رەسەيدە كوروناۆيرۋستىڭ ءورشۋى ارتا ءتۇستى. ون كۇن بۇرىن كۇندىك جۇقتىرۋ ستاتيستيكاسى 7-8 مىڭ اراسىندا بولسا، قازىرگى ۋاقىتتا ول 17-19 مىڭعا دەيىن جەتتى. رەسەيدەگى ۆاكتسينا قابىلداۋدىڭ قارقىنىنا قاراماستان جاعدايدىڭ كۇرت ناشارلاۋى توقتار ەمەس.
رەسەيدىڭ 13 ايماعى "قىزىل ايماق" قاتارىنا ەندى. تەك قانا ينگۋشەتيا مەن ياكۋتيا "جاسىل ايماق" قاتارىندا تۇر. الايدا ول ۇزاققا سوزىلمايدى دەيدى ماماندار. الداعى اپتادا اتالمىش ەكى ايماقتا دا جاعداي كۇرت ناشارلاۋى مۇمكىن.
ۆيرۋس جۇقتىرۋدان ماسكەۋ، حاباروۆسك، تىۆا، امۋر، حاكاسيا، كيروۆ، كومي، بۋرياتيا، نەنەتس، چۋكوتكا ايماقتارى كوش باستاپ تۇر. بۇل ايماقتاعى ۆيرۋس جۇقتىرۋ يندەكسى 1,2-گە تەڭ. ساراپشىلار جاعدايدىڭ تامىز ايىنا دەيىن تۇراقتالۋى قيىن دەيدى. سەبەبى ۆاكتسينا العاندار سانى پايىزدىق نەگىزدە از، ال حالىقتىڭ ءوز ەركىمەن الۋعا نيەتى جوق. سوندىقتان ۆيرۋستىڭ تاراۋى ارتپاسا كەمىمەيدى دەگەن بولجامدار ايتىلۋدا. 21 ماۋسىمدا رەسەيدە 17378 ادامنان ۆيرۋس انىقتالعان. ءبىر كۇننىڭ ىشىندە 440 ادام ىندەتتەن كوز جۇمعان. جالپى پاندەميا باستالعالى بەرى رەسەيدە 5334204 ادام ۆيرۋس جۇقتىرىپ، 129801 ادام قايتىس بولعان.
"ادىرنا" ۇلتتىق پورتالى
