دينا يمامباي: ءبىز ەكسپو وتكىزگەن ەل ەمەسپىز بە؟!

3354
Adyrna.kz Telegram

اۋرۋحانالاردا مىناداي وتتەگى باللوندارىن قولدانىپ جاتقانىن كورىپ ءبىز تاس عاسىرىندا ءومىر ءسۇرىپ جاتىرمىز با دەپ ويلايدى ەكەنسىڭ. قۇدايىم-اۋ، ءبىز ءححى عاسىردامىز عوي! جاساندى ينتەللەكت داۋىرىندە ءومىر ءسۇرىپ جاتىرمىز عوي!

ءبىز ەكسپو وتكىزگەن ەل ەمەسپىز بە؟!؟ 2003 جىلدان بەرى تريلليونداعان قاراجات بولىنگەن ءۇيدمب – ۇدەمەلى يندۋستريالىق-يننوۆاتسيالىق باعدارلاماسىنىڭ مەديتسيناعا قاتىسى جوق پا؟!؟ اتىشۋلى تەحنوپاركتەر دەنساۋلىق ساقتاۋ ىسىنە تۇك تە ۇلەس قوسپاعان با؟ سول تەحنوپاركتەر مەن بيزنەس-ينكۋباتورلارعا بارىپ قارجى سۇراپ جۇرگەن ونەرتاپقىشتاردىڭ يدەيالارىن نەگە پايدالانبايمىز؟ سۇراق كوپ، قىسقاسى، ال ادامدار اۋرۋحانا مەن ۇيلەرىندە ءبىر جۇتىم اۋا سىيلايتىن اپپاراتتارعا زار بوپ جاتىر.

شەت ەلدەر جاساندى ينتەللەكتىنى مەديتسينادا قولدانۋعا كىرىسىپ كەتكەلى قاشان. قازىرگى تەحنولوگيالار زامانىندا ادامنىڭ دەنساۋلىعىن ۇيدە وتىرىپ-اق ونلاين-رەجيمدە انىقتايتىن قۇرىلعىلار ويلاپ تابىلعان. الىس شەتەلدى قويا تۇرىپ، مىنا كورشى رەسەيدىڭ گوسدۋماسىنا باۋمانكا عالىمدارى پاتسيەنتتەردى ونلاين-وسموتر جاساۋعا رۇقسات بەرەتىن زاڭنامانى ۇسىنىپتى. دەمەك، مۇنداي قۇرىلعى بار جانە ول قازىرگىدەي ىندەت پەن توتەنشە جاعدايلار كەزىندە تاپتىرماس قۇرال! ولار ناۋقاستىڭ كۇرەتامىرىنا ءدارى ەنگىزەتىن (كاپەلنيتسا) اقىلدى قۇرىلعى دا شىعارىپتى، ونى كەز كەلگەن ادام قولدانا الادى ەكەن.

اۋرۋحانادا مەدبيكەلەر جەتىسپەي جاتقان ءبىزدىڭ جاعدايدا مۇنداي قۇرال-جابدىقتار قانشاما ادامدى اجالدان قۇتقارار ەدى دەسەڭشى! دەنساۋلىق ساقتاۋ مينيسترلىگى تج جاريالانا سالىسىمەن ەلدەگى مەديتسينانىڭ دەڭگەيىن بىلە تۇرا نەگە قۇرال-جابدىقتار الۋدى قاراستىرمادى ەكەن؟

جارناما مەن پيارعا كەتكەن قايران ميلليوندار-اي...
ەلدەر اقىلدى كاپەلنيتسالار شىعارىپ جاتىر، ال ءبىز مەكتەپتە وقۋشىلارعا ۋكول سالۋدى ۇيرەتپەكپىز...

پىكىرلەر