مەگاپوليستىڭ باس سانيتار دارىگەرى كارانتين شارالارىن جەڭىلدەتۋ تۋرالى قاۋلىعا تۇزەتۋلەر ەنگىزدى. ەندى قالاداعى ءدامحانالار تۇنگى ون ەكىگە دەيىن جۇمىس ىستەيدى
الماتىدا قوعامدىق تاماقتانۋ ورىندارىنىڭ جۇمىس ۋاقىتى ۇزاردى. سونداي-اق، قالاداعى تەاترلارعا زالدىڭ تەڭ جارتىسىن تولتىرۋ ارقىلى جۇمىس ىستەۋگە رۇقسات بەرىلدى. بۇل جايىندا الماتىنىڭ باس سانيتار دارىگەرى جانداربەك بەكشيننىڭ قالاداعى كارانتيندى جەڭىلدەتۋىنە قاتىستى جاڭا قاۋلىسىندا ايتىلعان، دەپ حابارلايدى Sputnik قازاقستان.
تەاترلار قىزمەتىنە كىرىسۋ ءۇشىن نىسانداردى infokazakhstan.kz سايتىندا تىركەۋدەن وتكىزۋ كەرەك.
سونداي-اق، مادەنيەت نىساندارى كۇشەيتىلگەن سانيتارلىق-دەزينفەكتسيالىق رەجيمدى قاتاڭ ساقتايتىن بولادى. زالدىڭ ىشىندەگى ورىندىقتار سانىنىڭ تەڭ جارتىسىن عانا تولتىرىپ جۇمىس ىستەۋ بارىسىندا ادامداردى وتىرعىزۋ جانە الەۋمەتتىك اراقاشىقتىق ەسكەرىلەدى.
قىزمەت كورسەتۋ سالاسىنىڭ جۇمىس ۋاقىتى ۇزاردى
قاۋلىعا سايكەس، جەكە تۇرعان عيماراتتاردا ورنالاسقان قوعامدىق تاماقتانۋ نىساندارى (اسحانا، كوفەحانا، ءدامحانا) 05:00-دەن 00:00-گە دەيىن جۇمىس ىستەي الادى. الايدا بۇل جەردە ۇجىمدىق ءىس-شارا وتكىزۋگە بولمايدى. سونىمەن قاتار وسى ۋاقىت ارالىعىندا وزىمەن بىرگە الىپ كەتۋ جانە جەتكىزۋ قىزمەتىنە رۇقسات ەتىلگەن.
سونداي-اق، كولىكجۋ، جەڭىل اۆتوكولىكتەرگە تەحنيكالىق قىزمەت كورسەتۋ ستانتسيالارى، شينومونتاجدىق ۋچاسكەلەر، تۇرمىستىق تەحنيكانى جوندەۋ، اياقكيىم شەبەرحانالارى، حيميالىق تازالاۋ، كىر جۋ ورىندارىنىڭ جۇمىس رەجيمى ۇزارتىلدى. ەندى ولار 10:00-دەن 00:00-گە دەيىن جۇمىس ىستەي الادى.
ال قالانىڭ قوعامدىق دەنساۋلىق باسقارماسى دەنە قىزۋى جوعارى ادامداردى ديففەرەنتسيالدى دياگنوستيكا مەن ەمدەۋ ءۇشىن ينفەكتسيالىق ستاتسيونارعا انىقتامانىڭ بار-جوعىنا قاراماستان جاتقىزادى.
كوروناۆيرۋستىڭ بار-جوعىن انىقتايتىن سىناقتىڭ ناتيجەسى وڭ شىققان ناۋقاستار ارنايى ستاتسيونارعا اۋىستىرىلادى.
قاۋلىنىڭ تولىق ءماتىنى الماتى قالاسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ سايتىندا جاريالاندى.
قاۋلى 6 قازان ساعات 00:00-دە كۇشىنە ەنەدى.
