نۇر-سۇلتان قالاسىنداعى نازارباەۆ زياتكەرلىك مەكتەبىنىڭ تۇلەگى نارگيز شانتاەۆا قىتايدىڭ Duke Kunshan ۋنيۆەرسيتەتىنەن تولىق ءبىلىم گرانتىن ۇتىپ الدى. سونداي-اق، جاس دارىنعا الەمدىك QS-2021 رەيتىنگىسى بويىنشا ەۋروپانىڭ ۇزدىك ساياسي ۋنيۆەرسيتەتى سانالاتىن فرانتسيالىق Sciences Po ۋنيۆەرسيتەتىنەن شاقىرتۋ كەلدى، دەپ حابارلايدى «ادىرنا» ءتىلشىسى.
جوعارى وقۋ ورىندارىن تاڭداۋ كەزىندە قىتايلىق ۋنيۆەرسيتەتتىڭ ۇستانعان جاھاندىق كوزقاراسى مەن ەتنو-مادەني الۋاندىلىعى نارگيزدىڭ نازارىن اۋدارا بىلگەن. وعان قوسا، Duke Kunshan ۋنيۆەرسيتەتى (DKU) - Duke ۋنيۆەرسيتەتى (اقش) مەن ۋحان ۋنيۆەرسيتەتىنىڭ (قىتاي) بىرلەسكەن جوباسى. DKU ديپلومىنان باسقا، بارلىق تۇلەكتەر Duke ۋنيۆەرسيتەتىنىڭ ديپلومىن الا الادى. زياتكەرلىك مەكتەپ تۇلەگى نارگيز جوعارى وقۋ ورنىندا زاڭگەر ماماندىعى بويىنشا ءبىلىم الۋدى جوسپارلاپ وتىر.
«وسىناۋ 6 جىل ىشىندە ماعان كورسەتكەن ىقىلاسى مەن كومەگى ءۇشىن بارلىق ۇستازدارىم مەن كۋراتورلارعا ەرەكشە العىس ايتقىم كەلەدى. مەكتەپ ءبىتىرۋشى سىنىپتاستارىما كەلەر بولساق, جاڭا قادامدارىڭىزعا گۇل ءبىتسىن. سىزدەرگە تەك ساتتىلىك تىلەيمىن! قازىرگى ۋاقىتتا مەن ۋنيۆەرسيتەتتەگى وقۋىما دايىندالىپ جاتىرمىن. سودان كەيىن ارمانىمداعى جۇمىسقا ورنالاسىپ، سۇيىكتى قۇقىق جانە سوت ىستەرىندە ءوزىمدى بىلىكتى مامان رەتىندە دالەلدەيتىنىمە ۇمىتتەنەمىن»,– دەيدى جاس زياتكەر.
