كارانتين كەزىندە مۇعالىمدەر ۇيىندە ەمەس، مەكتەپكە بارىپ ءجۇر. ەلىمىزدەگى بارلىق ايماقتىڭ مۇعالىمدەرى قازىر مەكتەپكە بارىپ، ءتۇرلى شارۋالارىن اتقارۋعا كىرىستى. ءبىرى وسىعان دەيىن جاسالعان رەمونتتان كەيىنگى سىنىپ بولمەسىن تازالاسا، ەندى ءبىرى ءوز قاراجاتىنا سىنىپ بولمەسىنە رەمونت جاساپ ءجۇر. بۇل قالاي؟
«اتىڭنان اينالايىن ۇكىم ەت دەگەن....سەنىڭ ارقاڭدا سىنىبىمدى حالىقتىڭ بالاسى ءۇشىن ءوز قاراجاتىما ءوزىم جوندەپ الدىم.
قىزىق!؟ وسى سىنىپتاردىڭ جوندەۋ جۇمىستارىنا قانشا قاراجات ءبولدى ەكەن؟
ول قاي جەردە قالدى ەكەن؟ ول قاراجاتتى ساناعان ادام ارزىماعان اقشا ءۇشىن شەت ەلگە كەتە قويماس...» دەپ جازدى تۇركىستان وبلىسىنىڭ مۇعالىمى سۆەتا الپامىسوۆا ءوزىنىڭ الەۋمەتتىك جەلى پاراقشاسىندا.
بۇل جازبانى وقي وتىرىپ، بىرنەشە سۇراقتىڭ قۇلاعى قىلتيدى. بىرىنشىدەن، نەگە كارانتين كەزىندە مۇعالىم مەكتەپتە ءجۇر؟ ەكىنشىدەن، كارانتيندە مەكتەپكە بارعان مۇعالىمگە سىنىپ بولمەسىن رەمونتتاۋ نە سەبەپتى جۇكتەلگەن؟ ۇشىنشىدەن، نەگە رەمونت جۇمىسى ماۋسىم، شىلدە ايلارىندا جاسالىپ، بىتپەگەن؟ تامىز ايى ءار مۇعالىمنىڭ جاڭا وقۋ جىلىنا دايىندالۋعا ءتيىس ۋاقىتى ەمەس پە؟ ال ەڭ باستى سۇراق، نە سەبەپتى مۇعالىم ءوز قارجىسىنا سىنىپ بولمەسىن رەمونتتاپ ءجۇر؟
سۆەتا اپايعا حابارلاسىپ، ءمان جايدى سۇراماق نيەتىمىز ورىندالمادى. بالكىم، رەمونت جۇمىسى مەن ەشقاشان بىتپەيتىن مەكتەپتىڭ قاعازباستى شارۋاسىنان مۇرشاسى بولماعان شىعار.
دەسەك تە، ەڭ سوراقىسى، وسى جازبانىڭ استىنداعى كەيبىر پىكىرلەردىڭ جاعا ۇستاتقانى بولدى.
«ءوز قاراجاتىما دەمەڭىز، ايلىعىڭىزعا اي سايىن نادباۆكا بار عوي سىنىپتى ۇستاعانىڭىز ءۇشىن» دەپتى الحيميك الحيميك دەگەن بىرەۋ. ارينە، بۇل فەيك. بىراق سول فەيكتىڭ ارتىندا قازىرگى ءشىرىپ بىتكەن جۇيەنى قولدايتىن ءبىر پەندەنىڭ وتىرعانى انىق قوي. دەمەك، جالاقىعا قوسىلاتىن ءار تيىندى وسىلاي ەسەپتەپ، وسىنداي پىكىر بىلدىرەتىندەر قوعامدا ءالى دە جەتكىلىكتى. سونىمەن قاتار ءدال وسى پىكىردى سۆەتا اپايدىڭ جازباسىنا ارنايى جولدانعان، جالدامالى ادامنىڭ جازعانى دا ءسوزسىز.
سىنىپ ءۇشىن بەرىلەتىن بەس مىڭ تەڭگەنىڭ اينالاسىنداعى اقشا مۇعالىمگە ءار وقۋشى ءۇشىن جاۋاپكەرشىلىك جۇكتەيتىن اقشا. ساباق ۋاقىتىنداعى بالامىزدىڭ اماندىعىن مۇعالىمگە تاپسىرامىز. مىنە، سول ءۇشىن مەملەكەت ۇستازدىڭ جالاقىسىنا بەس مىڭنىڭ اينالاسىنداعى تەڭگەنى قوسادى.
ەگەر جوعارىداعى قيسىق پىكىردى مۇعالىم جازىپ وتىرسا، وندا ارامىزدا سونشالىقتى ساۋاتسىز، سونشالىقتى ءبىلىمسىز ادامداردىڭ دا ارداقتى «ۇستاز» دەگەن اتتى ارقالاپ جۇرگەنى عوي، دەمەك؟ مىنە، وسىنداي پىكىردەگى پەندەلەردىڭ كەسىرىنەن باسقالارى زارداپ شەگۋدە.
ءبىلىم جانە عىلىم ءمينيسترى اسحات ايماعامبەتوۆ ۇستازداردىڭ زاڭدى قۇقىعىنىڭ تاپتالۋىنا جول بەرمەي، مىنا ماسەلە بويىنشا ءتيىستى شارا قولدانادى دەپ سەنەمىز.
مەرۋەرت حۋساينوۆا،
"ادىرنا" ۇلتتىق پورتالى.
