋس جۇقتىرعانىن ايتتى، دەپ جازادى baq.kz.

دوستارىم، ءبىز قازىر كورونوۆيرۋس ىندەتىنە بايلانىستى كارانتيندە وتىرمىز. ەلىمىزدىڭ دوسى سانالاتىن داڭقتى ءانشى پلاسيدو دومينگونىڭ دا وسى دەرتكە ۇشىراعانىن بىلەسىزدەر. ەكەۋىمىزدى جاي عانا دوستار ەمەس، 2017 جىلى وتكىزگەن الەمدىك وپەرا ونەرىندەگى ەڭ مارتەبەلى ءارى بەدەلدى بايقاۋ سانالاتىن بۇكىلالەمدىك "پلاسيدو دومينگو وپەرالياسى" اتتى ماڭىزدى جوبا دا بايلانىستىرىپ تۇر. ونىڭ ارقاسىندا سول كەزدە ەلىمىزگە "وپەراليانىڭ" قازىلار القاسىنىڭ قۇرامىنا كىرگەن ەڭ ىقپالدى ءارى بەدەلدى ونەر قايراتكەرلەرى كەلدى. ال مەتر پلاسيدو دومينگو زور سەنىم ءبىلدىرىپ، بايقاۋعا جۇبايىن، بالالارى مەن نەمەرەلەرىن ەرتىپ اكەلدى، - دەيدى ارىستانبەك مۇحامەديۇلى.

ونىڭ ايتۋىنشا، سول كەزدە بۇل بايقاۋدى وتكىزۋگە بيۋدجەتتەن شىعىن شىقپاعان. بايقاۋدى وتكىزۋدىڭ قارجىلاي قامتاماسىز ەتۋ ماسەلەسىن "وپەراليانىڭ" دەمەۋشىسى – شۆەيتساريالىق ساعات كومپانياسى Rolex ءوزى كوتەرگەن.

ەگەر بۇرىن قازاقستان ءارتۇرلى حالىقارالىق شارالار وتكىزۋ ءۇشىن ەلەۋلى دەڭگەيدە قارجىلاي قاراجات بولەتىن بولسا، بۇل جولى ءبىز العاش رەت الەمدىك دەڭگەيدەگى كەرەمەت بايقاۋلاردىڭ ءبىرىنىڭ وتكىزىلۋىن ۇيىمداستىرىپ قانا قويماي، ايتارلىقتاي دەڭگەيدە شەتەلدەن قاراجات تا تارتا الدىق. ۆوكالدى بايقاۋ ەلىمىزدىڭ حالىقارالىق ارەنادا جاعىمدى بەدەلىن قالىپتاستىرۋعا دا مول مۇمكىندىكتەر بەردى. الەمنىڭ جەتەكشى وپەرا تەاترلارىمەن ىنتىماقتاستىق جاساي وتىرىپ ءبىز شوعىرلانعان مادەني ءۇردىستىڭ بولىگىنە اينالدىق. قازاقستاندا بەدەلدى "پلاسيدو دومينگو وپەرالياسى" ۆوكالدى بايقاۋىن وتكىزۋ – بۇل بيىك ونەر سالاسىنداعى ەلىمىزدىڭ جەتىستىكتەرىنە كورسەتىلگەن قۇرمەت، - دەيدى ۇلتتىق مۋزەيدىڭ ديرەكتورى.

ماەسترو پلاسيدو دومينگو بۇگىندە دە قازاقستاندىق وپەرا جۇلدىزدارىنا عانا ەمەس، سول سياقتى بالەت ارتيستەرىنە دە قولداۋ كورسەتىپ وتىر ەكەن.

2018 جىلى "استانا وپەرانىڭ" بالەت توبى ءانشىنىڭ وتانى ۆالەنسياداعى سوفيا حانشايىمنىڭ ونەر سارايىنىڭ ساحناسىندا ءوزىنىڭ شاقىرۋىمەن زور تابىسپەن ونەر كورسەتكەن.

ەكس-مادەنيەت ءمينيسترى وپەرا ءانشىسى پلاسيدو دومينگو مەن جارى مارتا دومينگونىڭ ۇيلەنۋلەرىنە بايلانىستى مەرەي تويعا قالاي شاقىرىلعان قوناق بولعانىنىن دا ەسكە ءتۇسىردى.

وسى تاماشا مەرەكە وتباسىنىڭ ورتاسىندا شىن ىقىلاستى جاعدايدا وتكەن ەدى. مەن الەمدىك وپەرا ونەرىنىڭ مەترىنە سىيلىق رەتىندە ءوزىمىزدىڭ قازاقتىڭ شاپانىن بار ىقىلاسىممەن يىعىنا جاپقان كەزدە، ول ونى سۇيسىنە قابىلداعان ەدى. ماەسترو ءبىزدىڭ بابالار ءداستۇرىن عاسىرلار قويناۋىنان الىپ شىعىپ ساقتاپ وتىرعانىمىزعا ءتانتى بولدى. انشىگە ءبىزدىڭ ەجەلگى ءداستۇرىمىز قاتتى ۇناپ، وعان زور قۇرمەتپەن قارادى. سول كەشتە پلاسيدو مەن مارتا دومينگونى ۇلكەن ۇلى حوسە دومينگو جۇبايى ماريلۋ دومينگو مەن قىزى نيكولمەن جانە كىشى ۇلى الۆارو دومينگو ۇلدارى پلاسيدو جانە الۆارومەن قۇتتىقتاۋعا كەلدى. وسى ۇلكەن تاتۋ وتباسىنىڭ بارلىق مۇشەلەرىنە قازاق ۇلتتىق تاعامدارى قاتتى ۇنادى. ماەسترونىڭ ءوزى قازاقستان، ەلوردامىز تۋرالى، ەڭ باستىسى ءبىزدىڭ ادامدار تۋرالى سۇيىنە ماداقتادى! قازاق حالقىنىڭ قوناقجايلىلىعى مەن اق پەيىلدىلىگى پلاسيدو دومينگونى تەبىرەنتىپ جىبەردى. وز اتىمنان جانە پلاسيدو دومينگونىڭ شىعارماشىلىعىنىڭ بارلىق قازاقستاندىق باس يۋشىلەرى اتىنان وعان زور دەنساۋلىق جانە تەزىرەك ساۋىعىپ كەتۋىن تىلەيمىن! ءبىزدىڭ دوستىعىمىز بەن ىنتىماقتاستىعىمىز ءسوزسىز جالعاسىن تابادى. تەزىرەك ساۋىعىپ كەتىڭىز، - دەيدى ارىستانبەك مۇحامەديۇلى.

پىكىرلەر