«ءبىلىم» ارنايى ءتاريفىنىڭ ابونەنتتىك تولەمى ايىنا 990 تەڭگەنى قۇرايدى
قازىرگى تاڭدا ەلىمىزدە 500 مىڭ بالا ينتەرنەتسىز وتىر، ال 185 مىڭ وقۋشىنىڭ قاشىقتان ءبىلىم الۋىنا قاجەتتى تەحنيكاسى مۇلدەم جوق. كومپيۋتەرلەرگە قول جەتكىزۋ ءتىپتى 24 مىڭ مۇعالىمگە دە ارمان بولىپ قالعان. الەمدىك ىندەت قازاقستاننىڭ تسيفرلى مەملەكەت بولۋعا ءالى دايىن ەمەستىگىن كورسەتىپ بەرگەن بولاتىن.
بىراق!
جاڭا وقۋ جىلىندا جاڭا باستامالارمەن ىسكە كىرىسكەن ءبىلىم مينيسترلىگى تاعى ءبىر جاڭالىعىمەن قۋانتتى. تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى قاشىقتان ءبىلىم بەرۋدى قولداۋ ماقساتىندا مەكتەپ وقۋشىلارى مەن ستۋدەنتتەرگە جانە مۇعالىمدەرگە ارنالعان ارنايى تاريفتىك جوسپار شىعارۋ ماسەلەسىن قاراستىرعان بولاتىن. ءمينيستردىڭ مىندەتىن اتقارۋشى باعدات ءمۋسيننىڭ ايتۋىنشا، بىلىمگەرلەر ءۇشىن ەندى 380 ءبىلىم بەرۋ رەسۋرسىنشەكتەۋسىز پايدالانۋعا مۇمكىندىك بار.
باعدات مۋسين:
«ءبىلىم» تاريفتىك جوسپارىنىڭ ابونەنتتىك تولەمى ايىنا 990 تەڭگە. بۇل قىزمەت 20 تامىزدان كەيىن ىسكە قوسىلادى. سونداي-اق، بايلانىس وپەراتورلارى 1 گب ينتەرنەت ترافيگىن قوسىمشا ۇسىنادى».
سونىمەن بىرگە، وپەراتورلاردىڭ مەكتەپتەردەگى ينتەرنەت جىلدامدىعىن
8 مبيت/سەك دەيىن ارتتىرۋ مۇمكىندىكتەرى قاراستىرىلىپ جاتىر. قازىرگى تاڭدا ءبىلىم جانە عىلىم مينيسترلىگى جاڭا تاريفتىك جوسپارعا قوسىلۋ شارتتارىن بەكىتۋدە.
ايتا كەتەيىك، قىركۇيەكتە 2 ملن 600 مىڭ بالا ساباقتى قاشىقتان وقۋدى باستايدى. وقۋشىلارعا تەحنيكالىق قۇرىلعىلار ۋاقىتشا پايدالانۋعا بەرىلمەك. الدىڭعى كەزەكتە الەۋمەتتىك از قامتىلعان جانۇيالار مەن جەتىم بالالار جانە كوپ بالالى وتباسىلار قاراستىرىلاتىن بولادى.
اياۋلىم ءابىلدا،
“ادىرنا” ۇلتتىق پورتالى
