الماتىدا ءۇيى ورتەنگەن وتباسى مونشادا تۇرادى. ءاپ-ساتتە بار جيعان-تەرگەنى كۇلگە اينالعان انا ءتورت بالاسىمەن بىرگە جۋىناتىن جەردە ءبىر اپتادان بەرى تۇنەپ ءجۇر. ال، قىزىل جالىن شارپىعان باسپانا قايتا قالپىنا كەلتىرۋگە دە جارامايدى. ەسەپ بەرگەندە ەلدى قارق قىلاتىن جەرگىلىكتى بيلىك توتەنشەلىكتەردىڭ جاۋابىن كۇتۋدەن باسقا قايران جوق دەيدى. ونىڭ ءۇيسىز-كۇيسىز ءتورت بالاعا نە قاتىسى بار ەكەنىن وزدەرى تۇسىندىرەر. ال، دالادا قالعان وتباسىن ەڭ بولماسا ۋاقىتشا ءبىر ورتالىققا دا ورنالاستىرۋعا بولماي ما دەپ ءبىزدىڭ ءتىلشىمىز شىرىلداپ ءجۇر. بۇل تۋرالى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ حابارلايدى.
تاۋ بوكتەرىندە ورنالاسقان جەر ءۇيدىڭ قالاي جىلدام جانىپ كەتكەنى قالامقاس كۇلىمجانوۆانىڭ ءالى دە كوز الدىندا. كەشكى ساعات سەگىزدىڭ شاماسىندا قىلتيمادان شىققان ءورت اۋماققا جىلدام تاراي باستاعان. ىشىندە قىستىق كيىمدەر مەن كىلەمشەلەر بولعاندىقتان، تەز تۇتانۋىنا سەبەپ بولدى، دەيدى.
«بالكون جاعىم جانا باستادى. بالالارىمدى جينادىم دا ۆوروتانىڭ ارعى جاعىنا شىعىپ كەتتىم. كورشىلەر ءبارى جۇگىرىپ كەلدى. بالكوندا قىستىق كيىمدەر بولعان. جەردە كوۆرالان توسەلگەن. سول ەڭ ءبىرىنشى تەز جانا باستادى»، - دەيدى كوپبالالى انا قالامقاس كۇلىمجانوۆا.
الدىن الا بولجام بويىنشا ءورتتىڭ شىعۋىنا ەلەكتر توعىنىڭ تۇيىقتالۋى اسەر ەتكەن بولۋى مۇمكىن. سول كۇنى ءبىر ءوشىپ، ءبىر جانىپ تۇردى، دەيدى. ءتىپتى، قىرسىققاندا قۇبىرداعى سۋ دا اقپاي قالعان. ويتكەنى، جەتىسىنە ءبىر رەت تازالىق جۇمىستارى جۇرگىزىلەدى ەكەن.
«قىزىل جالىن شارپىعان باسپانا تاۋ بوكتەرىندە بولعاندىقتان ءورت سوندىرۋشىلەر كەلگەنشە ءبىراز ۋاقىت ءوتىپتى. وعان دەيىن ءۇيدىڭ ساۋ تامتىعى قالماي ورتەنىپ كەتكەن. بىلىكتى قۇرىلىس ماماندارى اياداي مەكەندى قالپىنا كەلتىرۋ مۇمكىن ەمەستىگىن جەتكىزىپتى. سوندىقتان ءدال وسى ماڭايدان شاعىن عانا ءۇي كوتەرۋدەن باسقا امالى جوق»، - دەيدى ءتىلشى باۋىرجان جاقسىمبەت.
جولداسىمەن اجىراسىپ، ءتورت بالاسىن ءوزى باعىپ وتىرعان قالامقاس قازىر جۇمىسسىز ەكەنىن جەتكىزدى. جيعان دۇنيەسىنىڭ بارلىعى ورتەنىپ كەتكەندىكتەن، ەندى نە ىستەرىن بىلمەي دال. ال، اۋدان اكىمدىگى كوپبالالى اناعا قول ۇشىن بەرۋگە ءازىرمىز، بىراق كۇتۋ قاجەت، دەيدى.
«قازىر ءبىز توتەنشە جاعداي ماماندارىنىڭ قورىتىندىسىن كۇتىپ وتىرمىز. وسىدان كەيىن قارجىلاي وتەماقى تولەۋ تۋرالى قۇجاتتاردى ازىرلەيمىز. 15 كۇننىڭ ىشىندە قۇجات كەلۋى ءتيىس. التى ايدىڭ ىشىندە وتەماقى دا تولەنۋى مۇمكىن»، - دەيدى ناۋرىزباي اۋدانى اكىمىنىڭ اپپاراتى الەۋمەتتىك سالا ءبولىمىنىڭ باس مامانى اسەل ءجۇنىسوۆا.
ورتەنگەن باسپانا يەسى جەكە مەنشىك جەرىندە ورىن بولعاندىقتان ەندى وعان شاعىن بولسا دا ءۇي تۇرعىزىپ الۋدى كوزدەپ وتىر. ويتكەنى، مونشادا قىستا تۇنەۋ مۇمكىن ەمەس، دەيدى. قازىردىڭ وزىندە كەشى سالقىن، ءىشى تار ەكەنىن ايتۋدا.
«تار. قازىرگى كەشكى ۋاقىتتاردا سالقىن. تۇندە سۋىق. بىراق باسقا باراتىن جەرىم جوق. نە بولاتىنىن بىلمەيمىن» - دەيدى كوپبالالى انا قالامقاس كۇلىمجانوۆا.
"ادىرنا" ۇلتتىق پورتالى
(فوتو stan.kz سايتىنان)
