ءوڭىر نارىعىندا وزىندىك ورىنى بار «ايس» جاۋاپكەرشىلىگى شەكتەۋلى سەرىكتەستىگىندەگى پارتيا مۇشەلەرى دە پرايمەريزدەن شەت قالىپ جاتىرعان جوق. ون جىل بۇرىن كاسىپورىنعا قاراپايىم جۇمىسشى بولىپ كىرىپ، قازىرگى تاڭدا تسەح شەبەرى بولىپ وتىرعان ەربولات جاسجانوۆ پارتياىشىلىك سايلاۋدىڭ ماڭىزدى ەكەنىن ايتتى. ول باستاماسى مەن باعدارلاماسى ۇناعان كانديداتقا وزىندىك تاڭداۋىن جاساعان.
«پرايمەريز دوداسىنا ءتۇسىپ جاتقان ۇمىتكەرلەر ءتۇرلى ماسەلەلەردى كوتەرىپ، اتقارىلۋى كەرەك جۇمىستاردى اتاپ ايتىپ جاتىر. تۇرعىنداردى تولعاندىرىپ جۇرگەن جايتتاردى قوزعاپ، شەشىمىن دە ۇسىنىس رەتىندە جەتكىزۋدە. قوعامدا بولىپ جاتقان ماسەلەلەرگە بەي-جاي قاراماي، ونى كوتەرىپ جاتقان ۇمىتكەرلەردىڭ باستاماسى مەنى قۋانتتى. پارتيامىزدىڭ لايىقتى كوشباسشىلارى انىقتالىپ، ناتيجەلى جۇمىس اتقاراتىنىنا تولىقتاي سەنىمدىمىن»، - دەيدى ەربولات.
سونىمەن قاتار، داۋىستى ونلاين ارقىلى بەرۋ ۋاقىتتى ۇنەمدەۋدىڭ جانە سوڭعى جاعدايلارعا بايلانىستى ادامداردىڭ دەنساۋلىعى ءۇشىن ءتيىمدى ەكەنىن ايتتى.
«ونلاين داۋىس بەرۋ ءبىز ءۇشىن ءتيىمدى بولىپ تۇر. جۇمىستا بولعاندىقتان ارنايى سايلاۋ ۋچاسكەسىنە بارىپ، تاڭداۋىمىزدى جاساۋ ۋاقىتىمىزعا سايكەس كەلە بەرمەيدى. قىزمەتىمىزدى اتقارىپ ءجۇرىپ primaries موبيلدىك قوسىمشا ارقىلى داۋىسىمىزدى بەردىك. ءبىر جاعىنان ەلىمىزدە بارىپ جاتىرعان سوڭعى توتەنشە جاعدايلارعا بايلانىستى ەرەكشە تۇردە ۇيىمداستىرىلعان»، - دەيدى ول.
ال اۋىلدان تاڭداۋىن جاساعانداردىڭ ءبىرى -مالىك سارسەنوۆ. ول دوستىق اۋىلىنىڭ مەكتەبىندە مۇعالىم. قوسىمشا شارۋاشىلىقپەن اينالىسىپ، قويان جانە قوي باسىن كوبەيتىپ وتىر.
«ەلىمىزدەگى قازىرگى جاعدايدى ەسكەرە وتىرىپ ونلاين داۋىس بەرۋدى ۇيعاردىم. ءبارى ءتيىمدى ۇيىمداستىرىلعان. اۋىلدىقتار وتە ريزا. ەشقايدا سابىلىپ ءجۇرۋدىڭ قاجەتى جوق. اركىم ءوز ۇيىنەن تاڭداۋىن جاساي الدى. مىسالى، مەن اۋدان ەكونوميكاسىنا پايداسىن تيگىزەر، ساياسي-قوعامدىق ومىردە ويىپ تۇرىپ ورىن الار بەلسەندىلەردىڭ جەڭىسكە جەتىپ، ەل يگىلىگى ءۇشىن داۋىس بەردىم»، - دەدى ول.
ال ەڭ شالعاي اۋدانداردىڭ ءبىرى – شالقاردان جاس مامان التىناي نۇرلانوۆا داۋىس بەرىپتى. ۋاقىتقا دا، جەردىڭ شالعايلىعىنا دا قاراماستان ءتيىمدى جۇيەمەن داۋىس بەرگەنىنە ءدان ريزا.
«ءوزىم اعىلشىن ءتىلىنىڭ مۇعالىمىمىن. شەتەلدىڭ وزىق تاجىريبەسىنەن حابارىم بار. ەلىمىزدە پرايمەريز وتەتىنىن ەستىگەندە ەلەڭ ەتتىم. جاڭالىقتاردى الەۋمەتتىك جەلىدەن باقىلادىم. ۇيالى تەلەفونىما «پرايمەريز» قوسىمشاسىن جۇكتەپ الىپ، داۋىس بەرۋدى اسىعا كۇتتىم. ونلاين داۋىس بەرۋ قىزىقتى ءارى تاڭداعان كانديداتىما تەزىرەك قولداۋ بىلدىرگىم كەلدى»، - دەدى ول.
