تالعات نارىكباەۆ قر بعم قاراستى «ADAL BILIM» جوبالىق كەڭسەسىندەگى قىزمەتىنەن باس تارتتى. سايلاۋ ناتيجەسى بويىنشا نۇر-سۇلتان قالاسى ءماسليحاتى VII شاقىرىلىمىنىڭ دەپۋتاتى ءارى قالالىق ءماسليحاتتىڭ زاڭدىلىق، قۇقىقتىق ءتارتىپ جانە جۇرتشىلىقپەن جۇمىس ماسەلەلەرى جونىندەگى تۇراقتى كوميسسيا توراعاسى بولىپ تاعايىندالدى.
«اتالعان قىزمەت پەن قۇزىرەتتىلىك زاڭ جۇزىندە جۇكتەلگەندىكتەن ءارى قوعامدىق جۇمىس بولعان سوڭ، قر بعم جوبالىق كەڭسەسىندەگى قىزمەتىممەن قاتار الىپ ءجۇرۋ مۇمكىن ەمەس», – دەپ تۇسىندىرەدى ول.
ەستەرىڭىزگە سالا كەتەيىك، «ADAL BILIM» جوبالىق كەڭسەسى ءبىر جارىم جىل بۇرىن قازاقستان رەسپۋبليكاسى ءبىلىم جانە عىلىم ءمينيسترى اسحات ايماعامبەتوۆتىڭ بۇيرىعىمەن قۇرىلعان. كەڭسە تۋرالى ەرەجەنى قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ بەكىتتى.
سونداي-اق «ADAL BILIM» جوبالىق كەڭسەسى جىل سايىن وتەتىن «ادال تۇلعا – 2020» سىيلىعى اياسىندا «ەڭ ۇزدىك ۇلتتىق جوبا» اتاندى. ماراپات جوبالىق كەڭسەگە ءبىلىم جانە عىلىم سالاسىنداعى سىبايلاس جەمقورلىققا قارسى اتقارعان جۇمىستارى ءۇشىن تابىستالدى.
تالعات نارىكباەۆ Facebook-تەگى جازباسىندا وسى ۋاقىتقا دەيىن ءبىلىم جانە عىلىم سالاسىندا سىبايلاس جەمقورلىققا قارسى كۇرەس بويىنشا اتقارعان ىستەرىمەن، تالداۋ جانە ساراپتاما جۇمىستارىنىڭ ناتيجەسىمەن ءبولىستى. ەكس-باسشى جوبالىق كەڭسەنىڭ جۇمىسى بيۋدجەتتىك قاراجاتقا ەمەس، كازگيۋ ۋنيۆەرسيتەتىنىڭ قارجىسىنا جۇرگىزىلگەنىن اتاپ ءوتتى. وسى ۋاقىتقا دەيىن كەلەسىدەي جۇمىستار اتقارىلعان:
- جوبالىق كەڭسە قازاقستان رەسپۋبليكاسى ءبىلىم جانە عىلىم مينيسترلىگىنىڭ 16 قولدانىستاعى نورماتيۆتىك قۇقىقتىق اكتىلەرىنە تالداۋ جۇرگىزدى.
«جوعارى وقۋ ورنىنىڭ ۇزدىك وقىتۋشىسى» اتاعىن بەرۋ قاعيدالارىن بەكىتۋ تۋرالى» قازاقستان رەسپۋبليكاسى ءبىلىم جانە عىلىم ءمينيسترى مىندەتىن اتقارۋشىنىڭ 2015 جىلعى 16 ناۋرىزداعى №124 بۇيرىعىنا وزگەرىستەر ەنگىزۋ تۋرالى ۇسىنىستار ازىرلەندى. سونداي-اق قامقورشىلىق كەڭەسى قىزمەتىنىڭ تيپتىك ەرەجەلەرىنە وزگەرىس ەنگىزۋ، ونىڭ ىشىندە كەڭەس مۇشەلەرىنىڭ ورتا جالپى ءبىلىم بەرۋ ۇيىمدارى مەملەكەتتىك مەكەمەلەرىنىڭ باسشىلارىن كونكۋرستىق اۋىستىرۋ راسىمىندەگى رولىنە وزگەرىستەر ەنگىزۋ بويىنشا جۇمىس جۇرگىزىلدى.
- جوعارى وقۋ ورىندارىنداعى سىبايلاس جەمقورلىققا قارسى اۋديت جۇرگىزۋدىڭ، جوسپارلاۋ ءراسىمىنىڭ رەگلامەنتىن جانە «ستيپەنديالىق قوردى» قۇرۋ مەن ونى پايدالانۋدىڭ الگوريتمى ازىرلەندى.
- ءبىلىم بەرۋ ۇيىمدارىنا تەكسەرۋ جۇمىستارى جۇرگىزىلدى، ونىڭ ىشىندە كوللەدجدەردەگى ءبىلىم بەرۋ تاپسىرىسىنا مونيتورينگ جاسالىپ، جەرگىلىكتى بيۋدجەتتەن گرانت ءبولۋ ءراسىمىن جەتىلدىرۋ بويىنشا نۇسقاۋلىقتار ازىرلەندى. سونىمەن قاتار جۇمىس توبى جوعارى وقۋ ورىندارىن تەكسەردى، ناتيجەسىندە وقۋ پروتسەسىن ۇيىمداستىرۋدا، كاسىبي تالاپتار مەن اكادەميالىق ادالدىق پريتسنيپتەرىن ساقتاۋدا بۇزۋشىلىقتار انىقتالدى.
- جوبالىق كەڭسە قر بعم ۆەدومستۆولىق باعىنىستى ۇيىمدارىن وڭتايلاندىرۋ/تاراتۋ جۇمىستارىنىڭ ءبىرىنشى كەزەڭىن (ورتالىق اپپارات قۇرىلىمى بويىنشا نۇسقاۋلىقتار، فاكتورلىق-بالدىق شكالانى ەنگىزۋ، باسقارۋشىلار مەن ورىنداۋشىلاردىڭ قىزمەتتەرىن قايتا قاراۋ) جۇزەگە اسىردى. سونداي-اق ەكىنشى كەزەڭدى جۇزەگە اسىرۋ ءۇشىن 18 كۆازيمەملەكەتتىك سۋبەكتى بويىنشا تالداۋ جۇمىستارى جۇرگىزىلدى.
جازبا سوڭىندا تالعات نارىكباەۆ نۇر-سۇلتان قالاسى ماسليحاتىنداعى دەپۋتاتتىق قىزمەتىندە ەلوردامىزدىڭ ءبىلىم بەرۋ، قوعامدىق قاۋىپسىزدىك (قۇقىقتىق ءتارتىپ) جانە دەنساۋلىق ساقتاۋ سالالارىن دامىتۋعا كوڭىل بولەتىنىن ايتتى.
