تەحاستا تۋىپ، وسكەن ماريون لۋنا برەم 17 جاسىندا اسكەري ادامعا كۇيەۋگە شىعادى. ءبىر جىلدان سوڭ تۇڭعىش ۇلى دۇنيەگە كەلەدى. وتباسى تاتۋ-ءتاتتى ءومىر سۇرەدى. بەس جىلدان سوڭ ەكىنشى ۇلى دۇنيە ەسىگىن اشتى. 1984 جىلى لۋنا برەم 30 جاسقا تولادى. وكىنىشتىسى، ەكى جاقتى ونكولوگيا انىقتالىپ، ول بىرنەشە وتا جاساتادى. گينەكولوگيالىق جانە انارىن الىپ تاستاۋ بويىنشا... وسىدان باستاپ حيميوتەراپيا باستالادى. سونىڭ سالدارىنان ماريون تاز بوپ قالادى. دارىگەرلەر ەكى-ءۇش جىلدىق ءومىرى قالدى دەپ بولجام ايتادى. بار قيىندىقتى كورىپ تۇرىپ، كۇيەۋى ماريوندى تاستاپ كەتەدى. ۇلدارىنىڭ ۇلكەنى 12-دە، كىشىسى 7-دە بولادى. ەشقاشان جۇمىس ىستەمەگەن جاس كەلىنشەك جالعىز قالادى. ونىڭ ۇستىنە وتا ءۇشىن ءبىراز قارجى موينىنا قارىز بولىپ ىلىنەدى.
ءۇي تىرلىگىنەن اسىپ ەشتەڭە ىستەپ كورمەگەن ايەل بالالارىن قالاي اسىرايمىن دەپ ويلانادى. ءبىر كۇنى باسى قاتتى اۋىرىپ، ۆانناداعى كافەلدە ۇستاماسى ۇستاپ قالادى. اسۇيدەن ۇلدارىنىڭ كۇلگەن داۋىسىن ەستيدى. سول ساتتە ميىندا ءبىر نارسە قوسىلادى. قايتسەم دە دەرتىمنەن ساۋىعامىن دەپ ورنىنان تۇرادى.
ماريون كولىك ساتۋ جاقسى تابىس اكەلۋى مۇمكىن ەكەنىن بىلەتىن. اۆتوديللەرلەرگە بارىپ ءوزىن ۇسىنادى. بىراق مۇنداي ىستە ىلعي ەر ادامدار جۇمىلدىرىلعانىن كورەدى. ەكى اپتا ىشىندە ماريون 16 ادامنان جوق دەگەن جاۋاپ الادى. ستراتەگياسىن اۋىستىرماسا ءۇمىتى ۇزىلەتىنىن سەزەدى. 17-ءشى رەت جۇمىس سۇراۋدىڭ ورنىنا ول جۇمىس بەرۋشىگە: «سەنىڭ كومپانياڭ ماعان مۇقتاج، مەنى الساڭ، تابىسقا كەنەلەسىڭ» دەپ كەسىپ ايتادى. ونى جۇمىسقا الادى.
كولىك ساتۋشى ايەل رەتىندە ەرلەرگە قاراعاندا ءبىرشاما ارتىقشىلىعى بار ەكەنىن ول بىردەن ءتۇسىندى. كولىك الۋعا كەلگەندەردىڭ جۇبايلارىنا قانداي كولىك الۋ قاجەتىن ءتۇسىندىرىپ وتىرادى. ەركەك ساتۋشىلار كوبىنە كۇيەۋلەردى ساتىپ الۋعا كوندىرۋگە تىرىساتىن.
العاشقى ەڭبەك جىلى لۋنا برەم جىل ساتۋشىسى دەگەن اتاقتى الادى. وعان ەرلەر تاعاتىن رولەكس ساعاتىن قوسىپ بەرەدى. ونى تەك ەر ادامدارعا عانا بەرەدى ەكەن. سول ساتتە دارىگەرلەر ونىڭ ونكولوگياسى رەميسسياعا تۇسكەنىن حابارلايدى. ماريون كۇش جيناي باستايدى.
ودان كەيىنگى ەكى جىل وتە تابىستى بولادى. ول ءوزىن باستىق ەتىپ قويۋدى ۇسىنادى. بىراق جۇمىس بەرۋشى «سەن كولىك ساتۋدان كەتسەڭ، پايدا تۇسپەي قالادى» دەپ ونىڭ ۇسىنىسىن قابىلداماي تاستايدى.
بىراق ماريون جاڭا جۇمىس ىزدەۋگە شىعادى. ەكى اپتادان سوڭ باسقا ءبىر اۆتوديللەر ونى ءوزى قالاعان لاۋازىمعا جۇمىسقا الادى. سودان باستاپ ونىڭ لاۋازىمى كۇن وتكەن سايىن وسە بەرەدى.
تاعى ەكى جىل وتكەندە ءوزى دە اۆتوديللەر بولۋعا قارجى جيناۋدى باستايدى. بار-جوعى $800 000 جەتپەي تۇردى. ول ءۇشىن $800 ميلليون دەگەن تۇسكە عانا كىرەتىن سوما بولاتىن. ماريون تاعى ويلانادى. بىلەك سىبانادى. بيزنەس-جوسپار جازىپ، وعان ءوزىنىڭ ءومىربايانىن قوسىپ، ينۆەستور تاۋىپ بەرەتىن 50 اۋديتورلىق كومپانياعا تاراتادى.
ەكى اپتادان سوڭ ينۆەستور تابىلادى. لۋنا برەم ءوزىنىڭ اۆتوسالونىن اشادى. Chrysler كولىكتەرىن ساتۋمەن شۇعىلدانادى. ءسويتىپ، 1989 جىلى جۇرەك تاعىلعان «Love Chrysler» ساۋداعا شىعادى. «بۇل جاي جۇرەك ەمەس، بۇل ءبىزدىڭ ادامداردىڭ جۇرەگى، ءبىز تەحاسقا ماحابباتىمىزدى ارنايمىز» دەگەن ۇرانمەن ءوز ءىسىن باستايدى.
ماريوننىڭ تالپىنىسى ەسەلەپ قايتتى. بۇگىندە ونىڭ وبىرى جازىلدى. ەكى اۆتوسالونى بار. جىلدىق اينالىمى $45 ملن. دوللار. كىتاپ جازۋدى ۇناتادى. وتىز جاسىندا كۇردەلى وتا جاساتۋى، كۇيەۋى تاستاپ كەتۋى بار، دارىگەرلەر ولەدى دەپ كۇن ساناعان ادام ەمدەلىپ، ءوز ءىسىن باستاپ، ميلليونداپ تابىس تاپقانى تاڭقالارلىق جاعداي ما؟ ارينە!
ول ۇلدارىنىڭ داۋىسىن ەستىپ، ءومىرىن قولعا الدى. ارزان پاريك كيىپ، ەرلەردىڭ الەمىنە قادام باستى. ۇلدارىنا بۇرىن-سوڭدى بەرە الماعان باقىتتى بالالىق شاقتى سىيلادى.
«كەيدە جاي ەسىك قاعۋ ازدىق ەتەدى. كەيدە ەسىكتى سىندىرىپ كىرۋ كەرەك» دەيدى ماريون.
اۋدارعان شىنار ءابىلدا
