ورال-اقساي تاس جولىندا 28 جاستاعى پوليتسيا قىزمەتكەرى جول اپاتىنان مەرت بولدى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
بقو پوليتسيا دەپارتامەنتىنىڭ اقپاراتىنشا، قايعىلى وقيعا 9 مامىر كەشكى سەگىزدەر شاماسىندا بولدى.
ورال-اقساي تاس جولىنىڭ 25 شاقىرىمىندا ۆاز-2110 ماركالى اۆتوكولىك اۋدارىلعان.
«وبلىستىق پاترۋلدىك پوليتسيا باتالونىنىڭ 28 جاستاعى قىزمەتكەرى رولگە يە بولا الماي، اۋدارىلدى. سالدارىنان پوليتسەي اۋرۋحانادا كوز جۇمدى. ونىڭ قاسىندا ەكى جولاۋشى وتىرعان، ولار امان»، - دەدى دەپارتامەنتتىڭ ءباسپاسوز قىزمەتىندەگىلەر.
پوليتسەي جول اپاتى كەزىندە ساۋ بولعان.
بۇل فاكتىگە قاتىستى قىلمىستىق كودەكستىڭ 345-بابى 3-تارماعى «اۆتوكولىك باسقاراتىن ادامنىڭ جول ءجۇرىسى نەمەسە كولiك پايدالانۋ قاعيدالارىن بۇزۋى، ابايسىزدا ادام ولىمىنە اكەپ سوققان ءىس-ارەكەت» بويىنشا سوتقا دەيىنگى تەرگەۋ باستالدى. بىرقاتار ساراپتاما تاعايىندالدى.
بۇعان دەيىن ورال-تاسقالا تاس جولىندا وسىعان ۇقساس تراگەديا بولعان ەدى. قالانىڭ پوليتسيا باسقارماسىنىڭ قىزمەتكەرى رولگە يە بولا الماي، جول اپاتىنا ءتۇستى. سالدارىنان وقيعا ورنىندا قازا بولدى.
"ادىرنا" ۇلتتىق پورتالى
