COVID-ءتىڭ ەكىنشى تولقىنى باستالعانى راس پا؟

5242
Adyrna.kz Telegram

قىس مەزگىلىنىڭ باستالۋىنان با، الدە سولاي ما، قازىر ەكىنىڭ ءبىرى تۇسىنىكسىز تۇماۋ تۇرىنە شالدىعىپ جاتىر. بۇل تۋرالى الەۋمەتتىك جەلى قولدانۋشىلارى دا ءوزارا پىكىرلەسىپ، «كوۆيدتىڭ ەكىنشى تولقىنى كەلگەنى مە؟»  دەپ سۇراۋ سالۋدا دەپ جازادى «ادىرنا» ۇلتتىق پورتالى. 

الەۋمەتتىك جەلىدە جازىلعان پىكىر اۆتورلارىنىڭ بارلىعى دا جاقىندارى مەن تۋىستارىنىڭ تۇماۋ بولىپ اۋىرىپ باستاعانىن ايتادى. پىكىرلەردى سوڭىنا دەيىن وقىپ شىعىپ، تۇيگەنىمىز، قازىرگى «تۇماۋدى ءتۇرى» ەڭ الدىمەن تاماقتىڭ ءىسىپ، اۋىرۋىنان باستالادى ەكەن. سونىمەن قاتار ءبىر اۋىرىپ تۇرعان ادام، كوپ ۇزاماي قايتالاپ اۋىرىپ جاتقان كورىنەدى.  «ماۋسىمدىق تۇماۋ دەيىن دەسەڭ، مۇرىن بىتپەيدى، تۇشكىرمەيسىڭ. تەك قىزۋ بار، السىزدىك...» دەپ جازادى الەۋمەتتىك جەلى قولدانۋشىلار. مەكتەپ وقۋشىلارى اراسىندا دا اتا-انالار تاراپىنان بالاسى اۋىرىپ قالۋ سەبەپتى، بۇگىنگى ساباعىڭىزعا قاتىسا المايدى دەپ جاتقاندار بار ەكەن.

«تۇسىنىكسىز تۇماۋ. تاماعىم اۋىردى. ارنايى دارىلەرمەن شايدىم. الايدا تۇك اسەر ەتپەدى. كەيىن دەنە قىزۋىم كوتەرىلدى. دارىگەرگە قارالايىن دەسەم، الدىن الا جازىلىڭىز دەيدى. دارىگەرگە جازىلىپ، بارامىن دەگەنشە نە ساۋىعامىن، نە ءولىپ تىنامىن عوي؟! سودان ايتەۋىر بىلگەن ەم شارالارىن ۇيدە جاساپ، قازىر ءتاۋىر بولدىم»، -دەيدى الماتىلىق زەينەتكەر ءماريام اسقارقىزى.

وتكەن اپتادان بەرى ەكى كىشكەنتاي بالاسى اۋىرعان ءزۇبايرا امانجول: «سۋىق ءتيدى دەيتىندەي، دالاعا دا شىقپايمىز. ەكى بالام كىشكەنتاي بولعان سوڭ، ولاردى دالاعا شىعارۋ ماعان وڭاي ەمەس. بىراق جىلى ۇيدە وتىرىپ سول ەكى بالام ءبىر كۇندە اۋىردى. دەنە قىزۋى كوتەرىلدى، مازاسى بولماي،  كوپ ۇيىقتادى. ءۇش كۇن سولاي بولدى دا، كەيىن ساۋىعىپ كەتتى. دارىگەر شاقىرتىپ ەدىم، تاماعىن شايا بەرۋگە كەڭەس بەردى، بولدى. ەندى كەشەلى بەرى وزىمدە دە سونداي تۇسىنىكسىز جاعداي بولۋدا. دەنە قىزۋىم بار. السىزدىك باسىپ تۇر. دارىگەردەن كوۆيد ەمەس پە دەپ سۇراسام، ماردىمدى جاۋاپ الا المادىم»، -دەيدى.

بۇل ايتىلعاندار راسىمەن كوۆيدتىڭ ءتۇرى مە، الدە ماۋسىمدىق تۇماۋ ما، ازىرگە ءتيىستى مەكەمە تاراپىنان رەسمي جاۋاپ بەرىلمەدى. دەنساۋلىق ساقتاۋ مينيسترلىگى دە «ەكىنشى تولقىنعا دايىنبىز» دەگەن ءبىر اي بۇرىن. ودان بەرى ماردىمدى مالىمدەمە جاساي قويمادى. سوعان قاراعاندا، قاراپايىم جۇرتشىلىق ءوزارا پىكىرلەسىپ، سۇراۋ سالعان بۇل اۋرۋ ماۋسىمدىق تۇماۋ بولۋى دا ابدەن مۇمكىن. تاياۋ ۋاقىتتا ناقتى اقپاراتپەن مينيستر تسوي ەل الدىنا شىعادى دەگەن ۇمىتتەمىز. قالاي بولعاندا دا، ساقتىق شارالارىن قاتاڭ ۇستاۋ ءوزىمىزدى ساقتاۋدىڭ العى شارتى ەكەنىن ۇمىتپايىق.

راۋانا ديماشقىزى،

«ادىرنا» ۇلتتىق پورتالى.

فوتو اشىق دەرەككوزدەن الىندى.

پىكىرلەر