ءماجىلىستىڭ وتىرىسىندا دەپۋتات امانجان جامالوۆ زەينەتاقىنىڭ ءبىر بولىگىن الۋ تۋرالى زاڭدى تەزىرەك قابىلداۋدى سۇرادى، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.
ول پرەمەر-مينيستر اسقار مامين مەن ۇلتتىق بانك توراعاسى ەربولات دوساەۆقا ازاماتتاردىڭ زەينەتاقى قورىنداعى قاراجاتىنىڭ ءبىر بولىگىن الۋدى رەتتەيتىن نورماتيۆتىك-قۇقىقتىق اكتىلەردى تەزىرەك قابىلداۋدى سۇرادى.
"مەملەكەت باسشىسى 2021 جىلدىڭ 2 قاڭتارىندا ازاماتتاردىڭ زەينەتاقى قورىنداعى اقشاسىنىڭ بولىگىن الۋ تۋرالى زاڭعا قول قويدى. ول باياعىدا زاڭدى كۇشىنە ەندى. الايدا ۇكىمەت ءالى كۇنگە دەيىن تۇرعىن ءۇي جاعدايىن جاقسارتۋ ءۇشىن زەينەتاقى قورىنداعى بىررەتتىك تولەمدى پايدالانا الماي وتىر. 761 مىڭ ازامات وسى ەرەجەنى كۇتىپ وتىر، ولار ءۇيدى دە تاڭداپ قويدى. ال بۇل ەرەجەلەر ءتۇرلى كەلىسىم مەن بەكىتۋ ءۇشىن كابينەتتەر اراسىندا "سەرۋەندەپ ءجۇر", - دەدى جامالوۆ ساۋالىندا.
وسىلايشا ول بىرقاتار ماسەلەلەردى العا تارتىپ، ناقتى دەرەكتەر ۇسىنعان.
"كوپتەگەن تۇرعىن پاتەردى 5 جىل ىشىندە ساتۋعا بولمايدى دەگەن شەكتەۋگە نارازى بولىپ وتىر. ولار ومىردە بولاتىن جاعدايلار - باسقا ايماققا، قالاعا كوشۋ، تۇرعىن ءۇي جاعدايىن جاقسارتۋ سەكىلدى جايتتار ەسكەرىلمەگەنىن اتاپ وتىر. سونداي-اق، ازاماتتار اقشانى سالىنىپ جاتقان ۇيدەن پاتەر الۋ مەن تۇرىپ جاتقان ۇيىنە جوندەۋ جۇرگىزۋگە الۋدى قاراستىرۋدى سۇرايدى. ازاماتتاردىڭ قۇقىعىن شەكتەمەي، تالابىنا جاۋاپ بەرۋدى اتاپ وتكىم كەلەدى. پرەزيدەنتتىڭ تاپسىرماسى مەن ازاماتتاردىڭ كۇتىپ وتىرعانىن ەسكەرىپ، 2021 جىلعى قاڭتاردىڭ سوڭىنا دەيىن زەينەتاقى قورىندا جينالعان اقشانىڭ بولىگىن پايدالانۋ بويىنشا نورماتيۆتىك-قۇقىقتىق اكتىلەردى تەزىرەك قابىلداۋدى سۇرايمىن", - دەدى دەپۋتات.
