ول بەس جاسىندا ءابىش كەكىلباەۆتىڭ شىعارماشىلىق كەشىندە ونەر كورسەتىپ، ونىڭ باتاسىن الدى. ارادا جىل وتكەندە باتىس قازاقستان وبلىستىق قازاق دراما تەاترىندا كورسەتىلگەن «قۇرمانعازى» قويىلىمىندا بالا قۇرمانعازىنىڭ ءرولىن سومدادى. بۇل كۇندەرى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ تالانتتى، جاس اكتەرلەرىنىڭ بىرى ابزالبەك اسحاتۇلىنىڭ بالالىق شاعى وسىنداي ەستەن كەتپەس وقيعالارمەن باستالعان. جۋىردا جاس تالانتتى ونەرپازبەن سۇحباتتاسۋدىڭ ءساتى تۇسكەن ەدى.
ادىرنا: جەتكەن جەتىستىكتەرىڭىز كىسى قۋانتارلىق ەكەن. بالالىق شاعىڭىزدان باستاپ، كاسىبي ساحناعا قالاي كەلگەنىڭىز جايلى قىسقاشا ايتىپ بەرسەڭىز؟
ابزالبەك اسحاتۇلى: التى جاسىمدا مەكتەپكە باردىم. سىنىپتاستارىمنان ءبىر جاس كىشى بولعان سوڭ با، بويىم دا شاعىنداۋ بولدى. قولدى-اياققا تۇرمايتىن، جىبىرلاق ەدىم. وسىنداي كەيپىمدى كورىپ «قويان بالا» دەپ ازىلدەيتىن. بالا كەزدە ونەر دەگەن قول جەتپەس ارمان سياقتى كورىنەتىن. وسە كەلە كوركەم ءسوز وقۋعا داعدىلاندىم. سونىڭ ارقاسىندا ءارتۇرلى بايقاۋلارعا قاتىسىپ ءجۇردىم. مەكتەپتى بىتىرگەن كەيىن 2010-2014 جىلدارى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ «مۋزىكالىق دراما» ماماندىعى بويىنشا ءبىلىم الدىم. ءۇشىنشى كۋرستا وقىپ جۇرگەن كەزدە ۇستازىم نۇرعانات جاقىپباي اعايىم تاماشا توسىن سىي جاساپ استانا جاستار تەاترنا جۇمىسقا شاقىردى. العاشقى كاسىبي ساحنام وسىلايشا جاستار تەاترىنىڭ اكتەرى بولۋدان باستالدى.
ومىردەرەك:
ابزالبەك اسحاتۇلى 1993 جىلى باتىس قازاقستان وبلىسى، جىمپيدى جەرىندە دۇنيەگە كەلدى.
2009 جىلى و.بوكەي وقۋلارىنىڭ گران-پري جۇلدەسىن العان;
2009 جىلى اتىراۋ قالاسىندا وتكەن حالىقارالىق ماحامبەت وقۋلارىنىڭ گران-پري جەڭىپ العان;
2010 جىلى رەسپۋبليكالىق ادەبيەت ءپانى بايقاۋىنىڭ گران-پري سىيلىعىن يەلەنگەن;
2013 جىلى گيتيس-تە وتكەن (ماسكەۋ) «رەجيسسۋرا جانە ادەبيەتتانۋ» حالىقارالىق بايقاۋىنىڭ ەڭ ۇزدىك ەر ادام نوميناتسياسىنىڭ يەگەرى اتاندى.
ادىرنا: قازاق تەاترىنىڭ قارا شاڭىراعىنا اۋىسۋىڭىزعا نە سەبەپ بولدى؟
ابزالبەك اسحاتۇلى: كەيبىر كىسىلەردەن ۇستازى نۇرعانات جاقىپبايمەن كەلىسپەي قالىپ، م.اۋەزوۆ تەاترىنا اۋىسىپ كەتىپتى دەگەن ءسوزدى دە ەستىپ ءجۇردىم. شىن مانىندە مۇندا اۋىسۋ تۋرالى ويىمدى ايتقان كەزدە ول كىسى كەلىسىمىن ريزالىقپەن بەرگەن ەدى.
م.اۋەزوۆ تەاترىنا اۋىسۋىما سەبەپ، ۇلكەن كەڭىستىك كەرەك بولدى. باسقا تەاترلاردى كەمىتكەنىم ەمەس، دەسە دە م.اۋەزوۆ تەاترنىڭ قالىپتاسقان بازاسى بولسىن، ساحنالىق ۇلگىسى بولسىن باسقالاردان ەرەكشە ەكەنى بەلگىلى. سوندىقتان وسى تەاتردا ونەر كورسەتۋدى ارماندادىم. ساباقتى ينە ساتىمەن دەگەندەي، بىردە الماتىدا ءبىر تەلەسيريالدىڭ تۇسىرىلىمىنە كەلگەن كەزدە، كاستينگ بولىپ جاتقانىن ەستىپ، كاستينگكە قاتىستىم. سونسوڭ ءوزىڭىز كورىپ وتىرعانداي اكتەرلەر قۇرامىنا قوسىلدىم.
ادىرنا: اۋەزوۆ تەاترىنداعى العاشقى رولىڭىزدە اكەڭىز اسحات ماەميروۆتىڭ «قوشتاسقىم كەلمەيدى» سپەكتالىندە باستى كەيىپكەردىڭ ءبىرى – ميتيانى ءساتتى سومداپ شىقتىڭىز. بۇل ءبىر جاعىنان ءوزىڭدى كورسەتۋگە جاقسى مۇمكىندىك بولسا، ەكىنشى جاعىندا تۋعان اكەڭىزدىڭ الدىندا ۇلكەن جاۋاپكەرشىلىك تۇردى. وعان سىرت كوز سىنشىلاردى قوسىڭىز. ولاي دەيتىن سەبەبىم، ەگەر ءرولدى دۇرىس ويناپ شىقپاساڭ - اكەسى بالاسىنىڭ موينىنا ارقالاي المايتىن جۇك سالىپتى - دەۋشىلەر تابىلاتىن ەدى. ايتپاعىم، وسى ءرولدى الىپ شىعۋ قانشالىقتى قيىن بولدى؟
ابزالبەك اسحاتۇلى: «تۋرا بيدە - تۋعان جوق، تۋعاندى بيدە – يمان جوق» دەمەكشى، ونەردە تۋىسقاندىققا ورىن جوق دەپ ويلايمىن. اكەم ونەرگە كەلگەندە وتە قاتال كىسى. قويىلىمعا دايىندىق بارىسىندا مەنى ەش اياعان ەمەس. ايامايدى دا. ماعان قاتتى زەكىپ جاتقان كەزدە، تۋعان بالاسىنا نەگە بۇلاي جاساپ جاتىر دەپ قاراعاندار دا بولدى. ءرولدى الىپ شىعۋدا وتە قاتتى قينالدىم. ءبىر جاعىنان اكەمنىڭ باعىتى بولەك بولدى. نۇرعانات اعايدىڭ مەكتەبىندە كوبىنە ادامنىڭ جان-دۇنيەسىنە ءمان بەرەتىنبىز. ال بۇل كىسىدە جاڭاشا قويىلىم بولعاننان كەيىن، ويى باسقاشا بولدى. كوبىنە سەزىمگە ەمەس – ساناعا اسەر بەرگىسى كەلدى. ياعني، كورەرمەندى ويعا قالدىرعىسى كەلدى.
بۇل اكتەرلىككە بەت بۇرعالى بەرى اكەممەن العاش رەت جۇمىس جاساۋىم ەدى. تاعدىردىڭ جازۋى دەگەن وسى بولار. اكەم تەاترىنداعى العاشقى رولىمدە اكەم ەكەۋمىزدى ءبىر ساحنادا كەزدەستىردى. قويىلىم اياقتالعاندا اكە ءۇمىتىن ابىرويمەن ارقالاعانىما قاتتى قۋاندىم. مەننەن باقىتتى ادام بولمادى سول كۇنى...
ادىرنا: اكتەرلەر قاۋىمى بايگە اتتار سياقتى عوي. شاپقان سايىن قىزا تۇسەدى. العاشقى سىناقتان ءساتتى ءوتتىڭىز. رەجيسسەر الما كاكىشوۆانىڭ «الماس قىلىش»
تاريحي دراماسىنداعى سۇيىنشىكتىڭ رولىندە ونىڭ قىزۋقاندىلىعىن، باقتىقوجا ەكەۋىنىڭ ارالارىنداعى ديالوگتارىن وتە ءساتتى شىعاردىڭىز. ودان كەيىن تۇساۋى كەسىلگەنىنە كوپ بولا قويماعان «اقتاستاعى احيكو» دراماسىندا احمەتتىڭ رولىندە وينادىڭىز. وسى سپەكتاكلدى كورگەن كوپشىلىك احمەتتىڭ (بايتۇرسىنوۆ) ءرولىن جاس بالاعا نەگە بەرگەن دەپ تۇسىنبەي جاتقاندار بولدى. بۇعان نە دەيسىز؟
ابزالبەك اسحاتۇلى: كوپ كىسىلەر ءالى دە تۇسىنبەي ءجۇر-اۋ دەيمىن. مەنىڭ سومداعان ءرولىم – اقىن احمەت. بىراق ول كوپشىلىك ويلاعانداي احمەت بايتۇرسىنۇلى ەمەس، جالپى الاش ارىستارىنىڭ جيىنتىق ءرولى بولاتىن. جاس ەرەكشەلىگى تۋرالى ماقتاۋشىلار دا، سىناۋشىلار دا بولدى. مەنىڭ ويىمشا ءاربىر قويىلىمدا تاجىريبەلى اكتەرلەردىڭ اراسىنا جاستاردى دا ويناتىپ تۇرۋدى دۇرىس دەپ ەسەپتەيمىن. ۇلكەندەر جاستىڭ جاستىعىن، ال جاستار ولاردىڭ تاجىريبەلەرىن الادى دەپ ەسەپتەيمىن. مىسالى، مەن وسى قويىلىمدا دۋلىعا اقمولدا اعامەن سەرىكتەس (پارتنەر) بولدىم. ول كىسىمەن جۇمىس ىستەگەن وتە قاتتى ۇنادى. توقمەيىلسۋدى بىلمەيتىن كىسى بولعاندىقتان، كوپ نارسە ۇيرەندىم. ءالى دە تاجىريبە جيناۋ كەرەكتىگىن ءتۇسىندىم. جالپى اكتەردىڭ بولدىم، تولدىم دەگەنى ونىڭ توقتاعانى دەپ بىلەمىن.
ادىرنا: قارا شاڭىراققا كەلگەلى تەاتر سۇيەر قاۋىمعا ءبىراز تانىلىپ قالدىڭىز. ۇجىممەن بىرگە باسقا وبلىستارعا دا ساپار شەكتىڭىز. دەگەنمەن حالىقتىڭ كوپشىلىگى تەاترعا بارا بەرمەيدى. سول سەبەپتى اكتەرلىك قۋاتىڭدى كينو وندىرىسىنە دە جۇمساۋ ويىڭىزدا جوق پا؟
ابزالبەك اسحاتۇلى: ويىمدا بار. بىراق، ءبىر نارسەنى ايتقىم كەلەدى، كينوعا ءتۇسىرۋ اكتەردى قۇنسىزداندىرادى. سوندىقتان دا ءبىر جەردە ءبىر اياعىڭمەن نىقتاپ تۇرۋىڭ كەرەك. سوسىن ەكىنشى اياقپەن شارلاي بەرۋگە بولادى. كينوعا ءتۇسىپ جۇلدىز بولعانىڭمەن، تەاتردىڭ ءلاززاتىنا جەتپەيدى. تەاتر اكتەرلەرىنە قولدىڭ شاپالاعىنان اسقان مارتەبە جوق دەپ ەسەپتەيمىن
ادىرنا: اقىرى كينو تۋرالى ايتىپ قالدىق قوي. قازىر ەلىمىزدىڭ بارلىق كينوتەاترلارىندا «الماس قىلىش» ءفيلمى كورسەتىلۋدە. بىرەۋلەرگە ۇناپ جاتسا، بىرەۋلەر قاتەلىگىن تاۋىپ جاتىر. اكتەر رەتىندە ءسىزدىڭ پىكىرىڭىزدى بىلسەك؟
ابزالبەك اسحاتۇلى: مەنىڭ ويىمشا دەگبىر سوعاتىن ەشتەڭە جوق. ون ەكى ساعاتتىق دۇنيەنى ەكى ساعاتقا سىيعىزۋ مۇمكىن ەمەس. ءساتتى تۇسىرىلگەن فيلم دەپ ەسەپتەيمىن.
ادىرنا: كىمدى ۇلگى تۇتاسىز؟ « اكە كورگەن وق جونار» دەگەندەي، رەجيسسەر بولۋ ويىڭىزدا جوق پا؟
ابزابەك اسحاتۇلى: اكەمدى ۇلگى تۇتامىن. ول كىسى اكتەرلىك ماماندىعىن، ماگيستراتۋراسىن، ودان دوكتورلىعىن ءتامامدادى. عىلىم مەن ونەردى قاتار الىپ كەلە جاتىر. مەن دە سونداي دارەجەگە جەتكىم كەلەدى. بىراق رەجيسسەرلىققا بەت بۇرام دەپ ايتا المايمىن. قازاق ۇلتتىق ونەر ۋنيۆەسريتەتىنىڭ درامالىق رەجيسسەر ماماندىعىنىڭ ماگيسترلىگىن ءبىتىردىم. بۇيىرسا دوكتورلىعىنا ءتۇسىپ، عىلىممەن دە اينالىسۋ جوسپاردا بار.
تەاتر اكتەرلىگىمەن قاتار تەمىربەك جۇرگەنوۆ اتىنداعى قازاق ۇلتتىق ونەر اكادەمياسىندا ۇستازدىق قىزمەت اتقارىپ ءجۇرمىن.
ادىرنا: الداعى ۋاقىتتا كورەرمەندى قانداي رولمەن قۋانپاقسىز؟
ابزالبەك اسحاتۇلى: ەرىك نۇرسۇلتاننىڭ «قىز جىبەك» سپەكتاكلىندە تولەگەننىڭ، «رومەو مەن دجۋلەتتا» پەساسىندا رومەونىڭ رولىنە دايىندالىپ جاتىرمىن.
ادىرنا: اڭگىمەڭىزگە راحمەت!
اڭگىمەلەسكەن جاسۇلان ناۋرىزاليەۆ
