قازاقستاندىقتار الەۋمەتتىك جەلىلەردە مەكتەپ اۆتوبۋستارىن ساتىپ الۋ تۋرالى جاڭالىقتى تالقىلاپ جاتىر. كەيبىر پايدالانۋشىلاردىڭ پىكىرىنشە، كولىك اتا-انالاردىڭ كەلىسىمىنسىز بالالاردى ەۆاكۋاتسيالاۋ ءۇشىن پايدالانىلماق. بۇل اقپاراتتىڭ جالعان ەكەنىن stopfake.kz جازدى، دەپ حابارلايدى «ادىرنا» ۇلتتىق پورتالى.
اقپارات بويىنشا، جەڭىلدەتىلگەن شارتتارمەن 515 مەكتەپ اۆتوبۋسىن ساتىپ الۋ تۋرالى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ بيى ماۋسىم ايىنىڭ سوڭىندا ءمالىم ەتكەن بولاتىن. بىراق بۇل حاباردى ەستىگەندە اتا-انالاردىڭ ءبارى بىردەي قۋانعان جوق. Instagram-دا كەيبىرى بۇل اۆتوبۋستار بالالاردى ساباقتان الىپ كەتۋ ءۇشىن قاجەت، ال اتا-اناعا بالاسىنىڭ قايدا ەكەنى ايتىلمايدى، بۇل ولاردى COVID-19 قارسى ۆاكتسينا الۋعا ماجبۇرلەۋ ءۇشىن جاسالادى دەگەن پىكىرلەرىن ءبىلدىردى.
قر ءبىلىم جانە عىلىم مينيسترلىگى بۇل بولجامداردى جوققا شىعاردى. ۆەدومستۆو وكىلدەرى كەيبىر بالالارعا مەكتەپكە جەتۋ قيىن بولعاندىقتان جاڭا اۆتوبۋستار ساتىپ الۋ قاجەتتىلىكتەن تۋىنداعانىن حابارلادى.
«بالالاردىڭ قاۋىپسىزدىگى بالالاردى مەكتەپكە جانە ۇيگە تەگىن تاسىمالداۋدى ۇيىمداستىرۋ ارقىلى قامتاماسىز ەتىلەدى. بۇعان 21 مىڭنان استام ءبىلىم الۋشى مۇقتاج، ولار ءۇشىن 758 بىرلىك اۆتوكولىك تاسىمالى قامتاماسىز ەتىلگەن. سوڭعى ءۇش جىلدا اۆتوبۋس پاركى 203 بىرلىككە جاڭارتىلدى. بۇگىنگى تاڭدا اۆتوكولىك ساتىپ الۋ قاجەتتىلىگى ءالى دە ساقتالىپ وتىر. بۇل ماسەلەنى شەشۋ ءۇشىن مەكتەپتەردى اۆتوبۋستارمەن قامتاماسىز ەتۋ جونىندەگى جول كارتاسى اياسىندا اۆتوبۋس پاركىن جاڭارتۋ جوسپارلانعان»، – دەپ حابارلادى قر بعم ءباسپاسوز قىزمەتىنەن.
سونداي-اق مەكتەپ اۆتوبۋستارى بالالاردى مەكتەپكە جانە مەكتەپتەن ۇيگە جەتكىزۋ ءۇشىن عانا پايدالانىلماق. كولىكتى باسقا ماقساتتاردا پايدالانۋ جوسپاردا جوق.
دەمەك ەلىمىزدە اتا-انالاردى ۆاكتسيناتسيالاۋعا ءماجبۇر ەتۋ ماقساتىندا بالالاردى مەكتەپتەن جاسىرىن تۇردە اكەتۋ ءۇشىن مەكتەپ اۆتوبۋستارى ساتىپ الىناتىنى تۋرالى پىكىرلەر نەگىزسىز جانە شىندىققا جاناسپايدى.
"ادىرنا" ۇلتتىق پورتالى
