رەسەي پرەزيدەنتى ۆلاديمير پۋتين جەكسەنبى 21 ماۋسىم كۇنى “روسسيا 1” تەلەارناسىنان جارىق كورگەن باعدارلامادا سوۆەت وداعى قۇرىلعاندا ونىڭ قۇرامىنا كىرگەن رەسپۋبليكالار “رەسەي جەرىن ءىرى كولەمدە يەمدەندى” دەدى.
“سوۆەت وداعىن قۇرۋ تۋرالى كەلىسىمدە شىعۋ قۇقىعى جازىلعان. بىراق [شىعۋدىڭ] ءتارتىبى جازىلماعاندىقتان، ءبىر سۇراق تۋىندايدى. ەگەر قانداي دا ءبىر رەسپۋبليكا سوۆەت وداعىنا كىرىپ، بىراق ءوز قورجىنىنا رەسەي جەرىنىڭ، ءداستۇرلى-تاريحي تەرريتورياسىنىڭ ءىرى كولەمىن الىپ، وداق قۇرامىنان شىعامىن دەپ شەشتى. ولاي بولسا، نەمەن كەلدىڭ، سونىمەن شىعۋىڭ كەرەك قوي، رەسەي حالقىنىڭ سىيلىعىن وزىمەن بىرگە اكەتپەي. وسىنىڭ ءبارى جازىلماعان ەدى. مەن قازىرگى كونستيتۋتسياعا وزگەرىس ەنگىزۋدىڭ دۇرىس ەكەنىنە ابدەن سەنىمدىمىن” دەدى رەسەي پرەزيدەنتى “ماسكەۋ. پۋتين. كرەمل” باعدارلاماسىندا.
پۋتين ناقتى قاي رەسپۋبليكانى نەمەسە قانداي تەرريتوريانى مەڭزەگەنىن ايتپادى. بىراق الەۋمەتتىك جەلىلەردىڭ قازاقستان سەگمەنتىندە رەسەي پرەزيدەنتىنىڭ بۇل ءسوزى الاڭ تۋدىردى.
"ازاتتىق" راديوسى
