بۇگىن 21 مامىر كۇنى حالىقارالىق تۇركى اكادەمياسى ءوزىنىڭ 10 جىلدىعى قارساڭىندا تۇركى الەمنىڭ تۇعىرلى تۇلعاسى، ۇلى ويشىل اباي قۇنانبايۇلىنىڭ 175 جىلدىق مەرەيتويىن حالىقارالىق دەڭگەيدە اتاپ ءوتۋ ماقساتىندا «اباي جانە ءححى عاسىر: داۋىرلەر ساباقتاستىعى» تاقىرىبىندا ونلاين كونفەرەنتسيا وتكىزدى.
تىكەلەي ۆيدەوبايلانىس فورماتىندا وتكەن كونفەرەنتسياعا حالىقارالىق تۇركى اكادەمياسىنىڭ پرەزيدەنتى دارحان قىدىرالى، يۋنەسكو ازيا جانە تىنىق مۇحيتى ءبولىمىنىڭ باستىعى اندرەي شەۆەلەۆ، قازاقستان رەسپۋبليكاسىنىڭ ءبىلىم جانە عىلىم ءمينيسترى اسحات ايماعامبەتوۆ، قىرعىز رەسپۋبليكاسىنىڭ مادەنيەت، اقپارات جانە تۋريزم ءمينيسترى ازامات جامانكۋلوۆ، تۇركى كەڭەسى باس حاتشىسىنىڭ ورىنباسارى سۇلتان راەۆ، تۇركى تىلدەس ەلدەر پارلامەنتتىك اسسامبلەيا كەڭەسىنىڭ (تيۋركپا) باس حاتشىسىنىڭ ورىنباسارى الي يىلدىز، تۇركيا رەسپۋبليكاسىنىڭ يۋنەسكو ىستەرى جونىندەگى ۇلتتىق كوميسسيانىڭ توراعاسى ءوجال وعۋز، ازەربايجان ۇلتتىق عىلىم اكادەمياسىنىڭ ۆيتسە-پرەزيدەنتى، اكادەميك يسا گابيببەيلي، قازاقستان رەسپۋبليكاسىنىڭ سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى باتىرحان قۇرمانسەيىت، تۇركياداعى تۇرىك ءتىلى قوعامىنىڭ توراعاسى، پروفەسسور گۇلەر گۇلسەۆين، سونىمەن قاتار ازەربايجان، باشقۇرتستان (رف), قازاقستان، قىرعىزستان، ماجارستان، موڭعوليا، وزبەكستان جانە تۇركيا ەلدەرىنىڭ تانىمال تۇركولوگ عالىمدارى قاتىستى.
بۇعان قوسا كوپتەگەن ەلدەردەگى زەرتتەۋشىلەر مەن زيالى قاۋىم وكىلدەرى ونلاين رەجيمدە تىڭداۋشى رەتىندە قاتىسىپ، الەۋمەتتىك جەلى قولدانۋشىلارى تىكەلەي كورسەتىلىمدەر ارقىلى تاماشالادى.
كونفەرەنتسيا مارتەبەلى مەيمانداردىڭ قۇتتىقتاۋ سوزدەرىمەن باستالدى. باسقوسۋدى جۇرگىزىپ وتىرعان اكادەميا باسشىسى دارحان قىدىرالى العاشقى ءسوز كەزەگىن يۋنەسكو ازيا جانە تىنىق مۇحيتى ءبولىمىنىڭ باستىعى اندرەي شەۆەلەۆكە بەردى. يۋنەسكو وكىلى قاتىسۋشىلاردى ۇلى اقىن مەرەيتويىمەن قۇتتىقتاپ، يۋنەسكو نىڭ باس ديرەكتورىنىڭ ورىنباسارى فيرمين ماتوكونىڭ ارنايى قۇتتىقتاۋىن جەتكىزىپ، كونفەرەنتسيانىڭ ءساتتى وتۋىنە تىلەگىن ءبىلدىردى. قازاقستان تاراپىنان اتقارىلاتىن جۇمىستاردى بايانداپ بەردى. ودان كەيىن ءسوز العان قازاقستان مەن قىرعىزستاننىڭ ءبىلىم، عىلىم سالالارىنا جاۋاپتى مينيسترلەرى اسحات ايماعامبەتوۆ جانە ازامات جامانكۋلوۆ ءوز كەزەگىندە اكادەميا جۇمىسىنا ريزاشىلىقتارىن ءبىلدىرىپ، الداعى جۇمىستارعا ساتتىلىك تىلەدى.
القالى جيىن بارىسىندا اباي قۇنانبايۇلىنىڭ 175 جىلدىعىنا وراي حالىقارالىق تۇركى اكادەمياسى ازىرلەپ جارىققا شىعارعان بىرنەشە جاڭا كىتاپ تانىستىرىلدى.
بۇدان كەيىن كونفەرەنتسيانىڭ پلەنارلىق وتىرىسى جالعاسىپ، تانىمال عالىمدار – شىڭعىس ايتماتوۆ اتىنداعى ءتىل جانە ادەبيەت ينستيتۋتىنىڭ ديرەكتورى، اكادەميك ابىلداجان اكماتاليەۆ (قىرعىزستان), تاريح، ءتىل جانە ادەبيەت ينستيتۋتىنىڭ ديرەكتورى، پروفەسسور فيردوۋس حيساميتدينوۆا (باشقۇرتستان), ادەبيەت جانە ونەر ينستيتۋتىنىڭ ديرەكتورى، پروفەسسور كەنجەحان ماتىجانوۆ (قازاقستان), ەۋرازيا جازۋشىلار وداعىنىڭ توراعاسى ياكۋب ومەروعلى (تۇركيا), پروفەسسور نەرگيس بيراي (تۇركيا), پروفەسسور قوزوقبوي يўلدوشەۆ (وزبەكستان), كورنەكتى جازۋشى-اۋدارماشى، پروفەسسور سۇلتان تاۋكەيۇلى (موڭعوليا), دوكتور داۆيد شومفاي-كارا (ماجارستان) وزدەرىنىڭ مازمۇندى باياندامالارىن جاساپ، ۇلى اقىن اباي قۇنانبايۇلىنىڭ ءومىرى مەن شىعارماشىلىعىنا تۋرالى پايىمدى پىكىرلەرىمەن ءبولىستى.
ايتا كەتۋ كەرەك، حالىقارالىق تۇركى اكادەمياسى بيىلعى جىلدى ۇلى ابايعا ارناپ، شارالاردىڭ باستاۋىن قاڭتار ايىندا ازەربايجان رەسپۋبليكاسىنىڭ استاناسى باكۋ قالاسىندا باستاعان بولاتىن. اباي قۇنانبايۇلىنىڭ 175 جىلدىق مەرەيتويىنا بايلانىستى وسىنداي شارالار اكادەمياعا مۇشە مەملەكەتتەردىڭ بارلىعىندا جىل بويىنا جالعاسىن تاباتىن بولادى.
"ادىرنا" ۇلتتىق پورتالى
