ارمان اۋباكىر: سسسر-دى "ۇلى وتان" دەپ اسپەتتەۋدى قاشان قويار ەكەنبىز؟

وسى كۇنى باق-تا، اكىم-قارالاردىڭ باياندامالارىندا "ۇلى وتان سوعىسى" دەپ ءسوز ساپتاۋشىلاردى ءجيى بايقايتىن بولدىق. ءتىپتى "اسپان استى ەلى" دەپ قىتايدىڭ الدىندا ءوزىمىزدى بودان سەزىندىرەتىن ءسوز تىركەسىن قويدىرا الماي جۇرگەندە "ۇلى وتان" دەگەن سسسر-دىڭ تار قامىتى موينىمىزدى قىسپاي ما ەكەن، ءا؟ تاۋەلسىز ەل دەگەن اتىمىز راس بولسا، جەڭىستىڭ 75 جىلدىعىن "ۇلى وتان سوعىسى" دەپ اسپەتتەۋدەن ارىلاتىن ۋاقىت كەلگەن جوق پا؟ ۋىسىنان شىعارىپ العاننان سوڭ-اق قايتا اڭسارى اۋعان، ءتىپتى ۇيىقتاسا تۇسىنە كىرەر رەسەيدىڭ كەڭەس ۇكىمەتىن، الاش ارىستارىن قان قاقساتقان قىزىل يمپەريانى كوكسەۋ ەمەس پە؟ II دۇنيەجۇزىلىك سوعىس دەسەك، بىرەۋ ءبىزدىڭ ات-توڭىمىزدى شەشىپ الادى ما؟ ەگەر ءبىز كەڭەس ۇكىمەتىن "ۇلى وتان" دەپ اسىرە اسپەتتەۋدى قويماساق، ازاتتىقتى اڭساعان الاش ارىستارى نە ءۇشىن قۇربان بولدى؟ ءبارى بەكەر مە؟
جاس ۇرپاق ورىسشىل دا، قىتايشىل دا، ارابشىل دا، تۇرىكشىل دە (انادولى) ەمەس، الاش مۇددەسىن بارىنەن جوعارى قويا بىلسە ەكەن دەپ تىلەيمىن.