ەلباسى قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چجان سياونى قابىلدادى. بۇل تۋرالى Elbasy.kz سايتى جازدى، دەپ حابارلايدى «ادىرنا» ۇلتتىق پورتالى.
ول ەلشىنى قىتاي كوممۋنيستىك پارتياسىنىڭ قۇرىلعانىنا 100 جىل تولۋىمەن قۇتتىقتاپ، قىتاي كوممۋنيستىك پارتياسى ورتالىق كوميتەتى باس حاتشىسى سي تسزينپينگە جىلى لەبىزىن جولدادى.
«بۇگىن قىتاي كوممۋنيستىك پارتياسىنىڭ 100 جىلدىعى اتالىپ وتىلۋدە. توراعا سي ءتسزينپيندى جانە بارشا قىتاي حالقىن وسى ايتۋلى كۇنمەن قۇتتىقتايمىن. وسى جىلدار ىشىندە قىتاي حالىق رەسپۋبليكاسى العا قاراي ۇلكەن قادام جاسادى. كوممۋنيستىك پارتيانىڭ جوسپارى قىتايدىڭ ءالى دە نىعايىپ، دامي بەرەتىنىن كورسەتىپ وتىر»، – دەدى قازاقستاننىڭ تۇڭعىش پرەزيدەنتى.
ەلباسى قازاقستان مەن قىتاي اراسىنداعى ماڭگىلىك جان-جاقتى ستراتەگيالىق سەرىكتەستىكتىڭ دامۋىنىڭ وڭ قارقىنىن اتاپ ءوتتى.
«قىتاي حالىق رەسپۋبليكاسى الەمدىك اۋقىمداعى قۋاتتى مەملەكەتكە اينالدى. ەكونوميكاسى دۇنيە ءجۇزى بويىنشا ەكىنشى ورىندا جانە تەحنولوگيالىق دامۋ دەڭگەيى جوعارى. كەدەيلىكپەن كۇرەس ماسەلەسىندە دە قىتاي ۇلكەن قادام جاسادى. مەن ءاردايىم ءبىزدىڭ قارىم-قاتىناسىمىزدى قولداپ كەلەمىن»، – دەدى نازارباەۆ.
ءوز كەزەگىندە چجان سياو ەلباسىعا قۇتتىقتاۋى ءۇشىن العىسىن ءبىلدىرىپ، 1 شىلدە – قىتاي كوممۋنيستىك پارتياسىنىڭ مۇشەلەرى ءۇشىن ەڭ ەرەكشە ءارى ۇمىتىلماس كۇندەردىڭ ءبىرى ەكەنىن ايتتى.
«سىزگە جاقىن دوسىڭىز توراعا سي ءتسزينپيننىڭ ەڭ ىزگى تىلەگى مەن ىستىق سالەمىن جەتكىزگىم كەلەدى. ءسىزدىڭ 6 شىلدەدە وتەتىن الەمدىك ساياسي پارتيالار كوشباسشىلارىنىڭ سامميتىنە قاتىسۋ تۋرالى شەشىمىڭىزدى جوعارى باعالايمىز. بۇل وتە ماڭىزدى وقيعا»، – دەدى ەلشى.
چجان سياو جيىنعا نازارباەۆتىڭ قاتىسۋى قازاقستان-قىتاي قارىم-قاتىناسىن دامىتۋعا جانە قىتاي كوممۋنيستىك پارتياسى مەن Nur Otan اراسىنداعى پارتياارالىق بايلانىستى ارتتىرۋعا سەرپىن بەرەتىنىن اتاپ ءوتتى.
"ادىرنا" ۇلتتىق پورتالى
