ەشكىم دە، ەشنارسە دە ۇمىتىلمايدى!

2380

«الاتاۋ» ءداستۇرلى ونەر تەاترىنىڭ كينوزالىندا ۇلى وتان سوعىسىنىڭ جەتپىس ەكى جىلدىعىنا وراي الماتى قالاسى اكىمدىگىنىڭ، «قازاقفيلم» اق ۇيىمداستىرۋىمەن «28 پانفيلوۆشىلار» (رەج. ا. شالوپا) ءفيلمىنىڭ قايىرىمدىلىق كورسەتىلىمى ءوتتى.

اتالمىش فيلم جاۋىنگەرلەرىمىزدىڭ ەرلىگىن ماڭگىلىك ەستەن شىعارماۋ ماقساتىندا «ەشكىم دە، ەشقاشان دا ۇمىتىلمايدى!» دەگەن ۇرانمەن  ۇلى وتان سوعىسى جانە ەڭبەك ارداگەرلەرىنە ارنالىپ قويىلدى.

كينوتۋىندىدا ۇلى وتان سوعىسى جىلدارىنداعى ورتا ازيالىق اسكەري ورتالىقتا (الماتى ق.) گەنەرال-مايور يۆان ۆاسيلەۆيچ پانفيلوۆتىڭ باسشىلىعىمەن قۇرىلعان 316-اتقىشتار ديۆيزياسىنىڭ ماسكەۋ تۇبىندەگى ەرلىگى جايلى باياندالادى.

كينوكورسەتىلىم «الاتاۋ» ءداستۇرلى ونەر تەاترىنىڭ كينوقىزمەت ءبولىمىنىڭ جەتەكشىسى ريتا حالەلقىزىنىڭ العى سوزىنەن باستاۋ الدى.  كورسەتىلىم بارىسىندا ادىستەمە ءبولىمىنىڭ جەتەكشىسى عاليا ناعيمانقىزى شاعىن بايانداما جاساپ، كەشەگى تاريحىن ۇمىتپاعان ەلدىڭ عانا بولاشاعى جارقىن بولاتىنىن ايتتى. ەلىمىزدى قورعاعان ساربازداردى ءبىر مينۋت ۇنسىزدىكپەن ەسكە الىپ، قۇرمەت بىلدىرگەننەن سوڭ جينالعان ارداگەرلەرگە ارنالعان فيلم ۇسىنىلدى.  كورەرمەندەر اراسىندا اتا-انالارى سول وقيعالاردىڭ كۋاگەرى بولعاندار دا كەزدەستى.

alatau

فيلمنەن العان اسەرلەرىن ايتا كەلە «شاڭىراق-2» ارداگەرلەر القاسىنىڭ توراعاسى قوبلانوۆ مارات بىلاي دەدى:
– بۇگىنگى كورگەن فيلمنەن «28 پانفيلوۆشىلار» اسكەرلەرىنىڭ، شىن مانىندە، ءوز حالقىنىڭ ناعىز باتىرلارى ەكەنىنە تاعى ءبىر مارتە كۋاگەر بولدىق. جاۋمەن شايقاستا شەكارامىزدى قورعاۋ ءۇشىن قانشالىقتى الپارىسقاندارى جاقسى باياندالعان. مىنە، ناعىز ەلگە  دەگەن سۇيىسپەنشىلىك پەن ەرلىكتىڭ ناقتى ۇلگىسى!

فيلمنەن وتە قاتتى اسەر الدىق. اسىرەسە، سوڭعى ەپيزودتار ەرىكسىز كوزىمىزگە جاس كەلتىردى. «28 پانفيلوۆشىلار» ەرلىگى  ۇلى وتان سوعىسى كەزىندە ەرەكشە ورىن الدى. بۇل پانفيلوۆشىلاردىڭ قاي­سارلىعى – قازىرگى جاستار ءۇشىن  باتىرلىق پەن جوعارى پاتريوتتىق سەزىمىنىڭ جارقىن ۇلگىسى. سول باتىرلارىمىزدىڭ ەرلىگى، وجەتتىگى بارشا جاستارعا ونەگە،  – دەپ ءوز پىكىرىمەن ءبولىستى «الاتاۋ» اۋدانىنىڭ ارداگەرلەر كەڭەسىنىڭ توراعاسى جازيتوۆ تەگىسجان.

بۇگىنگى بەيبىت كۇنگە جەتكىزگەن مايدانگەرلەرىمىزدىڭ ەرلىگى ەشقاشان ۇمىتىلمايدى. وسىلايشا ارداگەرلەرىمىز ۇيىمداستىرۋشىلارعا ريزاشىلىقتارىن ءبىلدىرىپ، ەلىمىزگە بەيبىتشىلىك تىلەدى.  ەستەرىڭىزگە سالا كەتەيىك، «28 پانفيلوۆشىلار» ءفيلمى قازاقستان رەسپۋبليكاسىنىڭ مادەنيەت جانە سپورت مينيسترلىگى مەن رەسەي مادەنيەت مينيسترلىگىنىڭ قولداۋىمەن تۇسىرىلگەن بولاتىن.

سۇم سوعىس الىستاعان سايىن ەل ىشىندە وعان ەكى ءتۇرلى كوزقاراس قالىپتاسا باستانى بەلگىلى.  ءبىرى - ۇلى وتان سوعىسى دەسە ، ەكىنشىسى - دۇنيەجۇزىلىك سوعىس دەگەندى ايتىپ ءجۇر. ايتپاعىمىز، بۇل سوعىس قانداي سوعىس بولسا دا قازاق توپىراعىنان شىققان جاۋىنگەرلەردىڭ  ەرلىكتەرى ەرەن بولدى. ءتىپتى، بۇل سوعىستى ەكىنشى دۇنيەجۇزىلىك سوعىس دەسەك تە، باتىر بابالارىمىزدىڭ ەرلىكتەرى ەشقاشان تومەندەمەك ەمەس.


"ادىرنا".كز

پىكىرلەر
رەداكتسيا تاڭداۋى