قر پرەزيدەنتى قاسىم-جومارت توقاەۆقا جامبىل وبلىسى، جۋالى اۋدانى ورتالىق اۋرۋحاناسىنا قاراستى فاريدا جانباتىروۆا اتتى ەمحانا قىزمەتكەرى ۆيدەوۇندەۋ جاسادى.
ەمحانا قىزمەتكەرى كارانتين كەزىندە ىندەتتىڭ الدىن الۋ شارالارىنا بايلانىستى ءبىرىنشى بەكەتتە رەنتگەن لابورانت بولىپ جۇمىس ىستەگەن. ەمحانا باسشىلىعى قىزمەتكەرلەرگە بەرىلەتىن قوسىمشا ەڭبەكاقىنى قايتارۋدى تالاپ ەتكەن.
"قازاقستان رەسپۋبليكاسىنىڭ پرەزيدەنتى قاسىم-جومارت توقاەۆقا!
مەن، جانباتىروۆا فاريدا قاناتبەكقىزى 1995 جىلدان بەرى جۋالى اۋدانى ورتالىق اۋرۋحاناسىنا قاراستى ەمحانادا رەنتگەن-لابورانت بولىپ قىزمەت اتقارامىن. 2020 جىلدىڭ ءساۋىر ايىنان باستاپ اۋرۋحاناعا كىرەبەرىس جەردەگى ءبىرىنشى بەكەتتە تاڭعى ساعات 07:30-دان كەشكى 17:30-عا دەيىن جۇمىس ىستەدىم. ءساۋىر ايىندا ەسەپشوتىمىزعا ايلىعىمىزعا قوسىمشا رەتىندە ۇكىمەتتەن 160 مىڭ تەڭگە ءتۇستى. وعان كوپ-كوپ راقمەت ايتامىن. ەندى ءبىزدىڭ ەمحانا باسشىلارى وسى 160 مىڭ تەڭگەنىڭ 39 مىڭ تەڭگەسىن قايتارۋىمىزدى تالاپ ەتتى. "نەگە" دەپ سۇراق قويعانىمدا "جوعارىداعى باسشىلاردىڭ تالابى، سولارعا قايتارىپ بەرەمىز" دەدى. بەكەتتە وتىرعان بارلىق قىزمەتكەردەن وسىنداي جولمەن اقشانى جيناپ الدى. مەن دە سول اقشانى ءوز قولىممەن كاسسير ەلميراعا اپارىپ بەرۋگە ءماجبۇر بولدىم. ماي (مامىر) ايىندا كوروناۆيرۋس ىندەتىنە بايلانىستى ايلىقتان بولەك قوسىمشا 200 مىڭ تەڭگە ءتۇستى. اقشا تۇسكەننەن كەيىن، باس دارىگەردىڭ ورىنباسارى ابزال داۋلەتبايۇلى بايتورەەۆ كابينەتىنە قىزمەتكەرلەردى جەكە-جەكە شاقىرىپ، سونىڭ ىشىندە مەنى دە شاقىرىپ، 200 مىڭ تەڭگە تۇسەتىنىن، ونىڭ 150 مىڭ تەڭگەسىن قايتارىپ بەرۋىن تالاپ ەتتى. مەن 150 مىڭ تەڭگەنى قايتارماعاندىقتان، 26 ماۋسىمنان (26.06. 2020ج) باستاپ مەنى بەكەتتەن الىپ تاستادى" دەپ ۇندەۋ جاسادى.
دارىگەر وسى ءىستى ءادىل تەكسەرىپ، كىنالىلەردىڭ جازالانۋىن، جۇمىسىنا قايتا ورالىپ، ماڭداي تەرىمەن تاپقان اقشاسىن قايتارۋىن سۇرايدى.
قازىر بۇل ءىس بويىنشا تەرگەۋ امالدارى ءجۇرىپ جاتىر. الداعى اۋقىتتا ءىستىڭ انىق-قانىعى جايلى اقپارات بەرەتىن بولامىز.
"ادىرنا" ۇلتتىق پورتالى
