وليمپيادا چەمپيونى، حالىقارالىق سپورت شەبەرى باقتيار ارتاەۆ بوكستان مەملەكەتتىك جاتتىقتىرۋشى بولىپ تاعايىندالدى. بۇل تۋرالى «Astana Arlans» بوكس كلۋبى الەۋمەتتىك جەلىدەگى پاراقشاسىندا جازدى، دەپ حابارلايدى «ادىرنا» ءتىلشىسى.
«وليمپيادا چەمپيونى جانە ۆەل كۋبوگىنىڭ يەگەرى باقتيار ارتاەۆتى جاڭا قىزمەتكە تاعايىندالۋىمەن قۇتتىقتايمىز. ول بوكستان قر مەملەكەتتىك جاتتىقتىرۋشىسى بولات ءابدىراحمانوۆتى الماستىرادى. بۇل تاعايىنداۋ قازاقستاندىق بوكستىڭ دامۋىنا سەپتىگىن تيگىزەتىنىنە سەنىمدىمىز»،– دەلىنگەن حابارلامادا.
باقتيار عاريفوللاۇلى 1983 جىلى 14 ناۋرىزدا تاراز قالاسىندا دۇنيەگە كەلدى. بوكسشى، ەڭبەك سىڭىرگەن سپورت شەبەرى، بوكستان قازاقستان رەسپۋبليكاسىنىڭ چەمپيونى، 2004 جىلى افينادا وتكەن وليمپيادا ويىندارىنىڭ چەمپيونى، ۆەل باركەر كۋبوگىنىڭ يەگەرى. م.ح.دۋلاتي اتىنداعى مەملەكەتتىك ۋنيۆەرسيتەتىن، قازاق سپورت جانە تۋريزم اكادەمياسىن بىتىرگەن. بوكسپەن 10 جاسىنان باستاپ اينالىسقان.
«ادىرنا» ۇلتتىق پورتالى