ش.ايمانوۆ اتىنداعى «قازاقفيلم» كينوستۋدياسىنىڭ پرەزيدەنتى، قازاقستاننىڭ ەڭبەك سىڭىرگەن قايراتكەرى ارمان اسەنوۆ قازاق كينوسىنىڭ كورنەكتى قايراتكەرلەرىن ەسكە الۋعا ارنالعان مەموريالدى جاڭارتۋ ءۇشىن جەكە ينۆەستيتسيا تارتتى. بۇل تۋرالى ول ءوزىنىڭ Facebook-تەگى جەكە پاراقشاسىندا مالىمدەدى.
ەستەرىڭىزگە سالساق، كينوستۋديانىڭ كىرە بەرىسىندە ورنالاسقان مەموريالدى كەشەن قازاق كينوسىنىڭ نەگىزىن قالاۋشى شاكەن ايمانوۆتىڭ ەسكەرتكىشى، ۇوس جىلدارىندا بىرىككەن ورتالىق كينوستۋديادا جۇمىس ىستەگەن قىزمەتكەرلەردىڭ ەسىمدەرى جازىلعان مەموريالدى تاقتا جانە 30-عا جۋىق كينوگەرلەردىڭ ەسىمى جازىلعان جۇلدىزدار اللەياسىنان تۇرادى.
- وتكەنسىز بولاشاق جوق ەكەنىن مەن قاشان دا ايتىپ جۇرەمىن. سوندىقتان دا وسى قىزمەتكە كەلگەلى بەرى قازاق كينو ونەرىنىڭ دامۋىنا ولشەۋسىز ۇلەس قوسقان كينوگەرلەردىڭ ەسىمدەرىن جاڭعىرتۋعا، ولاردىڭ ەڭبەگىن دارىپتەۋگە ەرەكشە كوڭىل بولەمىن. ءبىراز جىل بۇرىن قۇرىلعان بۇل كەشەن ۋاقىت وتكەن سايىن ابدەن ەسكىرگەن. شاكەن كەنجەتايۇلى ەسكەرتكىشى تۇعىرىنىڭ بەتكەيلەرى مەن جۇلدىزدار اللەياسىنا قاراعان سايىن جانىم اۋىرادى، – دەدى كينوستۋديا پرەزيدەنتى ارمان اسەنوۆ
وسىلايشا كينوستۋديا باسشىسى مەموريالدى كەشەنگە قاتىستى ويىمەن بەلگىلى بيزنەسمەن دوسىمەن بولىسكەندە، ول بۇل ماسەلە بويىنشا كومەكتەسۋگە دايىن ەكەندىگىن بىلدىرگەن. بۇگىنگى تاڭدا جاڭا كەشەننىڭ جوباسى دايىن، ونى جاقىن ارادا كوپشىلىككە ۇسىنادى.
- مەموريالدىق كەشەندى جاڭارتۋ بارىسىندا ۇلى جەڭىستىڭ 75 جىلدىعىنا وراي مايدانگەر-كينوگەرلەرگە دە قۇرمەت كورسەتەتىنىمىزدى جەتكىزگىم كەلەدى. بۇگىندە ۇيىمداستىرۋ توبى ولاردىڭ ءتىزىمىن جاساۋعا كىرىسىپ تە كەتتى. وعان قوسا قازاق كينوسىنىڭ تاريحىندا وشپەس ءىز قالدىرعان، قۇرمەتكە لايىق كوپتەگەن قايراتكەرلەردىڭ ەسىمدەرىن ۇمىتپاۋىمىز قاجەت، – دەدى ارمان اسەنوۆ
كينوستۋديا باسشىسىنىڭ ايتۋىنا قاراعاندا جاقىن ارادا جۇلدىزدار اللەياسى كاۋكەن كەنجەتاەۆ، پاۆەل زالتسمان، قۇمان تاستانبەكوۆ، ميحايل جانە فەدور ارانىشەۆ، جامبىل قۇدايبەرگەنوۆ، يۋري پومەرانتسەۆ، نۇرمۇحان ءجانتورين، ميحايل كولباسوۆسكيلەردىڭ ەسىمدەرىمەن تولىعادى...
سونداي-اق، «قازاقفيلم» پرەزيدەنتى بارلىق قازاقستاندىقتاردى مەموريالدىق كەشەندى جاڭعىرتۋ يدەياسىن تالقىلاۋعا شاقىردى. جۇلدىزدار اللەياسىنا قاتىستى ۇسىنىستاردى (قازاق كينوسى مايتالماندارىنىڭ ەسىمدەرىن تولىقتىرۋ بويىنشا) kense@kazakhfilmstudios.kz پوشتاسىنا جىبەرۋىڭىزگە بولادى.
"ادىرنا" ۇلتتىق پورتالى
