اقتوبەدە ەلوردا كۇنىنە وراي ترياتلون پاركى اشىلىپ، فۋتبولدان حالىقارالىق تۋرنير ۇيىمداستىرىلدى دەپ حابارلايدى "ادىرنا" ۇلتتىق پورتالىنىڭ ءتىلشىسى.
قازاقستان تاۋەلسىزدىگىنىڭ 30 جىلدىعىنا جانە ەلوردا كۇنىنە ارنالعان «دەنساۋلىق جارىسى» سپورتتىق شاراسى جاڭادان پايدالانۋعا بەرىلگەن ترياتلون پاركىنىڭ اۋماعىندا ءوتتى.
بيزنەستىڭ الەۋمەتتىك جاۋاپكەرشىلىگى اياسىندا پايدالانۋعا بەرىلگەن ترياتلون پاركىنىڭ ۇزىندىعى — 2,5 شاقىرىم. مۇندا ۆەلوسيپەدشىلەرگە، جەڭىل اتلەتتەرگە جانە جاياۋ جۇرگىنشىلەرگە ارنالعان ارنايى جولاقتار بار.
شارانىڭ اشىلۋىندا قۇتتىقتاۋ ءسوز سويلەگەن وبلىس اكىمى وڭداسىن ورازالين تاۋەلسىزدىك جىلدارىندا وبلىس كولەمىندە بۇقارالىق سپورتقا جاقسى كوڭىل ءبولىنىپ، سپورتتىق شارالار مەن سالاۋاتتى ءومىر سالتىن قالىپتاستىرۋعا جان-جاقتى جاعداي جاسالىپ جاتقانىن اتاپ ءوتتى.
- ەل تاۋەلسىزدىگىنىڭ 30 جىلدىعى جانە ەلوردا كۇنى قارساڭىندا ۇيىمداستىرىلىپ وتىرعان بۇل شارا قالامىزداعى كوپتەگەن سپورتسۇيەر قاۋىمىنىڭ كوز قۋانىشىنا اينالىپ وتىر. مەرەكە قارساڭىندا باتىس وڭىرىندە تەڭدەسى جوق ترياتلون ساياباعىندا جاياۋ جۇرگىنشىلەرگە، ۆەلوشاباندوزدارعا جانە جۇگىرۋشىلەرگە ارنالعان جول ەل يگىلىگىنە پايدالانۋعا بەرىلىپ وتىر. الداعى ۋاقىتتا ساياباقتىڭ ءىشىن اباتتاندىرىپ، وتىرعىشتار قويىپ، ءتۇرلى جەمىس اعاشتارىن وتىرعىزىپ، كوگالداندىرۋ جۇمىستارىن ودان ءارى ارتتىرا تۇسەمىز. بۇل ساياباقتا قالا تۇرعىندارىنىڭ ەمىن-ەركىن سەرۋەندەپ، سپورتپەن شۇعىلدانىپ، جاقسى دەمالۋىنا بارىنشا قولايلى جاعداي جاسالاتىن بولادى، — دەدى و.سەيىلۇلى.
بۇدان كەيىن وبلىس اكىمى قازاقستان تاۋەلسىزدىگىنىڭ 30 جىلدىعىنا جانە ەلوردا كۇنىنە وراي فۋتبولدان وبلىس اكىمىنىڭ كۋبوگى ءۇشىن ۇيىمداستىرىلعان V حالىقارالىق تۋرنير جەڭىمپازدارىن ماراپاتتاۋ شاراسىنا قاتىستى.
تۋرنيرگە 8 كوماندا قاتىسىپ، جارىس قورىتىندىسى بويىنشا كورشىلەس وزبەكستان رەسپۋبليكاسىنىڭ «بۋنەدكور» كومانداسى ءى ورىندى جەڭىپ السا، ءىى ورىندى اقتوبە فۋتبول كومانداسى، ءىىى ورىندى وزبەكستاندىق «ناساف» فۋتبول كومانداسى يەلەندى.
شارادا اقتوبە وبلىسى اكىمىنىڭ كۋبوگى ءتۋرنيرى ەڭ پەرسپەكتيۆالى جانە ءداستۇرلى تۇردە بولا الاتىن بارلىق مۇمكىندىكتەرگە يە بولىپ وتىرعاندىعى ايتىلدى.
شارالاردان كەيىن وڭىر باسشىسى اقتوبە قالاسىنداعى «Ten Qogam» مۇگەدەكتەردى الەۋمەتتىك قولداۋ ورتالىعىن ارالاپ كوردى.
«اقتوبە قالالىق سال اۋرۋىنا شالدىققان ازاماتتاردى قولداۋ ورتالىعى» قوعامدىق بىرلەستىگى ديرەكتورى قۇرالاي بايمەنوۆا وبلىس اكىمىنە جاڭا عيماراتتى كورسەتىپ، ۇيىمنىڭ جۇمىسىمەن تانىستىرىپ ءوتتى.
اتاپ وتەيىك، بۇگىنگى كۇنى وبلىستا 27 550 مۇگەدەك تۇرادى، ونىڭ ىشىندە 4 292 18 جاسقا دەيىنگى مۇگەدەك بالالار. بۇل جوبا «Nur Otan» پارتياسى سايلاۋالدى باعدارلاماسىنىڭ «وزگەرىستەر جولى: بارشاعا لايىقتى ءومىر!» جول كارتاسى اياسىندا مەملەكەتتىك-الەۋمەتتىك تاپسىرىس شەڭبەرىندە مۇگەدەكتەردىڭ ءومىر ءسۇرۋ ساپاسىن جاقسارتۋ ماقساتىندا جۇزەگە اسىرىلۋدا.
جوبانىڭ ماقساتى - مۇگەدەكتەردى پسيحولوگيالىق قولداۋ، جۇمىسپەن قامتۋعا جاردەمدەسۋ جانە ىزدەۋ، جۇمىسقا ورنالاستىرۋ جانە جۇمىس ورنىن ساقتاۋ سالاسىنداعى الەۋەتتى ارتتىرۋ، مۇگەدەكتەردى تۇرمىستىق جانە الەۋمەتتىك داعدىلارعا ۇيرەتۋ ماقساتىندا ءتيىمدى ءومىر ءسۇرۋ ولاردى قوعامعا بەيىمدەۋ. ورتالىقتا قۇقىقتىق، پسيحولوگيالىق، الەۋمەتتىك-پەداگوگيكالىق، ءبىلىم بەرۋ جانە باسقا ماسەلەلەر بويىنشا اقپاراتتىق، كونسۋلتاتسيالىق جانە رەسۋرستىق قولداۋ، كۇندەلىكتى جانە الەۋمەتتىك داعدىلاردى، سونىمەن قاتار قازىرگى زامانعى ادامنىڭ داعدىلارىن ۇيرەتۋ جۇمىستارى جاقسى جولعا قويىلعان. مۇندا جىل اياعىنا دەيىن اي سايىن 30 جانە ودان دا كوپ ادامعا مۇمكىندىگى شەكتەۋلى 200 ادامعا قىزمەت كورسەتۋ جوسپارلانىپ وتىر. 2021 جىلى وبلىستا جۇمىسپەن قامتۋعا جاردەمدەسۋدىڭ قولدانىستاعى باعدارلامالارى شەڭبەرىندە 883 مۇگەدەكتى جۇمىسقا ورنالاستىرۋعا كومەك كورسەتۋ جوسپارلانۋدا. اعىمداعى جىلدىڭ 1 شىلدەسىندەگى جاعداي بويىنشا 479 مۇگەدەك نەمەسە 54,3% تۇراقتى جانە ۋاقىتشا جۇمىسپەن قامتىلعان.
"ادىرنا" ۇلتتىق پورتالى.
