مەركى اۋداندىق اۋرۋحاناسىندا بولعان جاعداي مينيسترگە جەتتى
جامبىل وبلىسىندا «ديپلوممەن اۋىلعا» باعدارلاماسىمەن اۋدان ورتالىعىنا كەلگەن جاس دارىگەرلەر جۇمىستان كەتۋگە ءماجبۇر. كوروناۆيرۋسپەن كۇرەسىپ جاتقان ولار مەركى اۋداندىق ورتالىق اۋرۋحاناسىن باسقارىپ وتىرعان اپالى-ءسىڭلىلى تۋىسقاندار تاراپىنان قىسىم كورىپ وتىرعاندارىن ايتادى. 84 مىڭ حالىقتىڭ دەنساۋلىعىنا جاۋاپتى اۋرۋحانا قىزمەتكەرلەرى تيىستى جابدىقتار بەرىلمەگەندىكتەن، ماسكانى دا وزدەرى تىگەدى دەپ حابارلايدى Azattyq Rýhy.
اۋداندا ءبىر دارىگەر كوروناۆيرۋس جۇقتىردى
بۇعان دەيىن دارىگەر-ينفەكتسيونيست تولقىناي ورداباەۆا ءوزىنىڭ كوروناۆيرۋس جۇقتىرۋىنا مەركى اۋداندىق اۋرۋحاناسىنىڭ باسشىلارىن ايىپتاعان ەدى. ءۇش كۇننەن بەرى كوروناۆيرۋس ىندەتىمەن كۇرەسىپ جاتقان تولقىناي مەكەمە باسشىلىعىنىڭ نەمقۇرايلىعىنان دەرتكە شالدىقتىم دەپ وتىر.
«ىستىعىم 39-40 گرادۋسقا دەيىن كوتەرىلگەن ەدى. قازىر ءتۇستى. بىراق كوروناۆيرۋسقا قارسى ءىشىپ جاتقان دارىلەر وتە اۋىر بولعاندىقتان، ازقازانىم دا اۋىرىپ جاتىر. تاماعى جاقسى، بىراق بولمە اڭىراپ تۇر، تەرەزەدەن سۋىق سوعادى. ەكى ادام جاتىرمىز. ماعان قاۋىپتى كەسەل كارانتيندە جاتقان ناۋقاستاردان جۇققان.
ورتالىق اۋرۋحانا اكىمشىلىگى قىسىم كورسەتىپ، مەديتسينالىق بەتپەردەنى وزىمىزگە تىكتىردى. اۋرۋلارمەن تىكەلەي جۇمىس ىستەسەك تە قاجەتتى قورعانۋ قۇرالى بەرىلمەدى. اۋىرىپ تۇرعاننىڭ وزىندە، جۇمىستان بوساتقىلارى كەلمەدى. ويتكەنى، وزگە ينفەكتسيونيست ۆيرۋس جۇقتىرۋدان قورقىپ، كەلمەدى»، - دەيدى تارازداعى ينفەكتسيالىق ستاتسيوناردا كورونوۆيرۋستان ەمدەلىپ جاتقان تولقىناي ورداباەۆا.
اۋرۋحانا باسشىلىعى اپالى-ءسىڭلىلى تۋىسقاندار
مينيستر بىرتانوۆقا دەيىن شاعىمدانعان دارىگەر-ينفەكتسيونيست كارانتيندەگى ناۋقاستارعا قوسىمشا تەكسەرىس جاسالماي، ۇيلەرىنە جىبەرىلگەنىن ايتادى. ونىڭ سوزىنشە، ايماقتا ۆيرۋسپەن كۇرەسىپ جاتقان دارىگەرلەرگە مۇلدەم جاعداي جاسالماعان. مەركى اۋداندىق ورتالىق اۋرحاناسىن اپالى-ءسىڭلىلى تۋىسقاندار باسقارادى.
«ءبىزدىڭ اۋداندىق اۋرۋحانانىڭ باس دارىگەرى مەديتسينا سالاسىنا ەش قاتىسى جوق، ەكونوميست دانيار نۇسىپباەۆ دەگەن 1988 جىلعى جاس جىگىت. مەديتسينانى مۇلدەم تۇسىنبەيدى. ال بۇكىل ءىستى جۇرگىزىپ، اۋرۋحانانى باسقاراتىن - جاڭىل شويبەكوۆا. شويبەكوۆانىڭ تۋعان ءسىڭلىسى اۋرۋحانانىڭ باس بۋحگالتەرى. بۇل ەكەۋى دە جامبىل وبلىسى قوعامدىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆتىڭ تۋعان بالدىزدارى. سوندىقتان ويلارىنا كەلگەندەرىن ىستەپ وتىر. جۇمىستان شىعارۋ، جۇمىسقا الۋ، اقشا الۋ قالىپتى جاعداي»، - دەيدى ت. ورداباەۆا.
تارازدا ەمدەلىپ جاتقان تولقىناي مەركى اۋداندىق ورتالىق اۋرۋحاناسىنا وسىدان ەكى جىل بۇرىن جاس مامان رەتىندە كەلگەن. دارىگەر-ينفەكتسيونيست كوروناۆيرۋسپەن اۋىرىپ جاتسا، باسشىلار قولداۋ كورسەتۋدىڭ ورنىنا، مالىمدەمەدەن كەيىن قۋدالاۋدى باستاعانىن ايتادى. ونىڭ كابينەتىنە ءتىنتۋ جۇرگىزىپ، جۇزدەگەن مەديتسينالىق ماسكا، قولعاپ، تاعى باسقا دا قورعانىش قۇرالدارىن تاپقان. ءسويتىپ، كوروناۆيرۋسقا قارسى قورعانىش قۇرالدارى بەرىلمەدى دەگەن مالىمدەمەنى جوققا شىعارعان.
بۇعان دەيىن 8 جاس مامان كەتىپ قالعان
تولقىنايدىڭ سوزدەرىن باسقا دا ارىپتەستەرى راستاپ وتىر. قالامقاس تورەقۇلدىڭ سوزىنشە، اۋرۋحانادا باسقا دا زاڭعا قايشى ارەكەتتەر بولعان.
«تولقىنايدىڭ كابينەتىن ءتىنتىپ، بالەن دۇنيە تاپتىق دەپ جاتىر. پوليتسيانى ەرتىپ الىپتى. اۋرۋحانادا كامەرالار جوق. كىمنىڭ نە اكەلىپ تاستاعانىن دالەلدەي المايسىڭ. وسىنداعى ستوماتولوگ، حيرۋرگ، ونكولوگ بىرنەشە دارىگەر بارىپ، بۇلارىڭ ۇيات، تولقىنايدىڭ كابينەتىنە كۇندە كىرەمىز، مۇنداي زاتتار بولماعان دەپ ايتىپ كەتتىك. ءۇن جوق. ماعان قارسى دا ارام ارەكەتتەر ۇيىمداستىرىلدى. بىلىقتارىن بەتتەرىنە ايتقاندا، مەنىڭ ۇستىمنەن تۇرعىندار ارقىلى ارىز جيناعان. وبلىستا «كرىشامىز» بار، نە ىستەي الاسىڭدار دەپ ايتادى»، - دەدى اتالعان اۋرۋحانانىڭ تاعى ءبىر دارىگەرى قالامقاس تورەقۇل.
سۋرەتتە: مەركى اۋداندىق اۋرۋحاناسى
27 جاستاعى جاس مامان قالامقاس وزىنە ءبولىم مەڭگەرۋشىسى گۇلميرا ماناقباەۆا، جاڭىل شويبەكوۆا جانە ىشكى اۋديت جەتەكشىسى سماعۇل سەركەبايۇلى قىسىم كورسەتكەنىن ايتادى. ول قاجەتتى قورعانىش قۇرالدارى قىزمەتكەرلەرگە شىنىمەن بەرىلگەن جوق دەپ وتىر. سوندىقتان، باسقا ارىپتەستەرى سەكىلدى قالامقاس تا وزىنە ماسكا تىگىپ العان.
«زاڭسىزدىقتى ايتقاندا كەلىسىمگە كەلەيىك دەدى شويبەكوۆا. ءار جازبا ساقتاۋلى مەندە. ءالى سترەسپەن ءجۇرمىز. باستىقتار «شۋ باسىلسىن، بىرىڭنەن كەيىن ءبىرىڭنىڭ كوزدەرىڭە كوك شىبىن ۇيمەلەتەمىز» دەپ قورقىتىپ جاتىر. وسى جەردەن قالاي دا كەتكىم كەلەدى. بۇعان دەيىن 8 جاس مامان كەتىپ قالدى. ديپلوممەن اۋىلعا دەپ بەرگەن مەملەكەتتىڭ اقشاسىن دا قايتارىپ، كەتىپ قالعىمىز كەلەدى.
ەكى جىلدان بەرى بۇلاردىڭ بىلىقتارىنا شىداپ كەلەمىز. تىركەۋدەگى تۇرعىنداردىڭ دەنساۋلىعىنا دەپ ميلليونداپ اقشا بولىنەدى. ۋچاسكەلىك دارىگەر، مەدبيكەلەردىڭ شوتىنا ارتىق اقشا اۋدارادى. دارىگەرلەردەن 70-80 مىڭ، كىشى قىزمەتكەرلەردەن 30-40 مىڭ تەڭگەنى قايتادان وزدەرىنىڭ كابينەتتەرىنە الدىرتادى.
مەكتەپ ديرەكتورلارى دەيسىز بە، باستىقتارعا جۇمىسقا جارامسىزدىق پاراعىن اشتىرتادى. «ناۋقاستار» كەلمەسە دە ولاردىڭ جسن-ءىن جىبەرەدى دە، اش دەيدى. مىنە، مەندە سكرينشوتى دا بار توپقا جىبەرگەن. ونداي وتىرىك پاراق ءبىلىنىپ قالسا كەيىن كىم جاۋاپ بەرەدى؟ باس دارىگەر اناۋ قىزمەتتىك كولىگىنىڭ ءنومىرىن 088 دەپ تۋعان جىلىمەن بىردەي ەتىپ جاساتىپ، ايەلىن تاسىپ، دۇكەن ارالاپ ءجۇر»، - دەدى زاڭسىزدىقتاردى جىپكە تىزگەن دارىگەر قالامقاس تورەقۇل.
سۋرەتتە: مەركى اۋداندىق اۋرۋحاناسىڭ باس دارىگەرى دانيار نۇسىپباەۆتىڭ قىزمەتتىك كولىگى
«ديناستيامىزبەن دارىگەرمىز» - ايىپتالۋشى شويبەكوۆا
ال مەركى اۋداندىق اۋرحاناسى باس دارىگەرىنىڭ ورىنباسارى جاڭىل شويبەكوۆا ءوزىنىڭ وبلىستىق دەنساۋلىق باسقارماسى باسشىسىمەن جاقىندىعى بار ەكەنىن جاسىرماي، ءسىڭلىسى زاميرا مۇقانوۆانىڭ دا وسى اۋرۋحانادا باس ەسەپشى ەكەنىن راستادى.
«ولاردىڭ ايتقاندارى شىندىققا جاناسپايدى. تولقىناي كەلگەن سايىن ءوزى قولدانسىن دەپ قورعانىش قۇرالدارى بەرىلەدى مەدبيكەسى ەكەۋىنە. ول ينفەكتسيالىق اۋرۋلاردى قارايدى. سوندىقتان ۇنەمى قورعانىش كوستيۋمدەرى بەرىلىپ تۇرادى. ول ءبارىن ءوزىنىڭ ويىنان شىعارىپ جاتىر. وزدەرى سونداي ادامدار، ارىزدى جازا بەرەدى جان-جاققا. جۇمىسىمىزعا بوگەت جاساپ وتىر. ءسىڭىلىم 20 جىلدان بەرى وسىندا، قازىر باس بۋحگالتەر. وبلىستىق باسقارماداعى كۇيەۋ بالام دا ۋنيۆەرسيتەت بىتىرگەلى وسى مەديتسينا سالاسىندا. ديناستيا بولىپ جۇمىس ىستەيتىن وتباسىلار بار عوي»، - دەدى مەديتسينا سالاسىندا ءوزىنىڭ 34 جىلدىق تاجىريبەسى بار ەكەنىن ەسكەرتكەن جاڭىل بەيسەنقىزى.
«مەن ەكونوميسپىن» - باس دارىگەر
مەركى اۋداندىق ورتالىق اۋرۋحاناسىندا 126 دارىگەر مەن ورتا دارەجەلى 411 قىزمەتكەر جۇمىس ىستەيدى. ولار اۋدانداعى 84 مىڭ حالىقتىڭ دەنساۋلىعىنا جاۋاپتى. ءوزارا تارتىس تولاستاماي تۇرعان اۋرۋحانانىڭ باس دارىگەرى قازىر كوميسيسيا كەلىپ، تەكسەرۋدى باستاپ كەتكەنىن ايتتى.
«باس دارىگەردىڭ مىندەتىن اتقارۋشى بولىپ وتىرعانىما 6 ايداي بولدى. مەن ەكونوميسپىن. شويبەكوۆا - مەنىڭ ورىنباسارىم. ال ونىڭ ءسىڭىلىسى مۇقانوۆا - باس بۋحگالتەر. قاجەتتى قورعانىش قۇرالدارى بار. باسقا ەشتەڭە ايتا المايمىن»، - دەدى مەركى اۋدانى ورتالىق اۋرۋحاناسى باس دارىگەرىنىڭ مىندەتىن اتقارۋشى دانيار نۇسىپباەۆ.
دارىگەرلەر ءىستى پروكۋراتۋرا تەكسەرۋى كەرەك دەپ سانايدى. ويتكەنى، باسشىلىققا قارسى شىققان جاس دارىگەرلەر وبلىستان كەلە بەرەتىن كوميسسياعا دا، ىشكى اۋديتكە دە سەنبەيدى.
«ماعان دا، جانىمداعى حيرۋرگكە دە ىندەتكە قارسى كوستيۋمدەر بەرگەن جوق. جۇقتىرۋ قاۋپى بىزدە دە جوعارى. ءبىر ايعا جەتكىزىڭدەر دەپ، ەكى ساعاتقا قانا جارايتىن ماسكادان ۇشەۋ بەردى. امالسىز تانىس ىزدەپ، ماسكا تىگۋشىلەردەن ساتىپ الۋعا تۋرا كەلدى. ارىپتەسىمىز جۇمىستا ءجۇرىپ، كوروناۆيرۋس جۇقتىردى. ونسىز دا سترەسس العان ادامدى كەرىسىنشە، قولداۋ كەرەك، قۋدالاماي. وتباسىمەن باسقارىپ وتىر دەگەندى جاۋاپتى ورگاندار باعالاپ، شەشىم شىعارۋى ءتيىس»،- دەدى اتالعان اۋرۋحانانىڭ دارىگەر-تراۆماتولوگى حامزا سەليموۆ.
دەنساۋلىق ساقتاۋ مينيسترلىگىنىڭ ءباسپاسوز حاتشىسى دياس احمەتشارىپتىڭ سوزىنشە، ءىس ءمينيستردىڭ تىكەلەي باقىلاۋىندا. تەكسەرىس قورتىندىسى كەيىن جاريالانادى.
ءامىربولات قۇسايىنۇلى، الماتى
