تۇركيادا تۇسىرىلگەن قوجا احمەت ياساۋي تۋرالى تەلەحيكايا جاقىن ارالىقتا قازاقستاندا كورسەتىلەدى. قر اقپارات جانە قوعامدىق دامۋ ءمينيسترى ايدا بالاەۆانىڭ تۇركياعا جۇمىس ساپارىنىڭ ناتيجەسىندە وسىنداي ۋاعدالاستىققا قول جەتتى، دەپ حابارلايدى «ادىرنا» ۇلتتىق پورتالى قازاقپاراتقا سىلتەمە جاساپ.
ايتا كەتەرلىگى، قوجا احمەت ياساۋي ءومىرى تۋرالى تەلەسەريال پرەمەراسى قازاقستان مەن تۇركيادا ءبىر مەزگىلدە وتەدى دەپ جوسپارلانعان. تۇركيا تاراپى تۇسىرگەن بۇل تەلەحيكايا «ماۆەرا» دەپ اتالادى. ماۆەرا – (اراب تىلىندە «كورىنەتىن الەمنىڭ كورىنبەيتىن ارعى جاعى» دەگەن ماعىنانى بىلدىرەدى) كونە وسمانلى تىلىندە قولدانىلعان ءسوز. قازاقشا «تىلسىم الەم»، «قارسى جاق»، «باسقا دۇنيە» دەپ اۋدارۋعا بولادى. رەجيسسەر يۇدجەل حۇداۆەردىنىڭ بۇل ءفيلمى تارتىمدى ءارى قىزىقتى وقيعالارعا تولى.
ياساۋي تۋرالى تەلەحيكايانى تۇرىكتەر جاڭا فورماتتا تۇسىرگەن. وندا قوجا احمەت ءومىرىنىڭ كوپشىلىك بىلە بەرمەيتىن قىرلارى، جالپاق جۇرتقا بەيمالىم كەزەڭى كوبىرەك سۋرەتتەلەدى. سوندىقتان دا بۇل تەلەحيكايا قازاقستان كورەرمەندەرى ءۇشىن دە قىزىقتى بولارى حاق. تەلەحيكايادا ءياساۋيدىڭ ارىستانباپتان العان قۇرما دانەگىنىڭ قۇرما اعاشىنا اينالۋ وقيعاسى، دارۋىشتەر حيكاياسى، تاريحتاعى العاشقى الىپ-ەرەندەر وقيعاسى تارتىستى بەرىلەدى.
توقتالا كەتەتىن جايت، مينيستر ايدا بالاەۆا ساپار اياسىندا تۇركيالىق ترت تەلەراديوكومپانياسىنىڭ باسقارما توراعاسى يبراحيم ەرەنمەن كەزدەسكەن بولاتىن. وسى كەزدەسۋدە قازاقستان مەن تۇركيانىڭ تەلەۆيزيا سالاسىنداعى ىنتىماقتاستىقتى تەرەڭدەتۋ، بىرلەسكەن جوبالاردى جۇزەگە اسىرۋ ءسوز بولدى. اتاپ ايتقاندا، تاراپتار تۇركى جۇرتىنا ورتاق تاريحي تۇلعا – قورقىت اتا تۋرالى بىرلەسكەن سەريال تۇسىرۋگە ۋاعدالاستى. بۇدان بولەك، قازاقستان مەن تۇركيا تەلەراديوكومپانيالارى بالالارعا ارنالعان انيماتسيالىق جانە تانىمدىق فيلمدەردى جاساۋ تۋرالى جوسپاردى دا تالقىلادى.
