الماتىدا ەپيدەميولوگيالىق احۋال ناشار

الماتى قالاسى اكىمى باقىتجان ساعىنتاەۆتىڭ ايتۋىنشا، مەگاپوليستەگى سانيتارلىق-ەپيدەميولوگيالىق احۋال كۇردەلى كۇيىندە قالۋدا. ەلىمىزدەگى ەڭ ءىرى شاھاردا وسى كۇنگە دەيىن كوروناۆيرۋس جۇقتىرعان 20 635 جاعداي تىركەلدى. ونىڭ 12 927-ءى – سيپتومدى، 7 708-ءى – سيمپتومسىز. ينفەكتسيا نەگىزىنەن قوعامدىق ورىنداردا جۇعۋدا. 3-19 قاڭتار ارالىعىندا قوعامدىق ورىنداردا (40,1%), وتباسىنداعى كۆي ناۋقاسپەن بايلانىس (27,4%), قالالىق كولىكتە (22,8%), جۇمىس ورنىندا كۆي ناۋقاسپەن بايلانىس كەزىندە (5,6%), شەتەلدەردەن جانە وزگە وڭىرلەردەن اكەلىنگەن ينفەكتسيا (2,6%). ينفەكتسيا جۇقتىرۋدىڭ جاعدايلارى جاس قۇرىلىمدارى بويىنشا: 20-39 جاستاعىلار – 34,7%; 40-59 جاستاعىلار – 28,7%; 60 جاس جانە ودان ۇلكەن جاستاعىلار – 21,3%. ينفەكتسيالىق ستاتسيونارلاردا 810 ادام ەمدەلۋدە، ونىڭ ىشىندە 20 بالا بار، 17 ناۋقاستىڭ جاعدايى وتە اۋىر، 147 ناۋقاستىڭ جاعدايى اۋىر، 644-ءىنىڭ جاعدايى ورتاشا اۋىر، 2 ناۋقاستىڭ جاعدايى جەڭىل. جازىلىپ شىققاندارى – 82, اۋرۋحاناعا تۇسكەندەرى – 112. قالىپتاسقان جاعدايدى ەسكەرە وتىرىپ، قالا اكىمى باقىتجان ساعىنتاەۆ قالالىقتارعا سانيتارلىق-ەپيدەميولوگيالىق قاۋىپسىزدىك شارالارىن قاتاڭ ساقتاۋ قاجەتتىگىن ەسكەرتتى.