پاۆلودارلىق الاياق ازاماتتاردىڭ 15 ملن. تەڭگەسىن زاڭسىز يەمدەنگەن. ونىڭ زاڭسىز ارەكەتتەرىنىڭ سالدارىنان ەلىمىزدىڭ تۇكپىر-تۇكپىرىنەن 200-دەن استام ادام زارداپ شەككەن، – دەپ حابارلايدى «ادىرنا» Polisia.kz-كە سىلتەمە جاساپ.
جالعان كاسىپكەر ازاماتتاردى ينتەرنەت-سايتتاردا اۆتوبولشەكتەردى نارىقتىق باعادان تومەن باعامەن ساتۋ تۋرالى حابارلاندىرۋ ورنالاستىرۋ ارقىلى الداعان. تاپسىرىستاردى قابىلداي وتىرىپ، ول تاۋار ءۇشىن تولىق سومانى الدىن الا نەمەسە ءىشىنارا بانك كارتاسىنا اۋدارۋدى تالاپ ەتىپ، ال تاپسىرىستاردى كۋرەرلىك قىزمەت ارقىلى جىبەرۋگە ۋادە بەرگەن. تولەمدى العاننان كەيىن الاياق تاپسىرىس بەرۋشىلەردى ءبىراز ۋاقىت بويى كۋرەرلىك قىزمەتتىڭ ناشار ۇيىمداستىرىلۋىنا بايلانىستى جەتكىزۋدىڭ كەشىگىپ جاتقانى تۋرالى الداپ، ۋاقىت سوزىپ، سودان كەيىن ۇيالى تەلەفونىن تولىعىمەن ءوشىرىپ تاستاعان.
قازىرگى تاڭدا اتالعان الاياقتىق فاكتىلەرى بويىنشا قازاقستان رەسپۋبليكاسى قىلمىستىق كودەكسىنىڭ 190-بابى (الاياقتىق) بويىنشا سوتقا دەيىنگى تەرگەۋ جۇرگىزىلۋدە.
«ادىرنا» ۇلتتىق پورتالى
